Read Zeme Naga ISAIA 13 Bible Online

ISAIA 13 - Zeme Naga bible

ISAIA 13

¹Babilon tedeu ge mâ-rangliabe Amozbe na Isaiabe ne ngaube.

²Peloa ’nduduakbe ge mâ-’nchetrabe kat teichu gai de lei, penui peireige ’nrung’nchi gai lau; ziemmena betâudime gu keriekemui ramme ge gut ra penui je heba kehuai gai lau.

³I sing ne a gume I ne tew’nchilume je samdie gai de lei, I a râtabe hangge mâ tâ tew gai ra pe ranchime ramme je I ne kelau gai de lei, I ne hegiêsie ze toa’ndigaime ramme zeu.

⁴’Ngking le lau, Baudime ’ncheukuâ gumbe kedeiloa ramme peireige kebiengseng bambe kuâ zeu! ’Ngking le lau, heguangram ramme ne ’nrungriau bambe kuâ zeu, heramzatme ramme wangka’nduibe ’ncheu zeu! Hereirabe hangge Tingwang ne baudime je kelau la de lei.

⁵Heram kedeu ’mbene penui wang de lei, tingmik ramme geneu, Tingwang benai kedeirei pelane tew’nsiagairabe gu pe lumpumbe kerua ramme zeu.

⁶Huai ze bam zu lau, Tingwang gu tingnaimikpui â na daseu; Hera tâtewchipeu dagene mâ-tewka’nsiabe gum ze chipau mai ze wang gu lei!

⁷Chipauziegene ’nteumena ba ze ’ngkeîkerei gai du lei, ’nteumena lung ge kenuihuak kai du lei, zai penui duângga ze bam gu lei.

⁸Helung tewrîn-gaibe benai mi duânggabe zene penui je ret ku lei; ’mpuimi henalung ra ’nraka’nsua gum ze penui duângga-desang ze bam gu lei. Penui kat-kat je pie lu penui ma rierûng bam gu lei; penui masuanggie bam wak ku lei.

⁹Pie le lau, Tingwang gu tingnaimikpui ze, kedeirei je tew’mpiezîng gai ra, zai kahemuime ramme je chigene tew’nsia gai ra hang mâ-ka’nzaîbetew mak helumpum-desang ze wang la de lei.

¹⁰Tinggîm ge hegi ramme benai hegi penui peduî-duîtew ze bambe ramme zene penui ’mbi pei ra mak lei; tingnaimik patbe luage tingnaimik muiterîng ze pat ku lei, zai hekêu ne pa’mbi pat ra mak lei.

¹¹Kedeirei je pa kesiabe hangge I ne tewsâ gai gu lei, zai helungriaksiame penui tâ-kesiabe tewbe hangge I ne tewsâ gai gu lei; gechî-keditewme penui kahegiêbe ze I ne tewpeduâng gai gu lei, zai katîmphime gu mâ-jaîtewbe deze I ne tewkengam gai gu lei.

¹²Gechâk yibe suadu ngauhung’nteu ra I ne ziemmename je tew gai gu lei, zai Ophir gu gechâk suanedu ngauhung’nteu ra I ne heramzat je tew gai gu lei.

¹³Chipauziegene tingkehube je kedun ze bam ra I ne tew gai gu lei, zai kedei ze pa bambe bâm gene gechuî’ngngai gai bei ze hela pat bi du lei, baudime gu Tingwang pe râta-kadesangbe mai ge pe lumpum ge zeneu.

¹⁴Heteu hûpatkaibeibe helungpui gum, makchai meli mige ne kum gai ra gabe kau gum ze ziemmena ’nteumena ne penui zat-zatme dage ’nreiwang kam gu lei, zai ziemmename leine ne penui kiram-ram ’mbe paktat kam gu lei.

¹⁵Mi-mige ngaudau-daume je â huîpelapik kai gu lei, zai tuîtau’ndibe kau â hiazutkie ge kâu gai gu lei.

¹⁶Penui name ’ngngiêne ramme je penui masua sing gene ’mpuakhitruai gai gu lei; penui ki ramme gechup kam ’ndu, zai penui nâu ramme je tâ’nrui gu lei.

¹⁷Pie le lau, peize penui je ’nggi ra gepût benai rangkâng pei gai bei sede chiramme je mâ-hang du chakaimakme Medes je I ne hû’nrak kai de lei.

¹⁸Rehangme ramme je penui gu bai’mpi ramme ne kapchat ku lei; penui ne henarak rachî ramme je mâ de ’nzâ ra mak lei; penui mik ramme ne napoine ramme je ngauka’nggiabe bam ra mak lei.

¹⁹Heguangram ramme gu pengêudibe, Babilon, Kaldiame ngeudibe benai penui gu kahegiêbe, ze Hera ne chiramme tewkaugaibe mai dezai Sodom benai Gomorra gum chang gai gu lei.

²⁰Rehei pelane hangge chige ziemmena bam ra mak, zai lung ra mak lei; Arab ne chige pe gu hetiamki râ gai gu lei, melireîme ne chige penui gu melidung je jeikau gai ra tew gai ra mak lei.

²¹Kane hekaubena ramme ne chige jeikela ze bam gu lei, zai chipau ki geze mârekaune pe kuâ ka’nrabe zat ramme ne chige puigit ze bam gu lei; chige ostrikruî ramme ne bam gu lei, zai chige kemei’nsei luîtewbe herasiabe (Satyr) ramme ne lim ze bam gu lei.

²²Pe gu heki kehube ramme ge henei ramme ne ’nra ze bam bam gu lei, zai munserung ramme ne heguang-bâm yibe ramme ge ’nra gu lei; (pe gu) beting ze â na de lei, chipau ting ramme ze tew’ntie ra mak lei.