Read Zeme Naga ISAIA 14 Bible Online

ISAIA 14 - Zeme Naga bible

ISAIA 14

¹Jakobbe peireige Tingwang ne ngau’nggia gai ze Israel je kelâng gai dai gu lei, zai penui ram singbe ge penui je kai dai gu lei, zai hesangme hingrangrui ramme ne penui dage herua ze Jakob ki je ’ngguigit bam gu lei.

²Zai hezat ramme ne penui je ngua lu penui bâm ge teiwang gai gu lei, zai Israel ki ne Tingwang ram ge penui kebangme ’mpeumi benai ’mpuimi ramme je penui heurâ chang ze tei gu lei; penui je kebang hang nimme je penui ne kebang hang nîm dai gu lei, zai penui je kagetedme je penui ne geted dai gu lei.

³’Nggua ra ningchu tewgaibeibe ge geteube ted, tewkahereube zai tâgechibe ka’ngguabe gene Tingwang ne ningchu temi gai ra pei gai dezai,

⁴ai ningchu tewkeleugaibeibe ze nang ne Babilon heguang peireige acheu ze tew gai gu lei: “’Ndaigumbe tak gene miramme je kagetedpeu sau gai di rei lau, ’ndaigumbe tak gene duîzuttewbe lumpum ze sau gai di rei lau!

⁵Tingwang ne helungriaksiame gu hetui tewbet kai ’nde lei, samramme gu langsiutui ze tewbet kai ’nde lei,

⁶hezat ramme je sau ta di lakgetiebambe tui, tewsabe gesut mak ze helumpumbe gene heramzatme je samrambe tui zeu.

⁷Kedeirei luî pelane ze sauzîng gai de lei; penui heleu tuachu de lei.

⁸Chingkeleu bang ramme ne ning peireige penui suiyi de lei, Lebanon gu kedarbang ramme ne, ‘Ningchu â tei’nnakeugai’ndibe ziegene, hingbang kuîpeu anui tailam hang me lei,’ acheu ze leutew lei.

⁹’Ngkang ’mbe Kechaiberam bambe zene nang wangkeu dezai ningchu hedau ra kedâ ze keleulia la de lei, ningchu rechâ gai ra chize ne kezui je tew’nrak kai de lei, kedeirei gu kanguame besuitewme leine zeu; heramzatme gu heguang chang ze bamme leine je penui gu heguang-bâm gene chize ne teichu gai de lei.

¹⁰Penui ’nteumena ne ningchu acheu gu lei: ‘Anui ne anui ran-gabe riâ nang ning ran-gakeu de lei! Nang anui gumbe riâ chang gai de lei!’ zeu.

¹¹Ning ngeutew’ndi ze bambe je â, Kechaiberam ’mbe teikeu gai ’nde lei, ning ngeutew’ndi ze bambe ’nrabung ramme kuâ zeu; ning kangge jeî bambe ze tingsî de lei, zai ningchu gûmbe ze muangzaine ramme de lei.

¹²“’Ndaigum ze nang tinggîm ’mbene ’ngngaîkeu lu rei se lau, Hei ’Nrîmbeting gu Hegi, Kemuibe na gau! ’Ndaigum ze ningchu kedei ge kuîkau gai bei rei se lau, nang heramzatme ramme je teikeu’nnagaipeu zeu!

¹³Nang ning lung gene, ‘I ne tinggîm chu gu lei; kehu ’mbe Hera gu hegi ramme peireige a gu heguang-bamrak I ne tewchu gai gu lei; kedeu ’mbe tingpeî ’mbia ge baudime ’ntuachube peireige I ne ’ntau gu lei;

¹⁴kemâu kehube ramme peirei ’mbe I ne chu gu lei, a runne achu Dilangpeu hang I ne tew gai gu lei,’ ze kacheu de lei.

¹⁵Kane ningchu â, Kechaiberam ge nguakeu gai bei de lei, Mâ-kuiki gechukbe sîng gezeu.

