Read Zeme Naga HELEU RAMME GU HELEU 1 Bible Online

HELEU RAMME GU HELEU 1 - Zeme Naga bible

HELEU RAMME GU HELEU 1

¹Heleu leine ruage peluiyilangbe leu Solomonbe ne ’mpuakkaibe.

²Hei nang ne ning mui ne achu keput kai bei nung laîzai hêu! Wain suadu nang achu ka’nraibe â yi-ka’ngkeu daseu,

³ning gu taudui ka’nnukbe rîm du namyi-desang lei, zai ning ji â taudui perîmyibe ruîpatbe de lei; chipauziegene heleume ningchu ka’nrai lei.

⁴Achu ngua le lau, anai pak te zu kei lei. Heguang ne pe kisîam ramme ge achu nguagut kai de lei. Nang gene anai suiyi’nta ze ’nsumchai gu lei; wain je sua â nang kehungbe anai chibam ra hangge zeu; ningchu â penui ’nraikezei run lei.

⁵I â a geî tik lei, sede a dage paremui la lei, Hei Jerusalem na heleume ramme gau, kedar gu hetiampaîki gum, Solomonbe gu lîmnambe paî ramme gum lei.

⁶I a geî tikbe ziegene achu ngau’nna se lau, achu a naichiê ne pulai ’ndi daseu. A puina ’mpeumi ramme a peireige penui râta lei, grepchî merie reî ra achu penui ne lang gai bei de lei; kane, a gu grepchî lu reî ra ngaulak lei!

⁷A keringbe ne ’nrailangpeu gau, achu rang lau, ning gu melidung deteu ra ’ndaibe bâm ’mbe nang nguatat kai ra lau, ’ndai’mbe penui tîngna hî ge sau ra ngua gai ra mei be rang lau; ’ndaitew ze ning kangme gu melidung ruage mige kezitruabe kau gum ze I kezitrua bam ra lau?

⁸Hei heleume ruage heleuyilangpui gau, nang ne chî makchai â, meli ramme pîpa chai sui le lau; zai melireîme gu hetiampaîki ramme hiage ning gu kemei poine ramme je reî ze bam lau.

⁹A merai gau, a mikngau ge nang â, Pharaobe gu hekuntimriang ramme ruage hekunmeleupui gum lei.

¹⁰Ning biapi kena ge ning keru tak ze hezêuyi lei, ning guang ge teluiteuria ’nteubiak bam lei.

¹¹Ning hangge gechâkteuria ramme anai teleu gu lei, gepût ne cheikeri lu zeu.

¹²Heguang pe gu bamdi ge ’ntaubambe luage, a gu nard gene perîmnamyibe ze pat te lei.

¹³A merai â a hangge Mur-taudui rîmyibe bung a ga ge ’mbeîgaibe gum lei.

¹⁴A merai â a mikngau ge hennapâ-huâ gum En-gedi grepchî merie ramme ge bambe gum lei.

¹⁵Hezêu gai lau, ning ’nrua yi lei, a merai gau; ning ’nrua yi lei; hezeu gai lau; ning mikhuâ â depeine gum heguiri bam lei.

¹⁶Hezêu gai lau, nang rehangyibe, a merai gau; eu lei, ning ’mmui ze yi run lei. Anai jeibâm hang du ’ndiakri la de lei;

¹⁷kedarching ne anai ki dappai ramme tew ze anai ki keza ramme ze â chingkeleu ramme ne tew lei.