Read Zeme Naga HELEU RAMME GU HELEU 5 Bible Online

HELEU RAMME GU HELEU 5 - Zeme Naga bible

HELEU RAMME GU HELEU 5

¹A gu merie ge I wang la lei, a kinapui, a kimpui gau, a gu Mur benai mâ-perîmyibe ramme I luka’ndui lei, a gu ’ngkuipei benai ’ngkuidui I luteu lei, a gu wain benai tungdui kai’mpam lu I sak lei. Teu le lau, anai kangme gau, zai sak le lau, ningnui lungwâng sak le lau, anai hungme gau!

²I jeikau gai de lei, kane a lung â ’nrakhak bam lei. Ni! a merai ne ’ngkam gekeu mui de lei. “’Ngkam lat kai lau, a kinapui zai a merai gau, a gu depeinepui, I ka’nchâbepui gau; a peî â kezik ne chimbiak la da, tingmuî gu kahegeibe chui ne a peîtam ’nnimsim la daseu,”

³A puâ gâutua ’nda, ’ndaigum I luak kai dai ra lau? A pî hui lu de lei, ’ndaitew ze tewhebâ dai ra lau?

⁴A merai ne pe ba ngiêgut ze ’ngkamchâp kagesui de lei, zai a suigut ne a lung pedum bam di de lei.

⁵A merai je ’ngkam lat kai ra I zuachu de lei, zai a ba kena â Mur zene ’nrimchun bam, a bakêrang ramme du mur dui ne puigit ti de lei, ’ngkamcha I deîgaibe luage zeu.

⁶A merai je ’ngkam I lat kai de lei, kane a merai â tat dai di laleu lei. Pe kuâ seugai’ndibe I ’ngngaîkeu lak te lei. Pechu I peu da, kane ngaudau mak te lei; I pechu ku da, sede a kuâ pa kak mak te lei.

⁷Hekêtkaime ne achu ngaudau di de lei, namdi lungge penui tatruabe luage zeu; achu penui ne bêu bei de lei, achu tewhejam gai bei de lei, a peî’ngkumpaî du penui ne suttat ti de lei, chi keriengdi ge hekêtkaime zeneu.

⁸Ningnui je I kiam lei, Hei Jerusalem na heleume gau, a merai je ningnui ngaudau zai â, pechu ranglia gai lau, pechu I ka’nraibe ziegene heguîkualak la de lei, zeu.

⁹Hei heleume ruage heleuyilangpui gau, nang ka’nraipeu ze miramme ’nraipeu gene yi-ka’ngkeube ’ndaikau gene lau? Nang ’nraipeu ze miramme ’nraipeu gene yi-ka’ngkeube ’ndaikau gene lau? Anui ning dage samhat kai ra nang kiâm ra changdibe nung zeu?

¹⁰A merai â ’ngngûpchup zai peranchi lei, chang kereume ruage yi’ntutuâkbe kau lei.

¹¹Pe peî â gechâk kemiâu’ndiaulube kau gum, pe peîtam â ’ndauru ze ’nggakpui geî gum ze tik lei.

¹²Pe mik kena â temaune ramme tungdui ne pia lu pat ze ’nggeukung ge tâubambe mik gum lei.

¹³Pe biapi kena â reheubang ramme benai perîmyibe ne puigit ze bambe merie gum lei. Pe muitai â lilipâ ramme gum, Mur rîmyibe ne ’nrimchun bambe ze de lei.

¹⁴Pe ba’mpûm â, gechâkta ge tingchu pemîhungbe linggailube gum lei. Pe pumsak luî â, hepuagim chiampelinglube ge sapphir chu ramme ne lingtenaitai-gailube gum lei.

¹⁵Pe pî kena â alabastar chu ne tewbe gechia ramme gechâkbung ge ruagaibeibe gum lei. Pe luî â Lebanon loa gum lei, kedarchingbang ramme gum ze yi’ntutuâk lei.

¹⁶Pe samsa du renuahuai ze lei, zai pa â yi’nsangsiak lei. Aize de lei, a merai, zai aize de lei, a kangpeu zeu, Hei Jerusalem na heleume gau.