Read Zeme Naga ISAIA 10 Bible Online

ISAIA 10 - Zeme Naga bible

ISAIA 10

¹Helungtaksiabe gene samrampatkaime penui duângga gu lei, zai kerawme, kagetedbe tâ tewbe rasam raw bamme penui duângga gu lei,

²mâ-pelingtewbe gene kegame je tei’mbia ze a gume ne ngau ra yibe ramme ze sutteu ra tew gai ra hang, chidezai kemîpuime zene peize penui gu hereichâ hang chang de ra, zai bepeu-game zene penui gu hetak hang penui ne tew gai ra hangge neu!

³Mâ-tewka’nsiabe mi duânggabe kedeu ’mbene nupwang ze tewsabe wangbe mai ge ningnui ’ndaikau tew ra lau? Peize ’ngngâ gai ra châu dage ningnui pak kai ra lau, zai ’ndaige ningnui heurâ ze sâudiak kai ra lau?

⁴Mâ de bam ta de lei, kebangki ge bamme ruage kei’ngkumtit lu bamrabe runne de lei, makchai du gîchatkaibeime zeu ge kâugairabe runne de lei. Airamme ge Tingwang ne pe lumpum ’mbia mak ze pe ba getuakuâ bam lei.

⁵Hei, a lumpumbe hegeîtui, a râtabe hetui, Assiria!

⁶Hera je ’nninghekuîmakbe heramzatme peireige I ne pechu lang gai lei, zai a râtame peireige I ne pechu die gai lei, hereichâ lu ze mâ-mâ gechup ra, zai keloa’ndi ge tingniâ gum ze penui je chaîkeniaksuai gai ra hangge zeu.

⁷Kane pa mâ du mak, zai pe lung ge mâ du ’nning gai mak lei; kane pe lung ge â tew’nsia ra ka’nning lei, zai heramzatme je misongga tew’nsia ’nde ra ka’nning lei;

⁸pa ne: “Samde dieme, a gume ’nteumename ne heguang kam mak mei?

⁹Kalno namdi ze Karkemis riâ mak mei? Hamath namdi ze Arpad namdi riâ mak mei? Samaria namdi ze Damaska namdi riâ mak mei?

¹⁰Samaria ge benai Jerusalem ge heraluîtewbe ramme bambe suadu di ze penui gu heraluî hekilube ramme bambe heraluîtewbe gu heguangram ramme ge a ba ngiêpatchang di bam ze,

¹¹Samaria benai pe gu heraluî ramme dage I tâtew gai gum ze Jerusalem benai pe gu heraluîtewbe ramme je I mâge â tew gai mak ra mei?” ze kacheu daseu.

¹²Zaion Loa peireige benai Jerusalem peireige Tingwang ne pa tewrabe tâ ze tew kam gai dezai Assiria heguang changgailube ne kechî-keditewpeu je benai pe gu mi ka’nneîbe kahegiêbe je pa ne tewsâ gai gu de lei.

¹³Pa ne: “A ba ranchi gene aize I ne tew gai de lei, zai a ningching geneu, I â mâ-gechîbe kau daseu; ziemmename gu herai kainambe ramme ze I ne tei’mbia kam gai bei da, zai penui heurâ ramme gechuppat kai bei de lei; getumsei ne gum ze I ne heguang-bamrâ ramme ge ka’ntaume ramme je tewkeu gai bei de lei.

¹⁴’Nruipoine chip gum ze ziemmena zat ramme gu heurâ ze I ne kebatâu lu de lei; ’nruipoine bûm ramme sâugaibeibe ziemmena ne rui lu gum ze I ne kedeirei pelane ruirit lu de lei; zai pe kan kakelapbe zat ga de lei, makchai pe mui ’ngngapatbe kau, makchai pe kuâ ’nchiapruabe kau mâ de ga de lei,” ze kacheu daseu.

¹⁵’Nrei zene ’nrei ne kuîpeu peireige pa hegie tewlia ra mei, makchai hechingrumbe-kie zene hechingrumpeu je pa tâtewchibe tak tewlia ra mei? Hegeî tei lu huachugaipeu je hegeîdâng zene rumrabe helî gum, makchai heching makbe kau zat je hetui ne teichurabe heli gum zeu!

