Read Zeme Naga HELEU RAMME GU HELEU 6 Bible Online

HELEU RAMME GU HELEU 6 - Zeme Naga bible

HELEU RAMME GU HELEU 6

¹’Ndaige nang ka’nraipeu tat kai di lau, Hei heleume ruage heleu yilangpui gau? ’Ndai’mbia nang merai tatzua gai di mei be rang lau, chidezai pechu anui ne ningchu nguapeugaihâ ra hangge zeu.

²A merai â pe gu merie ’mbe tat ti de lei, mâ-perîmyibe bang ramme bambe merie ’mbe chipau merie ramme ge pe gu melidung je reîtat lu ze lilipâ ramme rai ra hangge tat ti de lei.

³I â a merai gu pui lei, zai a merai â a gu peu lei, lilipâ ramme zeu ge pa â, pe gu melidung deteu ra kumtat kai lei.

⁴Ning luî yibe â Tirza namdi gum lei, a merai gau, nang â Jerusalem namdi gum ze ngauyi-desang lei, hereikang baudi ne hepiepaî ramme puabe gum ning ngeudi-desang lei.

⁵Ning mikpie a dagene pie’nrik te lau, chize ne achu tuî ’ndi daseu. Ning peîtam â Gilead’mpei ge kemeidung kin-gaukeudibe gum lei.

⁶Ning geuria â, melidung penui gêu chiaptualube chângge heduipiazun lu wangbe helî gum lei, penui ’nteumena penui na ’mpinlung lei, henagapui katte ga lei.

⁷Ning biapi kena â, ning ju tapchimbepaî kangge turiechipum pânggaibeibe gum bam lei.

⁸Heguangpui ramme riakseruk, zai nausîpui ramme riakdesat la lei, zai heleume â seikamlak ze la lei.

⁹A gu temaunepui, a gu yi’nsangsiakpui ze â kat runne lei. Pe pui na katgap runne lungkeupui, pe pui mikngau ge ngau’mmilangbe heleu’mpui lei, heleume pechu ngau lu hesuiyipui ze ku lei; heguangpui ramme benai nausîpui ne du pechu satoa lei.

¹⁰Chi pe mikpie ze hechua bapatbe luigum hekêu gum ze peluiyi naimik gum ze ba ze, hereikang baudi ne hepiepaî ramme puabe gum pe ngêudibe ze châu se lau?

¹¹Mâchî merie ’mbe I wangkeu de lei, bekâm ge mâ-hîmra ramme buapatbe pie ra hangge zeu, zai grepchî hiâm ramme tumpat ti de lei, turiechîpâ du pa la de mei be pie gai ra hangge zeu.

¹²Mâ de I ’nningchuimeluisuibe luage, a lung ka’nningbe ze â, a gu heguang taige hekuntimriang ge I chuatemichai ze tattibe gum ’nning gai ’ndi de lei.

¹³Melenwang lau, melenwang lau, Hei Shulam’mpui gau, melenwang lau, anui ningchu ngaudesi gai nei lei, melenwang lau. ’Ndaitew ze Shulam’mpui je ningnui pie gai nei ra lau, hereikang baudi kena kakge kelimbe helî gum di daseu.