Read Zeme Naga ISAIA 2 Bible Online

ISAIA 2 - Zeme Naga bible

ISAIA 2

¹Jerusalem benai Juda tedeu ge Amozbe na Isaiabe ngaulube sam.

²Wangdairabe naimikpui ramme ge â, Tingwang gu heki bambe deiloa gene kedeiloa leine ruage hulangbe hangge tew gai gu lei. Zai kedeiloa ramme ’ntûm ge tei’nsap kai gu lei, zai heramzat ramme leine ne chige lungwang’ndui gu lei,

³zai ziemmena misongga wang gu, zai acheu sa gu lei: “Wang lau, Tingwang gu kedeiloa ’mbe chu zu kei lei, Jakobbe Rapeu gu heki ge zeu; chidezai penui ’mpuî ramme anui je getei gai bei, zai pe gu ’mpuî ge anui tat le ra hangge zeu,” acheu zeu. Zaion gene hingde â zuapat ku, zai Jerusalem gene Tingwang gu sam zuapat kû daseu.

⁴Heram ramme kakge pa ne samram gu, zai ziemmena misonggame hangge samram’nzei gai gu lei; zai penui gu hiazutkie ramme ze heningpube kepeu ramme hang hekipat kai ’ndu, zai penui gu hengeu ramme ze ’ngkuaine ramme hang hekipat kai ’ndu lei, heram kat ne kêdabe heram peireige hiazutkie huachu gai dai ra mak lei, hereirabe hangge du penui geteiheli dai ra mak te lei.

⁵Hei Jakob ki gau, wang lau, Tingwang gu kebabe gene anui tat bam zu kei lei.

⁶Ning gu ziemmena Jakob ki ge nang â sâu gai ’ndi daseu, naimikpat ’mbia ne wangme, kemeu gekungme benai Philistinme gum ze hebadeiritpieme ne penui ruage puigittibe ziegeneu. Zai hesangme benai penui ba teiherua di de lei.

⁷Gechâk benai gepût ne penui dei luî puigit ti de lei, zai penui kaigekuagaibe bambetun gai ra ga di de lei. Hekun ramme ne penui dei ge puigit ti, zai penui gu timriang ramme ne sei kam lak bam di de lei.

⁸Penui dei ge heraluîtewbe ramme ne puigit ze bam di de lei, penui batâ ramme, penui ne chiamlube ramme je keikeu ze penui kakellum de lei.

⁹Chipauziegene ziemmena je tewhelêu gai bei de lei, zai ziemmena leine je tew’nchei gai ’ndi de lei— penui je lun-siak du se lau.

¹⁰Tingchu lung ’mbe gut te zu lau, zai Tingwang gu kehingbe ngaurabe gene, zai pa reziechibe gu pengêudibe masua gene kedeisîng ’mbe ’mbiagut te zu lau.

¹¹Ziemmena gu kakengangbe mikpie ramme tei’nnakeu gai gu lei, zai ziemmena leine dage gechî-keditewbe helêu gai gu lei; zai chipau mai ge â, Tingwang je runne teichu’ngngu gai gu lei.

¹²Baudime gu Tingwang ne chi pe gu tingnaimikpui ge â gechîrettewme benai ’ngngangsang ze bamme leine peireige, getuachu’ngngu gai ze bambe kau leine benai hutau ze bamdibe kau leine peireige,

¹³Lebanon gu kedarbang ramme hube riâ getualieng ze bambe ramme peireige, zai Bashan gu ’mpubang ramme peireige,

¹⁴hekaloa kehube ramme benai peloa kehube ramme peireige;

¹⁵heki leine peireige;

¹⁶Tarshis gu dui-’nneikuak ramme peireige, zai hechiâm peluiyibe leine peireige samram’ngkuigairabe mai bam gu lei.

¹⁷Ziemmena kedijaîtewbe ze tewhelêu gai gu, zai ziemmena gechîrettewbe tei’nnakeu gai gu lei, zai chipau mai ge â, Tingwang ji runne teichu’ngngu gu lei.

¹⁸Zai heraluîtewbe ramme ga- ’nzâuchiak tu de lei.

¹⁹Kedeirei je tewhingrim ra pa zuachu dezai Tingwang gu kehingbe ngaurabe benai reziechibe ngeudibe masua gene ’mbia le ra ziemmena tingchukâuki ramme benai kedeikuiki ramme ge gut ku lei.

²⁰Chipau mai ge kedeirei je tewhingrim ra pa zuachu dezai Tingwang marak ngaurabe benai pa reziechibe ngeudibe gene ’mbia le ra hangge ziemmena leine tingchukâuki ge benai hekâulim kakge gutchi le ra hangge henâmpui ramme benai heliam ramme suage penui ne gepût benai gechâk ne heraluîtew lu kakellumbe ramme ze peipat kai gu lei.

²²Pe nêuki gene pe chuilube kau, ziemmena dagene rimna de lau. Pa gumbe kau ’ndaikautau la ze lau?