Read Zeme Naga ISAIA 11 Bible Online

ISAIA 11 - Zeme Naga bible

ISAIA 11

¹Pebangpui Jessibe mui gene pesûne kat tumpat ku lei, zai pe gu pema ramme gene bekeî kat puakpat ku lei.

²Zai Tingwang gu Herui pe peireige bam gu lei, kaningchingbe benai mâ-gechîbe lungtak, mâ-geteichibe benai mâ-tewchibe, mâ-gechîbe benai Tingwang je hingchibe lungtak zeu.

³Zai pe lungsui ka’ntabe ze â, Tingwang je kehingbe ge bam gu lei. Pa pe mik kengaube luî gene samram ra mak, zai pe kunseube luî gene râm’nchi gai ra mak lei;

⁴kane peling-gesang gene kelaksiame je pa ne samram gu lei, zai kedeirei ge kecheiluilung pungme hangge ka’nzeibe gene samram’nchi gai gu lei; zai penui gu hegeîtui zene pa ne kedeirei ze lak’nchi gai gu lei, zai pe mui ge pe chuilube zene kesiabe ka’nzûbe tâ tewme je bichat ku lei.

⁵Peling-gesangtewbe zene pe kiakâk chang ze bam gu lei, zai lungsangtewbe zene pe pum kakbe riâ chang ze bam gu lei.

⁶Munserung zene melipoine dage bam gu lei, zai keriakkau zene kemeipoine dage nguajei ze bam gu lei, zai getumpoine zai duilui, zai bepoine kahedeube bamherua gu lei, zai napoine hangkat ne penui je ’nguareîtat ku lei.

⁷Getum benai hegum deteu gu lei; penai na poine ramme jeiherua gu lei; zai duilui ne getum gum ze megau setteu gu lei.

⁸’Ngngiêne tungbe poine ne pa ’nchaiteube henêu zat ki peirei gene ’ntêulung ze bam gu lei, zai hebungtak teudibe napoine ne mechinêu chip ge pe ba kai gu lei.

⁹A gu kedeiloa ka’nchibe ge penui je tewjâm ra mak zai tew’nsia ra mak lei; sungkling hedui ne naîchim ze bambe gum ze Tingwang je gechîbe gene kedeirei ze puigit ze bam du daseu.

¹⁰Chipau mai ge â pebangpui Jessibe ma ze hezat ramme hangge mâ-chî ra teiliabe zat hang chang ze bam gu lei; pechu heramzatme ramme ne peu gu lei, zai pe gu pa kebambe bâm ramme ze pengêudi ze bam gu lei.

¹¹Chipau mai ge â Tingwang ne pe gume ka’nsakme je Assiria gene, Ijip gene, Pathros gene, Ethiopia gene, Elam gene, Shinar gene, Hamath gene zai sungkling ’nggeukâmram gene pakenabe luwang dai ra hang pe ba ngiêpat kai gu lei.

¹²Pa ne heramzatme ramme hangge mâ-ka’nchetbe teiliabe kat teichu gai gu lei, zai tuâpatkaibeibe zat Israelme je pa ne nguawang’ndui gai gu lei, zai Juda gu ziemmena lungrariptattime ramme je gekumwang’ndui gai gu lei, kedeirei mik medai geneu.

¹³Ephraim gu hemimeube ze tat tu lei, zai Juda lungchaitewme je â tew’ngga ’ndu lei; Ephraim ne Juda je hemimeu ze bam ra mak lei, zai Juda ne Ephraim lungchaitew gai ra mak lei.

¹⁴Kane tingbia ’mbia ge Philistinme keîtoa ge penai ne wangkeu ze gi gu lei, zai penai herua lu ze tingbia ’mbia ge bambe gu mâ-mâ gechup ku lei. Penai ne Edom benai Moab peireige tei’nrak ze bam gu lei, zai Ammonme ne penai luntew ze bam gu lei.

¹⁵Zai Ijip sungkling gu pelei ’ngkiâpatbe ze Tingwang ne tew’nsia kam gai gu lei; zai ’Nggeuki peireige pe gu tingkai kelumbe zene pa ne pe ba ne gui-kelap kai gu lei, zai ziemmena ne penui pî tewchimzet tu mak ze kapat le ra sungkling ze ’nggeuki sena hang bêupat kai gu lei.

¹⁶Zai Assiria gene ’mpuî’mai kedibe kat bam gu lei, pe gume ’nsakkaime hangge zeu, Ijipram gene penui hangbe ting ge Israelme hangge bambe gum zeu.