Read Zeme Naga ISAIA 19 Bible Online

ISAIA 19 - Zeme Naga bible

ISAIA 19

¹Ijip tedeu ge mâ-rangliabe. Pie le lau, kemâu pakchibe peireige Tingwang ’ntau lu Ijip ’mbe wang lei; zai pa bambe ge Ijip gu heraluîtewbe ramme ze kedun gu lei, zai Ijip ne chiramme ge penui lungchêutew ta di bam gu lei.

²Zai Ijipme ne Ijipme karai desit ra I ne tew gai gu lei, zai ziemmena ’nteumena ne pe sikina je ’nggi gu, zai ’nteumena ne penui kiningme je ’nggi gu, zai namdi ne namdi je ’nggi, heguangram ne heguangram je ’nggi gu lei;

³zai Ijipme penui lung ge mâ de ’nningchi ta du lei, zai penui tâtew ra ka’nningbe ramme ze I ne tewkeleu gai gu lei; zai penui ne heraluîtewbe ramme dage benai heduaîtewme dage ’mpau gu lei, zai gekungme benai kahekame dage ’mpau gu lei;

⁴zai I ne Ijipme je besuitewpeu pedeichukpeu ba ge pei gai gu lei; zai heguang pejaîsiapeu ne penui peireige samram ze bam gu lei ze baudime gu Tingwang, Tingwang ne rang lei.

⁵Zai Nail geuki dui ze changku gai du lei, zai ’nggeuki ze tingchiê ne puchangku gai ’ndu lei;

⁶zai heduiga kedibe ramme ze perîmnampak kai gu lei, zai Nail geuki gu mâ-bang keî ramme ’nsînbi-bi kêu ze kî kam gai du lei, hekubang zai hedui ge bambe bang ramme riam kam gai du lei.

⁷Nail geuki taihia ramme, Nail geuki hekâutû ramme ze ’nduduak bam kam du lei, zai Nail geukung ge mâ-helei sâugaibe leine ze lai kam gai du zai guitua kam nan ze mâ du bam ta du lei.

⁸Hekâ nîmme ramme ne heu ze desui gu lei, Nail geuki ge kakuaituame leine zeu; hedui ge chiâktuame penui ran-ga penui jie-siarei gai du lei,

⁹linen bang ra’nchiâm ze tâtewme mâ de heguîgailak tu lei, zai kelangkoa zuime du chigum gai du lei.

¹⁰Heram gu gechia’ndi changme ramme je tew’nsia desuirui gai ’ndu lei, zai tâtewhiteume leine penui duângga gai du lei.

¹¹Zoan ge heguangsinme ramme mie-desang di de lei; Pharoabe gu mâ-nguakageteime kaningchingme ramme ze deuzie ne mâ-kagetei lei. ’Ndaigum ze Pharaobe je, “I â kaningchingpeu na lei, ’ndâ heguang gechîngme na lei,” ze ningnui acheuchi ra lau?

¹²Chigum zai â ning gu kaningchingbe ’ndaige la lau? Penui ne peize ningchu rang gai be lau, zai Ijip peireige Tingwang ne tâtew ra hekagaibe ze peize penui ne nang chî ra tew gai be lau.

¹³Zoan gu heguangsinme ramme â mie di de lei, zai Memphis gu heguangsinme ramme je â, tewmie gai ’ndi de lei; pezatme ramme gu pemikchukâng changme ramme zene Ijip je â ngua’mmie gai bei de lei.

¹⁴Tingwang ne pe lungsui tewmie gai bei de lei; penui zene Ijip je tâtewbe ge tewkeliangsiang tew ra tew gai bei de lei, wain kameneupeu ne ’nrui ze keliangsiang tatpeu gum zeu.

¹⁵Zai besuitewme, pepeî mei, pemi mei changme, makchai meupi tu mei hekubang mei changme, Ijip hangge mâ de tewleduibe bam ra mak lei.

¹⁶Chipau mai ge Ijip ne ’mpuimi ramme gum ze baudime gu Tingwang ne penui peireige pe ba getuapat kai bambe suagene hing ze kedun gu lei.

¹⁷Zai Judaram zene Ijipme hangge mi kehingbe chang gu lei; Juda ji kûchugaime leine hing ze bam kam gu lei, baudime gu Tingwang ne penui peireige mâge â kesiabe tew gai ra ’nningchugai’ndibe hang mâge â tew ra bamkuadibe ziegeneu.

¹⁸Chipau mai ge (Hebrai) Kanaan lad ne same baudime gu Tingwang dage nei ze samkadeseume namdi mengeu ze Ijipram ge bam gu lei. Aipau Namdi ramme ruage kat ze â Naimik gu Namdi acheu ze kû gu lei.

¹⁹Chipau mai ge â Ijipram zuilung ge Tingwang gu herâtewbe kaira bam gu lei, zai pe gu heramrai ge Tingwang gu tingchusum ramme bam gu lei.

²⁰Chize ne Ijipram ge baudime gu Tingwang je sakkitewbe benai ka’nchetbe teiliabe chang gu lei; kagetedme ziegene Tingwang dage penui ne kû gai dezai pa ne penui je tewka’nringpeu hangkat je lang gai gu lei, zai pa ne penui je sapdang gai ze lupat kai gu lei.

²¹Zai Ijipme ne peize chî ra Tingwang pe runne pechu tewlia gai gu lei; zai chipau mai ge Ijip ne Tingwang je chî lu ze chipau mai ge herâtewbe benai kerube-râtewbe peipat ze kellum gu lei, zai samhatbe tew ze chiramme ge tâtew gai gu lei.

²²Zai Tingwang ne Ijip je lak ku lei, lak kai ze teleu’mmi gai gu lei, zai penui Tingwang dage helatwang dai gu lei, zai pa ne penui gekiebe kuâ ’ngking gai ze penui je tew’mmi gai gu lei.

²³Chipau mai dezai Ijip gene Assiria kakge ’mpuî’mmai kedibe kat bam gu lei, zai Assiriame ne Ijip ge wang, zai Ijip ne Assiria ge wang gu lei, zai Ijip ne Assiriame dage ngualungkat tew ze kellum gu lei.

²⁴Chipau mai ge Israel zene Ijip benai Assiria dage pakechumbe hang chang ze bam gu lei, kedeirei zuilung ge ’nnamgaibe kat chang zeu,

²⁵baudime gu Tingwang ne, “A gume changme, Ijip, zai a batâ changme, Assiria, zai a heurâ changme Israel je peize yi lau,” ze acheu ze ’nnamgai’ndime bau zeu.