Read Zeme Naga PAURUAPEU 6 Bible Online

PAURUAPEU 6 - Zeme Naga bible

PAURUAPEU 6

¹Tingnaimik kangge kesiabe I ngaudibe lamui lei, zai chize ziemmena peireige dapritsit ze bam lei:

²ziemmena ze pa luneibe ramme leine ’nnangmakluisui bam ra Hera ne lungyibe, keheube, zai pengêudirabe pei bei de lei, sede Hera ne chiramme leine pe suî’nning tew ze bam ra rezie pei gai mak lei, kane chiramme hesangme heluîchimakme suigut hangge chang gai di lei; aize du peruânggabe lei; chize mi lung tewkahejambe kau lei.

³Mige pe na haî kat lungkeu lu, zai tingkum misongga ze ring lu leusede keringbe ting gu mâ-keyibe ramme ngaube gene pe suiyi ra ngau mak mei nune, pakechaipum bai zun gai ra ngau mak mei zai â, beting chang mak ze lungkeu’ndibe napoine â pa sua â yibi lei, ze I kacheu de lei.

⁴Chigumbe â peruânggabe ge wangkeu ze kemuîbe ge gut kai de lei, zai muiterîngbe ne pe ji ze â ruichim’ndi de lei;

⁵chipau peireige du pa a naimik du ngau mak, zai mâ de chî le mak tai de lei; acheusede pa sua â chi napoine â sautemi ra ngau lu lei.

⁶Kum chang na pa ringchang lu leusede mâ-keyibe ngaumekeu ra ga lei—’nteumena bâm kat ge tatkamgairabe mak semei?

⁷Ziemmena tatew leine ze pe muiki hanggene lei, sede pa ka’njeibe teu’nggeuting gai ra ngau mak lei.

⁸Kemiebe kau peireige ziemmena kaningchingbe kau ’ndaikau gene yi’ngkeulube la lau? Kelungbe tak chibe gene kelaksiapeu hangge ’ndaikau keyibe ngau lau?

⁹Nang (tewneibe) ka’nchâbe ramme peurua bam ra sua â nang ngaulube ge ning lungwângchang ze bamdibe yibi lei. Aize du peruânggabe zai tingkai je guaka’nsabe ze de lei.

¹⁰’Ndaikau wangchang ze la mei be ze â pe ji ’ntak’ntuagai’ndibe kau de lei, zai ziemmena ze ’ndaikau mei be chî di de lei; zai ziemmena â pa sua â peranchibe kau je geikangchi lak lei be chî de lei.

¹¹Samsaka’ngkiebe ge peruânggabe du patka’ngkie lei, zai ziemmena châu yibibe kau la lau?

¹²Ziemmena pa keringbe peruânggabe ge beting keduîne ringgaibe ting ge, mi kezui gum ze tatpatkaibe ting kakge, ziemmena hangge ’ndaibe ze yi mei be châu chî lau? Châuge ziemmena je pa chaidibe chângge kedeirei ge ’ndaikau wangchang gu mei be saliaduibe kau la lau?