Read Zeme Naga ISAIA 17 Bible Online

ISAIA 17 - Zeme Naga bible

ISAIA 17

¹Damaska tedeu ge mâ-rangliabe. Pie le lau, Damaska namdi chang ta du de lei, zai bakêu ze tuâ’mpum bam du de lei.

²Pe gu namdi ramme ze â, betingbeta hangge putzîng gai ’ndu lei; chipau bâm ze meli bâm hang chang gai du lei, penui chige jeikela ze, penui je mî ne tew’ngnging ze bam ra mak lei.

³Ephraim gene hekêtkaibeki ngau ta gai du lei, zai heguangram ze Damaska gene ngau ta gai du lei; zai Siria ge ka’nsakme zene Israel name ngeudibe gum bam gu lei, ze Tingwang ne kacheu de lei.

⁴Zai chipau mai ge Jakobbe ngeudibe ze tei’nnakeu gai bu lei, zai pe pumrâyibe ze rikeu du lei.

⁵Zai chipau mai ze â, helugatpeu ne hemeubang sapbe ramme kebaîwang lu pe ba ne pebuî ramme gatbe mai gum gu lei, Rephaim Kâm gezeu.

⁶Pametai ramme â, olib chibang kelakrit lu dege pechîpum kechum-medai bekeî kedibe tûnroi ge bambe, pum medai-mengeu mâ-chibang keî poine ramme ge bambe rai’nsakkaibe mai gum ze, chige sâudiak kai gu lei, ze Tingwang ne kacheu de lei.

⁷Chipau mai ge ziemmena ramme ne penui je Ka’ndampeu je ’nningtâu kam gu lei, zai penui mik zene Israel gu Ka’nchibe Hangkat lam piezua kam gu lei;

⁸penui gu herâtewbe-kaira ramme peireige mâ-hang chak kai ra mak lei, penui bachiâm ramme zeu, zai penui ba sing ne teleugaibe herapui Asherah luî ramme nune mâ-perîmyibe rube-kaira ramme mei je penui pie ra mak lei.

⁹Israel name ziegene penui putkai’ndime Hibme benai Amorme gu putzînggai’ndibe bâm ramme gum ze penui gu namdi peranchibe ramme chang gai kam du lei, chige piezîngdibe bâm chang gai du lei.

¹⁰Nang ne ning gu tewka’nringbe bangpui Hera je ’ngngaî ’ndi de lei, zai ning gu ’nseubâm Tingchu kedibe je nang ne chîbam ta di de lei; chipauziegene nang ne hingbang yibe ramme tau gai sedu, zai mi chimakbe hera puâ hangge lupat kai ze bam sedu,

¹¹nang ne tewgaibe mai ge chiramme nang ne chîngchu ra teleu gai leusedu, zai hechua ge nang linggaibe mai ge chiramme papat ra teleu gai leusedu, perachî kagekumbe kacheube ze â, mi duânggabe benai geteube ted teleu’mmilakbe mai ge pak tu lei.

¹²Aha, hezat ramme kakebiengbe kuâ, penui kakebiengbe kuâ ze sungkling dui kuâ gum tai de lei! Aha, heramzatme ka’nrungbe kuâ ze, penui ka’nrungbe kuâ ze ’nggeuki hedui ranchibe kuâ gum de lei!

¹³Heramzatme ne hedui misongga bambe kuâ gum ze ka’nrung lei, kane pa ne chiramme je kiâ gai gu lei, zai penui pak kam du lei, kedeiloa ramme peireige tingkai guibe suage chêuriepum ka’nsabe gum, zai heratingkaichibe suage keramoîne gika’nrui gum zeu.

¹⁴Hegî hî ge, pie le lau ni, mi kehingbe! hechua tingbapat makge, chiramme ga gai de lei! Aize anui dage sut-teume dam de lei, zai anui dage kagechupme pausît te lei.