¹⁶Ningchu ngaume ne ningchu piereking bam gu lei, zai ning helî ze ’nning ze: ‘Aipaupeu kedeirei je kedun ra tewgaipeu,

¹⁷kedeirei je tingkangram gum tewgaipeu, zai namdi ramme gechim’nsiagaipeu, kebangki ge kebangme ramme penui ki lam tat ra peigaimakpeu de mei?’ acheu gu lei.

¹⁸Heramzatme gu heguang ramme pengêudi ze jei la kam lei, pe gu gu heraw ge zeu;

¹⁹kane ningchu â ning raw teleuzunlube gene, mi katenetbe ’ngngiêne beting chang mak lungbepoine je gum, hiazutkie ne reipelagaibeibe kechaipum paî ne dumlube tingchukâuki Gechukbe ge wangkeudibe ramme gum, kechaipum mi pî ne kutgetiebambe je gum ze tuâpat kai bei de lei.

²⁰Ningchu â penui dage kechai nguabai’mpam gai ra mak lei, nang ne ning ram tew’nsiakam’ndibe ziegeneu, nang ne ning gume je bichat ’ndi de lei. “Peize tâ-kesiabe tewme chaname je â, mâtew-tewsedu kû dai se lau!

²¹Pe name ramme je gîchatkairabe hang kedâ le zu lau, penui paume gu kemaube ziegeneu, makchai â, penui ne chu ze kedei ze tei nan ta du lei, zai kedeirei ge namdi ramme beipuiting gai bei ta du lei,” kacheu de lei.

²²“I ne penui je ’nggi ze zuachu gu lei,” ze baudime gu Tingwang ne kacheu de lei, “zai Babilon gene heji, ’nsakpatme, rehei chudairame je I ne lutua ’ndu lei, ze Tingwang ne kacheu de lei.

²³Zai Babilon ze ’ntuk (baktuk) bâm hang, zai zairing sungbe hang I ne tew gai gu lei, zai mâ-tewka’nsiabe ’mpiak ne I ne penui je biak ku lei,” ze Tingwang ne kacheu de lei.

²⁴Baudime gu Tingwang ne acheu samhat kai ze: “I ne ’nninggaibe luî chize wangchang gu lei, I ne hekagaibe luî chize tewchang gu lei,

²⁵I ne Assiria’mpeu je a gu heram ge tew’nsia gai ra, zai a gu kedeiloa ramme peireige pechu chaîkeniakchim gai gu lei; zai pe gu guangkâm ze penui dagene tat tu, zai penui keîtoa gene pe putritbe keutat tu lei,” ze kacheu de lei.

²⁶Kedeirei luî hangge I ne mâ-hekagaibe ze chipau hanggene kahekabe kau de lei; zai chi getuapatkaibe ze aipau ba de lei, heramzatme leine peireige zeu.

²⁷Baudime gu Tingwang ne heka gai ’ndi daze, châu ne chize tew’ngga ra lau? Pe ba getuapat kai bei de lei, zai châu ne chize teigut kai dai ra lau?

²⁸Heguang Ahazbe chaibe tingkum ge ai keliâbe wang de lei:

²⁹“Ning suî’nta ze bam se lau, Hei Philistia gau, ningnui ’nteumena neu, ningnui je lakbe hegeîtui tew’nsiagaibeibe ziegene, henêu bangpui ma gene mechinêu patrabe ziegene, zai perachî ze keliambe henêu changrabe ziegeneu.

³⁰Zai kelaksiame dagene lungkeuraibe na zene teu ra ngau gu lei, zai kegame zene ka’nnangga ze lung gu lei; kane ning bang ma je â, herakûm gene I ne tewchat ku lei, zai ning tehaine je I ne tewchat ku lei.

³¹Huai ze bam zu lau, Hei keriekemui gau; Hei namdi gau; hing-desang ze bam zu lau, Hei Philistia gau, ningnui ’nteumena zeu! Tingpeî ’mbia ’mbene mika wang mui da, zai pe gu baudime ruage tatchiararipbe tew mak lei.”

³²Heramzatme gu hepâupaume je hangkat ne ’ndaikau sam kak kai ra lau? “Tingwang ne Zaion tewchu gai bei de lei, zai chipau namdi ge pe gume lungkahereume ’nseugairabe bâm hang ngau lei,” ze acheu ra de lei.