Read Zeme Naga ISAIA 18 Bible Online

ISAIA 18 - Zeme Naga bible

ISAIA 18

¹Aha, Ethiopia ’nggeugiam ’mbe tingkai ne guihi-hi bambe ram zeu;

²chize ne hepâupaume je Nail geuki, hekupum ne chiambe ’nneikuak sungkling peireige bambe gene langgaibe zeu! Ningnui pî ka’nchapme hepâupaume gau, heramzatme, penui kaurayi ’ndiaupiau ze bamme, mâ-mâ bâm leine ge miramme ne hingku ze bamme, peranchibe miramme ne duîlakbe heramzat, penui ram ’nggeuki ramme gene herai ze bamme dage tatchu lau.

³Ningnui kedeirei ge kelungme leine, ningnui kedeirei ge kebamme leine gau, mâ-ka’nchetbe kat kedeiloa ramme peireige teichu gai dezai pie lau! Hegeîluîkie ’mmut kai dezai ’ngking lau!

⁴Tingwang ne aigum ze achu rang ze: “I kebambe bâm gene tingnaichiê prîngbe gum, hechitting gu kelumbe chui ge kemuazûng gum ze I ne reine ze pie bam gu lei,” kacheu de lei.

⁵Hechitting suage hêrapâ ramme pahui gai dezai, zai mâpâ pengûmne pat dezai, pa ne mâ-chiapbe kie ne pesûne ramme chuttua gu lei, zai bekeî hiampatbe ramme ze pa ne dângtua gu lei.

⁶Chiramme pelane ze kedeiloa ramme ge ’nruine benai kedei ge hekaune gu hetak hangge sâu gai kam gu lei. Zai tinglumting ge chiramme ze ’nruine ramme ne tâuteu gu lei, zai hetating kahegeibe ting ge hekaubena ne chiramme gechupteu ze bam gu lei.

⁷Chipau ting ge ziemmename, penui kaurayi ze ’ndiaupiau ze bamme, mâ-mâ bâm leine ge miramme ne hingku ze bamme, peranchibe miramme ne duîlakbe heramzat, penui ram ’nggeuki ramme gene herai ze bamme dagene baudime gu Tingwang ji bambe bâm Zaion Loa ge baudime gu Tingwang dage kela ramme teiwang gai gu lei.