Read Zeme Naga PAURUAPEU 7 Bible Online

PAURUAPEU 7 - Zeme Naga bible

PAURUAPEU 7

¹Heji yibe â taudui pemîhungbe sua â yi lei; zai lungkeube mai sua â chaibe mai â yibi lei.

²Luubeki ge tatrabe sua â, kadesuibeki ge tatrabe yi lei; aize ziemmena hangge betun-gaibe de lei be ze keringme lung ge ’nningdau gu daseu.

³Ka’nnuibe sua â mi suisiabe â yibi lei, ’nninghereugaibe gene mi lungsui-yirabe â pat daseu.

⁴Kaningchingme lung â kadesuibeki ge bam lei; kane kemieme lung â ka’ntatewbeki ge bam lei.

⁵Kemieme gu heleu ’ngking ra sua â, kaningchingme ne ka’ngngiambe ’ngkingrabe â, ziemmena hangge yibi lei.

⁶Kemieme ka’nnuibe â, ’mmang ge hetu ramme rû gai bei puakpriak bambe gum lei; aize du peruânggabe lei.

⁷Chaîchim’ndibe ziegene kaningchingbe kau je tewka’mmie lei, zai henim luteube gene helung â tewka’nsia lei.

⁸Mâgetaleine bepîbang putchube sua â betun-gaibe â yibi lei; zai helung ge kahegiêbe sua â heraitiebe â yibi lei.

⁹Ning lumpum kelua se lau, mi lumpumbe â kemiebe ne puigit ze bambe kau daseu.

¹⁰“’Ndaitewbeibe ziegene chuna ting sua â, ’ndâ tattibe ting â yibi di se lau?” ze acheu se lau. Nang aize ka’nneube ze kaningchingbe gene mak daseu.

¹¹Kaningchingbe â mi heu hangge yi lei, zai naimik ngaulume hangge kegiebe chang lei.

¹²Kaningchingbe ze reîka’mmibe kau â, rangkâng ze reîka’mmibe gum lei; zai chika’mmibe gene mâ-keyibe ngaube ze â, chize ne kaningchingbe pe dage bambepeu je reî bei lei.

¹³Hera gu tatew ’nning gai ni lau; chauge pa tia’ngkuirui’ndibe tew’nzeiduibe kau la lau?

¹⁴Nang lungyibe ting ge ning suiyi’nta ze bam lau, zai ning pausiabe daube luage aize ’nning gai lau; misuiyibe du zai kahereube du Hera ne lang gai lei. Chidezai ziemmena je bechâng dezai ’ndaikau wangchang dai gu mei chî mak ze bam ra hangge zeu.

¹⁵A keringbe peruânggabe ge lung ze bambe ting ge mâgetaleine I ngau lu de lei; ziemmena hangkat tâ-pelingtewbe kau pa tâpeling tew ze bambe gene ga gai di lei, zai ziemmena kesiabe kau hangkat bam lei, zai pa tâ-kesiabe tew ze ringtie-desang ze bam lei.

¹⁶Yi’nzû se lau, zai ningching ’nzû’nderabe hangge ning runne ningchu tew gai se lau; ’ndaitew ze ning runne ningchu tew’nsia ra lau?

¹⁷Sia’nzû se lau, zai kemiebe kau chang gai se lau; ’ndaitew ze ning ting chang mak ze nang chai gai de ra lau?

¹⁸Aize ningnui tei’ntip ra yi lei, chigene ningnui ba ’mpat kai se lau; mi-mige du Hera je hingchibe kau leine â, chigene zuapat tu daseu.

¹⁹Namdi lungge samramme hangkereu bamme ranchi sua â ziemmena kaningchingpeu je â peranchi ’ngkeu ze bam ra kaningchingbe ne peran hang pei lei.

²⁰Pelingsing ze kedeirei ge ziemmena kapelingbe kau, tâ-keyibe tewbe kau, zai mâdau de hemuigaimakbe kau katte ga lei.

²¹Ziemmena samsa leine ge mi lung pei gai se lau, ning guâ ka’ngguapeu ne ningchu chiang gai mak ra hangge zeu.

²²Lua daizeu ge miramme je nang ne chiang gai ’ndi de mei be ning lung gene chî de zeî lau.

²³Airamme leine a dage kaningchingbe bambe gene I kakedak te lei; “I ningching ze bam gu lei” ze I kacheu de lei; kane chize a dagene deu sang deu ze bam de lei.

²⁴Keringbe rimba ’ndaikau mei be chirabe ze â deu-desang zai chuk de chuk-desang lei; châuge ne peupatchi dui lau?

²⁵Mâ-gechîbe bam le ra, zai peupatchi le ra, zai kaningchingbe peu le ra zai mâgetaleine riam’nzeichibe chang le ra, zai gechîbe gabe benai kemiebe â sia lei be chî le ra a lung tei’nrei gai de lei.

²⁶Zai kechaibe suadu siaka’nteube I peudaube ze â, ’mpuimi pelung ge ’mpia benai chiâk gum ze mi le ra chiamchibe zai pe ba kena zene hegeîria gum ze pichibe kau ze de lei; Hera suiguttewbe kau â, chipaupui dagene ’mbiapat lu lei, kane kahemuibe kau je â pa ne nîm lu de lei.

²⁷Pie le lau, kat peireige kat-kat nan ze kaisuâhang ze ’ndaikau riampat le duî mei be I peube gene aize I peupat te lei, ze Pauruapeu ne rang lei.

²⁸A lung gene I peubambe ze I peupat lak te lei, ’mpeumi chang kat ge hangkat je â riam’nzeigaiduibe I ngau lei, kane ’mpuimi je â aikiege bamme ruage katte I ’nning’nzeigaiduibe ngau mak lei.

²⁹Pie le lau, aize a runne I peudau de lei, chize â, Hera ne ziemmena je ka’nzeibe kau hangge ’ndam gai de lei, kane penui ne misongga ze chiampat ti de lei.