¹⁶Chipauziegene Tingwang, baudime gu Tingwang ne pe gu herei ge pecheuchime ruage ziemmena je tewka’nsiabe herarît lang gai gu lei, zai pa pengêudibe gene taureba gai gu lei, hemi getaube helî gum zeu.

¹⁷Israel gu kebabe ze hemi chang gai gu lei, zai pe gu Ka’nchipeu Hangkat ze hemimelei chang gai gu lei; zai mai kat ne pe gu hetu ramme benai hetupat ramme chize ne rû ze kegeumut ’ndu lei.

¹⁸Pe gu ’nrêu yi-kadesangbe benai pe gu herachi yibe merie ze Tingwang ne tew’nsia gai gu lei, ziemmena keringbe benai hepum zeu, zai chize ziemmena ’nrâ ze bampeu siagaidibe mai gum ze wangchang gu lei.

¹⁹Pe gu ’nrêu gu hingbang ring’nsakpatbe ze gechâm runne du de lei, chiramme periak ’ndaikie mei be napoine ne raw dui lei.

²⁰Chipau mai ge Israelme ’nsakpatme benai Jakob ki ringpatme ze penui je lakpeu je ’ngngêu ta du de lei, kane gesang gene Ka’nchibe Hangkat chi Tingwang dage ’ngngêu gu lei.

²¹’Nsakpatbe, chi Jakobbe chaname je Hera tâtewchipeu dage helatwang gu lei.

²²Ning gu Israelme sungkling ge deseî riâ gum bam leusede penui gechâmne runne wang dai gu lei. Mâ-tewka’nsiabe wangrabe hangge samde diepat kai bei de lei, kapelingbe ne lua’nniâm ze bam de lei.

²³Tingwang baudime gu Tingwang ne samde diepatkai’ndibe luigum ze, kedeirei zuilung ge tew’ngga’nzâu gai ra tew gai gu lei.

²⁴Chipauziegene baudime gu Tingwang, Tingwang ne acheu ze rang lei: “Hei, a gume Zaion ge bamme gau, Ijipme ne ningchu tew gum ze ningchu Assiriame ne hegeîtui ne lak ze ning peireige penui tui huachu gai dezai hing se lau.

²⁵Kecheîne nak kai dezai, a lumpumbe tud kai du de lei, zai penui chairabe hangge a lumpum tew gai bu de lei.

²⁶Zai Oreb chukâng ge pa ne Midianme je lakbe mai ge gum ze baudime gu Tingwang ne penui je kegit ku lei; zai pe tui ze sungkling peireige bam gu lei, zai Ijip ge pa ne tew gai gum ze chize pa ne huachu gai gu lei.

²⁷Zai chipau mai ge ning keîtoa gene pe putritbe ze tat tu lei, zai ning guang gene pe gu guangkâm ze tew’nsia gai ’ndu lei,” ze acheu zeu. Rimmon gene pa tat te lei,

²⁸Aiath ge pa wang gai la de lei; Migron tat kai ze pa tat te lei, Mikmas ge pa pe gu kerua ramme kai’ndui gai de lei;

²⁹penui ne tatkabe bâm ze kapat ti de lei, Geba ge penui tingmuîzeu rêu gai lei; Rama kakedun de lei, Saulbe gu Gibea pak ti de lei.

³⁰’Nrung’nchi gai lau, Hei Gallim’mpui gau! Seu gai lau, Hei Laisha gau! Pechu kak kai lau, Hei Anathoth gau!

³¹Madmena â paktat la lei, Gebim ge bamme ’nseugairabe hang paktat lei.

³²Aipau mai sing ge Nob ge pa ’nnai gai gu lei, pe ba ka’nzumbe kedun ze bam gu lei, Zaion na ’mpuimi gu kedeiloa, Jerusalem gu peloa gezeu.

³³Pie le lau, Tingwang, baudime gu Tingwang ne hingbangkeî kedibe ramme ze mi kehingbe ranchi ne keriakbet kai gu lei; hu ze bambe ramme je kuîkau gai ze teikeu’na gai gu lei.

³⁴Pa ne ’nrêutum kedibe ramme ’nrei ne kuîkau gai gu lei, zai Lebanon ze pe gu hingbang pengêudibe bang ramme je nguakaukeu’mpam gu lei.