Read Zeme Naga PAURUAPEU 8 Bible Online

PAURUAPEU 8 - Zeme Naga bible

PAURUAPEU 8

¹Ziemmena kaningchingbe kau gumbe châu lau? Zai châu mâ-rimba sakkelichibe kau la lau? Ziemmena dage kaningchingbe ne pe ju tewrengachai gai bei de lei, zai pe lung ’nningkahereube ze tewkeli gai bei de lei.

²Heguangpeu gu hingde tei lau, zai Hera dage nang deseugai’ndibe ziegene ning lung hereu se lau;

³pe dagene tat’mbia de lau, mâ-kesiabe bam dezai chigene ’mbia ra tezietau ze bam se lau, pa ne nei-neibe pa tew daseu.

⁴Heguang gu sam â reziechi daseu; zai chauge ne pechu, “Nang ’ndaikau tew lau?” ze acheuchi dui lau?

⁵Hingde kuâ pheube kau dage â tewkahereube dau ra mak lei, zai pehî benai pa’mpuiki tak ze kaningchingbe kau lung ge â chî gu lei.

⁶Ziemmena hangge kahereube pe peireige ritsit ze bam sede mâgetaleine deu hangge pehî benai pa’mpuiki la daseu.

⁷’Ndaikau chang ra mei be pa â chî me lei, châu ne pechu ’ndaigumbe wangchang gu mei be rangliachi dui lau?

⁸Mî dage du herui je dei’ntauchiduibe rezie ga lei; zai kechaibe mai peireige du rezie ga lei; aipau rei ze ’mbiachi lak, zai chige peipatkai’ndime je helungriaksiabe gene du chua’nreipat lak lei.

⁹Airamme leine ze kedeirei ge tâtewtatbambe tak ze a lung gene ’nningdesibi gai dege I ’nchetpat te lei, ziemmena rezieteibe kangge ziemmena kêdapeu hereulie ze bam lei.

¹⁰Zai ziemmena kesiabe kau ramme je heraw ge baigaibe I ngau de lei; ka’nchibe bâm ge penui gut ze pat ze bam ka’nsui de lei, zai penui tâ-kesiabe tew gai ze bambe namdi ge penui je satoa gai bei de lei; aize du peruânggabe lei.

¹¹Tâ-kesiabe tewbe peireige samram’ngkuigaibe kelua ze tewgaimakbe ziegene ziemmename name lung ge tâ-kesiabe tew ra penui lung ge puigit ze bam lei.

¹²Hemui kau ziemmena lua haî kat tâ-kesiabe tew lu ze ringtie-desang ze bam le dui lei, sede Hera je kehingme hangge â yi gu lei be I chî lei; pe masuage kehingbe penui â bam daseu.

¹³Kane ziemmena kesiabe kau hang â mâ-keyibe dau ra mak lei. Kezui gum ze pa keringbe ting du tie ra mak lei; pa â Hera masuage kehingbe ga daseu.

¹⁴Peruânggabe kedeirei ge tewtat lamui lei, ziemmena kesiame tatew ramme gene pelingtewme peireige tewkahereube wangchang, zai pelingtewme tatew ramme gu getoabehi ze ziemmena kesiame ne ngaube nung zeu. Aize du peruânggabe lei, ze I kacheu de lei.

¹⁵Zai hesuiyika’ntabe yilang de lei be I hezuâ gai de lei, ziemmena hangge teu ze sak ze hesuiyika’ntabe bambe peirei keyibe kedeirei ge mâ de ga daseu, kedeirei ge pa keringbe ting hangge Hera ne peigaibeibe ting ge pa tâtewkahereube gene du aize tewtat bamchi duî daseu.

¹⁶Kaningchingbe chî le ra, zai kedeirei ge ’ndaikau tâ tewtat la mei be chîdesi le ra a lung ’nninghekuî gai dege, kebabe ting du zai tingmuî du mi mik hangge kejeibe ngau lak lei.

¹⁷Chidadege Hera tatew leine I ngau de lei, zai kedeirei ge tâ ’ndaigum ze tewtat la mei be ziemmena â peupatchi lak ti de lei. Ziemmena ne ’ndaizeuge hereu ze peu sede pa chize peupatchi ra mak lei; kaningching kau du chize pa chî lei, ze acheusedu pa ’nsangdu chize peupat lak lei.