Read Zeme Naga ISAIA 16 Bible Online

ISAIA 16 - Zeme Naga bible

ISAIA 16

¹Penui ne heram gu samrampeu dage, Sela gene tingkangram ’mpuî gene Zaion na heleu’mpui deiloa ’mbe meli ramme je lang gai de lei.

²’Nruipoine ramme liamrai-rai bambe gum, ’nruipoine pechip gene bepoine ramme je kumpatkaibeibe gum ze Moab na’mpuimi ramme ze Arnon geuki depiau ramme ge bam lei.

³“Mâ-nguagetei gai lau, peling-ka’nzeibe tew gai lau; tîngnarî ge tingmuî gum ze nang ne anui je sungnam gai lau, tuâpatkaibeime je tei’mbai gai lau, pakpatme je tuâpat kai se lau;

⁴Moab gene tuâpatme je peize ningnui ruage lung lau; penui je tew’nsiarame wangrabe gene ’nggum gai lau. Kagetedbe kau ga gai di dezai, zai tewka’nsiabe kau sau gai di dezai, zai chaîkakeniakpeu heram gene ga gai di dezai,

⁵hungka’ntipbe gene heguang-bamrak ze kai’ntip kai gu de lei, zai Dabid gu hetiamki lungge gesang-peling gene chige ’ntau bam gu lei, mige samram ze mâ-peling tew ra peube kau, zai mâ-ka’nzeibe tewgaikelua neibe kau zeneu.”

⁶Moab gu ka’ngngangbe kuâ anui seu de lei, pa ’ngngang-desang de lei; pa ne gechî-keditewbe, kahegiêbe, zai duîzuttewbe ze karasa kam lei.

⁷Chipauziegene peize Moab je pe duângga ze huai zu lau, pei ’nteumena ne Moab peireige kehuisiak ze bam lau. Hap ze heu zu lau, tew’nsia kam de lei, Kir-hereseth gu ’mbeuchî tingku zeu.

⁸Heshbon gu helu ramme hegui kam de lei, Sibma gu grepchî hiâm heguikeu de lei; heramzatme gu heguangme ramme ne chi bekeî ramme ze kedîm’nsia kam ’ndi de lei, chize Jazer namdi patchang lei, zai tingkangram kedîmtera- patchang lei; pesûne ramme ze ailia-lia hiampat ze sungkling patchang de lei.

⁹Chipauziegene Sibma gu grepchî hiâm hang Jazer namdi ne hapbe ge I du nguahap kai de lei; I ne a mikdui ne ningchu tewchim gai lei, Hei Heshbon benai Elealeh gau; ning rachî peireige benai ning gu perachî gekumwangbe peireige herei’ncheu keu gai di dadegeu.

¹⁰Zai hesuiyibe hesuiyika’ntabe ramme ze â, helu perachî yibe bâm gene teitat te de lei; zai grepchî hiâm ramme ge heleu ramme tew ta de lei, ’ngkiak ze ka’nrungbe kuâ ramme du pat ta de lei; grepchîneibe kau ze grepchî neibe bâm ge nei ta de lei; grepchî neibe ting ge lumtew bambe ze ’ntimrim gai de lei.

¹¹Chipauziegene a keringbe zene Moab hangge ’nrabung gum ze ningzung ze kadesui de lei, zai chigum ze a lung zene du Kir-heres hangge kadesui de lei.

¹²Zai Moab ne pe runne peipatliagaibe luage, zai pa pe gu kakellumbe bâm ge kellum ra wangbe luage pebâm hube suage pe ran-gakeu dizai â pa yi ze bam ra mak lei.

¹³Aipau sam ze tingtie’ngkage Tingwang ne Moab tedeu ge sagaibe kau de lei.

¹⁴Kane chunage Tingwang ne sa ze, “Moab ne pe gu ziemmena misongga bam bei sedu tâtewme je puîbe tingkum ramme luigum ze kum chum pechu tewhelêuku gai gu lei, zai ringpatme gechâmne runne gu lei, zai penui ran-ga gu lei,” ze kacheu de lei.