Read Zeme Naga ISAIA 1 Bible Online

ISAIA 1 - Zeme Naga bible

ISAIA 1

¹Uzziabe, Jothambe, Ahazbe zai Hezekiabe ne Judaram gu heguang chang ze bambe ting ge Judaram benai Jerusalem tedeu ge Amozbe na Isaiabe dage Hera gu keliâbe ngaube aipau leisikuak ge kai de lei.

²Seu le lau, Hei tinggîmme gau, zai ’ngking le lau, Hei kedeireime gau; Tingwang ne ranggai’ndibe sam daseu; “A na ’mpeumi ramme je I ne ’ngkut’nchichu gai bei de lei, kane penui ne achu katingkang de lei.

³Getumsei ne pa’mpaupeu je chi lei, zai hekunmerângne ne pa’mpaupeu ne pechu guîbe bâm chi lei; kane Israelme â chî mak lei, A gu ziemmena â ’nningchi mak lei.”

⁴Hei kahemuibe heram zat, hemuipungbe ziemmename, tâ-kesiabe tewme chaname, zai tâ pelingtewmakbe name penui duângga gu lei, penui â Tingwang je sâu gai ’ndi de lei, Israelme gu ka’nchibe Rapeu je penui â ngau’nna di de lei, zai penui â hechai’nnuktat ti de lei.

⁵Ningnui je tewsâ bam ra hangge ’ndaitew ze, ningnui tingkang bam ra rei lau? Ningnui peî ’nrâ kam da, zai helung pe rantew ta kam de lei.

⁶Ningnui pîdei gene chu ze ningnui peî riâ chang ze, peranchibe mâ de ga de lei, kane tewjâm’ndibe ramme, zai heteu ramme, zai hejâm kedibe ramme ’nnia de lei, chiramme tuitua gai mak, pinam gai mak, zai mâ-châ ne bîn’nnua gai mak te lei.

⁷Ningnui ram gua’mpiezîng gai la da, zai ningnui gu namdi ramme hemi ne ru de lei; ningnui mikngau sing gene hesangme ne ningnui ramdei sut te lei, hesangme ne tew’nsiakam’ndibe ziegeneu.

⁸Zai Zaion na heleu’mpui je runne grepchî merie ge hetiamki poine bambe gum, zai tuaguâ’ndibe namdi gum ze ’nsak kai de lei.

⁹Baudime gu Tingwang ne anui ruage gechâmne runne leusede ’nsakpat ra pei gai mak nung laîzaine â, anui â Sodom benai Gomorra gum ze changgaiderabe kau de lei.

¹⁰Tingwang gu sam ’ngking gai lau, ningnui Sodom gu samramme gau, ningnui Gomorra gu ziemmename gau, anui Rapeu ne geteiliabe sam geze ningnui kun ’ndualie gai lau.

¹¹Herâtewbe misongga ze ningnui peipatkaibe ze a hangge ’ndaikau tâu la lau, ze Tingwang ne kacheu de lei. Kerube-râtewbe hangge a dage meli’nsei misongga ze lamui, zai hekaune peleuyibe châ ramme du la kam lei, getumsei ramme jai mei, nune melipoine ramme jai mei nune kemei’nsei jai mei ze du I â ’nchâ mak lei.

¹²A suage ningnui wang ze sap dezai a gu Hera ki rielung ge kaurui ne kut’nruipuigit bam ra ka’nnang lei be châu ne ningnui je rang lau?

¹³Peruânggabe herâtewbe ramme teiwang ta lau. Ningnui mâ-perîmyibe ka’ntaube ze I â katenet lei, ningnui gu hekêu karchibe-ngi, zai ’ntakbambe mai, zai ka’nduibe ramme hemui ne pui ze wangka’nduibe peireige I â ngaugailak run lei.

¹⁴Ningnui gu hekêu karchibe-ngi ramme, ningnui ne riagailube hengi ramme je a keringbe ne ka’nrie lei, chiramme zene a hangge heputritbe chang di de lei, chipau put I punglei-desang de lei.

