Read Zeme Naga HELEU RAMME GU HELEU 2 Bible Online

HELEU RAMME GU HELEU 2 - Zeme Naga bible

HELEU RAMME GU HELEU 2

¹I ze â Sharon gu rospâ lei, zai bekâm ramme gu lilipâ lei.

²Hetuzeu ge lilipâ papatbe gum, heleume ruage a merai â chigum lei.

³’Nrêu chingbang ramme kakge appilchî bang bambe gum, rehangme ruage I ka’nraipeu â chigum lei, pechu ka’nchâbe-gut gene, pe gu kezui ge I ’ntaukeu gai lei, zai perachî â a hangge teuyi-desang lei.

⁴Luube-ki ge pa ne achu ngua gai, kehungbe paî ne achu pa ne bâ gai lei.

⁵Grepchî tingku ne a ran tewpui gai, zai appilchî ne achu tew’nrak kai dai lau; ningchu ka’nraibe gene a ran ’nnupuai di daseu.

⁶Pe ba heku’mbia ba ne a kum hang chang bei, zai hezat’mbia ba ne achu hegai gai bei nung laîzaine hêu!

⁷Ningnui je I kiam lei, Hei Jerusalem na heleume gau, hetidekaîne benai ka’nzetbe hetimeleupui ji gene deseu gai lau; anai kehungbe ze tewkebuak ra mak, zai pe lungwângchang mak tâne tew’nrak kai ra mak lei.

⁸A merai kuâ seu mui de lei! Ni, pa wang mui de lei, peloa’ntûm ramme peireige ’nsakrai-rai ze zai kedeiloa ramme peireige pakkeding ’mpuangrai-rai zeu.

⁹A merai â hetidekaîne gum zai rehiê’nsei gum lei. Ni, ’mbieseu ge pa sap lu muicheiki gene ’ngkiâpie ze, getitki gene rikpie la lei.

¹⁰A merai ne achu acheu ze ka’mpau lei: a merai, a chai sui le lau, a hungpui gau;

¹¹pie le lau ni, (kahegeibe) hetating ’ntua da, tingruibe du sau de lei.

¹²Kedeirei ge mâpâ ramme papat mui da, heleu ziebe nehî chang de lei, zai heram ge mautîu ’nrazia-zia-rie lamui de lei.

¹³’Mbeuchî ramme du bechî ’nchikeu mui da; grepchî pâ rîm ne tingkai du nam-heguiri la de lei. Zuachu zu lau, a merai, a chai sui le lau, a hungpui.

¹⁴Hei a gu depeinepui, hekâutelang ge tingchutelim kak gene, ning jupâ peluîyibe hezeû gai nei lei, ning leuruak ’ngking gai ra pei lau ning ruak yi-desang, zai ning ju â karenua daseu.

¹⁵Munserung ramme, munserung poine ramme ze du anui gu grepchîlu ramme tew’nsiarabe kau ramme je tuî ne lau, anui gu grepchî lu ramme â, bepâ paperîsi la daseu.

¹⁶A meraipeu â a gu lei, zai I du pe gu lei, lilipâ zeu ge pe gu melidung je pa reîtat lei.

¹⁷Hechua bapat mak tâne zai kemuîbe ’mbia mak tâne hangge, wangkelua de zu lau, a merai gau, peloa’ntûm ge hetidekaîne bambe gum, zai rehiê’nsei deiloa’ntûm ramme ge paktatbe gum zeu.