Read Zeme Naga HELEU RAMME GU HELEU 8 Bible Online

HELEU RAMME GU HELEU 8 - Zeme Naga bible

HELEU RAMME GU HELEU 8

¹Hei nang ze a sikina chang ze a pui ne ’mpâm ze puatung ze ’ngkutchulube kau nung laîzaine hêu! Hela ge baudime mikngau gene ningchu keput bei sedu ziemmena ngausia ra mak lei.

²Chi kacheu nung laîzai â, ningchu I ne a pui ki ge nguatat ze a ki ge ngua gai gu, achu lungkeupui kisîam ge zeu; chidezai ningchu I ne a gu wain haizunlube sak ra pei gu lei, a gu turiechî zau zeu.

³Pe ba heku’mbia ba ne a kum hang chang bei, zai hezat’mbia ba ne achu gaîgit bei nung laîzaine hêu!

⁴Ningnui je I kiam lei, Hei Jerusalem na heleume nung gau, anai kat-kat je kehungbe ze ningnui tewkebuak ra mak, zai pe lungwângchang mak tâne tew’nrak kai ra mak lei, zeu.

⁵Wîze tingkangram ’mbene pe gu merai je hegai lu wangbe châu nung se lau? Appilchî bang kangge ningchu I ne ’ngkia’nrakchu gai de lei, ningchu lungkeugaibe bâm sing geneu.

⁶Miramme je nang ngau’nrairabe lung ze I zene kainambe-’ngkam peize chang de lau, tuipuagairabe ning ba ze du a hangge runne peize chang de lau; ngauka’nraibe rachî ze â, kechaibe rezie gum peranchi, zai hemimeube ze â heraw gum ze pejaîsia lei. Chigene hemimelei taubuppat lei, zai hemimelei lamtewta di ze tau’ndibi-bi de ra chang lei.

⁷Hedui misongga zuâgaibe ne kehungbe tew’mmitchi lak lei, duinaibe ne du kehungbe ze naîchim lak lei. Mige ne pe ki-heurâ ne kehungbe lui ra tew dizai â, ngauka’nnabe pa ngaurabe runne lei.

⁸Anui kina heleume napoine la lei, zai pe gapâ tumpat mak kerei lei. Anui kinapui je rangwangbe mai ge anui ’ndaikau tew ra se lau?

⁹Pa ze kerie nung laîzai â, pe peireige gepûtgeî ne hekêtkaibeki tewchu gai gu de lei, kane pa ne kemuiki chang bei nung laîzai du anui ne pechu kedarchingpak ramme ne chapnam gai ’ndu de lei.

¹⁰I â a meraipeu gu lei, zai pa ne achu ngau’mmi-desang ze la lei; chipauziegene pe mikngau ge I â pa ngauka’mmipui chang di de lei.

¹¹Baal-hamon ge Solomonbe gu grepchî merie la lei; reîkadekime ba ge chize pa pei gai lei; perachî luteulube hangge hangkat-kat dagene pe dage gepûtgeî rangkâng chang kat mei gai lei.

¹²A gu grepchî lu chi a gu singbe ze â a hangge runne lei; nang ne chi chang kat ze â lunei zai â lu le lau. Zai reîkadekime je du peize haî na lu le lau, Hei Solomon!

¹³Hei! nang chi merie ramme lungge bambepui gau, a kangme ne ning kuâ ’ngking gai nei ze kuâ la de lei; I ’ngking gai che lei.

¹⁴Wang kelua zu lau, a merai gau, zai perîmyibe bang ramme bambe kedeiloa’ntûm ramme peirei gene hetidekaîne zai rehiê’nseipoine pakwang gum ze a dage wangkelua zu lau.