Read Zeme Naga HELEU RAMME GU HELEU 7 Bible Online

HELEU RAMME GU HELEU 7 - Zeme Naga bible

HELEU RAMME GU HELEU 7

¹Pîtat (pîchûp) nang kaibe ze ning pî ge keujei-desang lei, Hei heguangme na heleu’mpui gau! Ning nie kena â teluichu ramme gum, hechiâm-tewchipeu ne remingzunlube gum lei.

²Ning lakuî â hekuak ka’ngguabe wain kebutlube gamak-luisuibe gum lei. Ning bungpui â dekuîmeu mekum gum chize lilipâ ramme ne guâ’ntuitit bambe gum lei.

³Ning gapâ kena â hetidekaîne kena ’mpinlungbe kena gum lei.

⁴Ning guang â hepuagim ne râ’ngngutaulube heki gum lei. Ning mik â Bathrabbim kemuiki hia Heshbon ge hezai sungbe ramme gum lei. Ning nêu â Lebanon loa ge hekêtkaibeki Damaska namdi ngau’nchiepuangbeki gum lei.

⁵Ning pei â Karmel loa gum ze getualieng bam lei, ning peîtam kêupak ze bambe â, ngauperikpik bam lei; ning tam yibe gut gezene heguang ’nsangdu ’mbia-daichi lak la de lei.

⁶Nang â heleuyi zai hemikziewang-desang lei, a merai gau, a lungwângchangpui gau!

⁷Ning pum luirâ-yibe â mêupibang gum, zai ning gapâ â chipau chihuâ gum lei.

⁸Meupibang I keuchu gu lei, zai perachîhuâ ze I rai gu lei, ze I kacheu de lei. Hei, peize ning gapâ kena ze grepchî hût ramme gum ze bam lau, zai ning chuirîm ze â appilchî rîm gum ze bam lau,

⁹zai nang ne keputkaibe â wain sakyilangbe gum lei. Acheuzai â chi wain ze peize luahiau kêu zu lau, a merai dage zeu, peize jeikeudime mui ge lua’nniâmba gai be lau.

¹⁰I â a merai gu lei, zai achu pa â ka’nchie lei.

¹¹Wang lau, a merai gau, hênamram zîng ’mbe tat te zu lau, zai keloa ramme ge rêu gai de kei lei;

¹²hechuasûn chu lu grepchî lu ramme ge tat kai kei lei, chige grepchî pengûmne tumpat de mei, zai turiechî ramme pat la de mei be pie gai ra hangge zeu. Chigene I ningchu I kehungbe ze pei gai gu lei.

¹³’Ngnguiheu bang ramme gene perîmyibe zuapat lei, zai a nai ki kiziêsua ge mâchî keyibe leine la lei, ’nchikeu karchibe du zai bamchîngdibe ze du zeu, chiramme I ning hangge ’nsakkaikua de lei, Hei a merai gau.