¹⁵Ningnui ba getuapat dezai ningnui dagene a mik pie’mbiatat tu lei; ningnui ’ndaizeuge kellum-desang sede I ’ngking ra mak lei; ningnui ba â hejai ne puigit ti de lei.

¹⁶Duipia le zu lau, ningnui je tew’nchi le zu lau; ningnui tâ-kesiabe tewbe ramme ze a mikngau gene tei’mbia ne zu lau, zai tâ-kesiabe tew ta lau,

¹⁷keyibe tew ra heli lau; samramka’nzeibe ze peu lau, tewsabe lieme je ’ngngâ lau; ’nggiâne je mêugaihâ lau, zai kemîpuime ze sapgugaihâ lau.

¹⁸“Chuna wang zu lau (kei lei), anui mâ-’nning zun gai kei lei, ze Tingwang ne rang lei: ningnui gu hemui ramme hejai gum gie bam sede mâ-geû gum ze ’ngngûpchup bam dai gu lei.

¹⁹Ningnui ne hezuâ gai bei, zai a kuâ pheu bei zai â, kedei rachî keyibe ningnui teu ra ngau gu lei.

²⁰Kane ningnui ne pheu mak ze achu tingkang zai â, hiazutkie ne ningnui je tew’ngga ’ndu lei, ze Tingwang mui gene rang gai ’ndi daseu,” ze kacheu de lei.

²¹’Ndaigum ze katimsangbe namdi ze zuateupui chang gai rei se lau! pe dage samrambe ka’nzeibe ne puigit bam de zeî lau! Kapelingbe ne pe dage puigit bam de lei, kane chuna â keyibe tâtewme chang gai di de lei.

²²Ningnui gu gepût ze hegeîbâ chang gai di de lei, zai ningnui gu wain ge hedui haî gai ’ndi de lei.

²³Ningnui gu samramme â hekuâpheumakme, zai hegateume je kangzangtewme bau lei. Haimena ne henimpeibe ze ’nchâ, zai kela ’ntapeibe je guaka’nsa lei. ’Nggîane je penui â mêuhâ mak lei, zai kemîpui ka’nnangbe kuâ penui ’ngking mak lei.

²⁴Chipauziegene, Tingwang, baudime Wangpeu, Israelme gu Reziechibe Rapeu ne rang lei, “Hei, a teureime peireige a lumpumbe ruî gai gu lei, zai achu ka’nggime peireige a kûmtew gai gu lei!

²⁵Ningnui peireige a bahuâ kai gu lei. Ningnui gu hegeîbâ I ne hui’nchichiak kai gu, zai ningnui gu hegeî siabe I ne lutua ’ndu lei.

²⁶Keraîbe ting ge gum ze ningnui gu samramme je I ne tei’nsapchu gai dai gu, zai bepîbang ge gum ze ningnui gu kaladdeime je I ne sum gai dai gu lei. Bechâng dezai â ningchu ze kapelingbe namdi, zai ’nnumtewduibe namdi ze kû gu lei,” ze acheu zeu.

²⁷Samramka’nzeibe gene Zaion je ripat kai gu, zai pelung ge bamme penui lung kahelime je kapelingbe ne ripat kai gu lei.

²⁸Kane ka’nggime benai hemuime je â, tew’ngga hiam gai gu lei, zai Tingwang je sâu’ndime je â rû’ngga ’ndu lei.

²⁹’Mpubang ramme je ningnui ka’nchâbe ziegene ningnui ’ngngam gu daseu, zai ningnui ne kelânglube merie ramme deu gene ningnui ma gie gai gu de lei.

³⁰Ningnui â ’mpubang peneu chaidibe kau gum, zai heduigabe merie gum chang gai gu daseu.

³¹Peranchipeu ze hemichut chang gai du, zai pe bachiâm gene hemirâ chang gai du lei; chibe kena ge hemi tauchu gu lei, mî de tew’mmitkairabe kau ga zeu.