Read Zeme Naga PAURUAPEU 9 Bible Online

PAURUAPEU 9 - Zeme Naga bible

PAURUAPEU 9

¹Airamme leine I ’nninghekuî gai zai ’ndeu’ndak kai de lei, ziemmena kapelingme zai kaningchingme zai penui tatew ramme Hera ba ge bambe tak zeu; chize kehungbe mei nune ngaugailakbe tak mei be ziemmena â chî me lei. Penui suage bambe ramme ze peruânggabe lei.

²Penui peireige mâ-wangchangrabe ze â kat daseu, kapelingme dage benai helungriaksiame dage, keyime dage benai kesiame dage, ka’nchime benai kahebâme dage, Hera hangge herâtewgaime dage benai herâtewgaimakme dage, mâ de gechâmbe ga lei, ziemmena keyibe kau du kesiabe kau dagene mâ de yi’ngkeu mak lei; zai deseutewlube ziemmena du deseu tewmakpeu dagene yi’ngkeu me lei.

³’Nteumena dage ’nzuâ kam ze mâ-wangchangrabe ze â kat lei, kedeirei ge tâwangchangbe leine ge aize kesiabe de lei. Ziemmena lung ze du kesiabe ne puigit ze bam lei, zai penui ringbe ting ge kemieliangtew ze bam lei, zai chipau chângge penui kechaime dage tat ti de lei.

⁴Kane keringme ruage herua ze bambe kau hang â kaheguîbe la lei, chaidibe duilui sua â ringbe hetei â yibi daseu.

⁵Keringme â penui chai gu lei be chî daseu, kane kechaime â mâ de chita di de lei, zai penui hang â getoabehi ga de lei; zai penui rasam ze chita di ze zîng gai di de lei.

⁶Penui kehungbe zai ka’nriebe zai penui hemimeube ze ga kam di lei, zai penui hangge â tingnaimik kangge tewgaibe gene mâdau de hedam ngau dai ra mak lei.

⁷Tat ze ning gu hetak hesuiyi’nta ze teu zu lau, zai ning gu wain ze helungsui’ntaza ze sak zu lau; ning tatew ze Hera ne râm’nzei gai bei ze la daseu.

⁸Peize ning puâ ’ngngûpchup ze bam bam lau; peize ning peî ge taudui gakeu se lau.

⁹Peruânggabe keringbe ting Hera ne nang kedeirei ge lung ze bam ra peibeibe ting ge ning nâu nang hungbepui dage hesuiyi’nta ze bam lau, chize â, nang keringbe ting gu hedam zai kedeirei ge nang tâtewhereugai’ndibe rachî ngaube kau daseu.

¹⁰Nang ’ndaikau-kau tâ tew ra ngau mei chige ning laîkai ze tâtew lau, nang tatkairabe Kechaiberam ge â tâtewrabe mei nune ’nningrabe mei, nune mâ-gechîbe mei, nune kaningchingbe mei, ze ga daseu.

¹¹Kedeirei ge kêdabe I ngau kadai de lei, ka’nzetpeu ne teri ge ngam mak, peranchipeu ne du herei ge kengambe chang mak, kaningchingpeu ne tak teu ra ngau mak, ’nrakhak ze bambepeu ne keheube ngau mak, hechiâm chiamchime je du satoagaibe ngau mak lei; kane pehî benai hepauyibe gene haimena hangge chang lei.

¹²Ziemmena â pe hangge beting wangchangrabe chî mak lei, hekâ je chiâk ne ’nrak’ndibe gum zai ’nruine je ’mpia ne mi’ndibe gum ze beting siabe luage ziemmename name peireige ’mpia ne rap gum ze luakatne wangchang gai di lei.

¹³Kaningchingbe lam ge aigum ze teiliabe kedeirei ge ngau lu de lei, zai chize betâudibe hangge I riam gai de lei.

¹⁴Ziemmena gechâmne runne bambe keloa poine kat bam de lei; zai heguang reziechipeu hangkat wang lu, chipau keloa je ka’nggi de lei. Pa ne chize tuaguâgit lu zai kerie tewpânggut ra chiamchu di de lei.

¹⁵Chipau keloa ge kelaksiapeu kaningchingbe kau hangkat bam de lei, zai chipau keloa ze pa kaningchingbe gene pa ne ’nripat kai bei de lei. Sede mî de chi kelaksiapeu je chî ze bam ta de lei.

¹⁶Kane chi kelaksiapeu kaningchingbe je ziemmena ne ngau’nna, zai pe sam ramme je ’ngking gai mak leusede I â peranchibe sua â kaningchingbe a yi’nteu lei, ze kacheu de lei.

¹⁷Kaningchingbe kau kuâ ’nchiappuai ze sabe ka’ngkingbe â kemieme ruage samrampeu ka’nrungbe kuâ sua â yi’nteu lei.

¹⁸Herei merua sua â kaningchingbe â yi’nteu lei, kane hemui kau hangkat ne misongga ze keyibe tewka’nsia lei.