Read Zeme Naga ISAIA 20 Bible Online

ISAIA 20 - Zeme Naga bible

ISAIA 20

¹Assiria heguang Sargon ne langgaipeu hereikangme gu besuitewpeu ne Ashdod ge wang lu ’nggi ze chi heram lu’ndibe tingkum ge,

²chipau ting ge Tingwang ne Amozbe na Isaiabe dage sam rang gai ze, “Tat chu lau, zai ning kia ge miseigiriapaî heipat ne lau zai ning pî gene ning pîchûp luakpat ne lau,” ze kacheu de lei, zai pa ne chigum ze tew gai de lei, pe pum pumlâng pe pîrua tat zeu—

³Tingwang ne sa ze, “A guâ ka’ngguapeu, Isaiabe ne Ijip benai Ethiopia peireige mâ ka’nchetbe teiliabe benai mâ chî ra tewliabe hangge pe pum pumlâng zai pe pirua kum chum tatruagaibeibe luigum ze,

⁴Assiria heguang ne Ijip benai Ethiopia gene pa ne kebang hang nîmlume je pa ne nguatat ku lei. Ijip ’ngngamrabe hanggene gechîng-hena penui dang letrang ze pumlâng penui pirua tatrua gu lei.

⁵Chidezai penui ne penui kahegiêbe bâm Ethiopia ziegene benai penui kaheguîbe bâm Ijip ziegene ’nningdaulak pelampeulak ze bam gai du lei.

⁶Zai chipau mai ge aipau sungkling kâm ge kelungme ne, ‘Pie le lau, Assiria heguangpeu dagene peize anui je lupat kai ra anui ne pakkaime bau zai anui ne heguî ze piekuame bau peireige aize wangchanggaibe kau de lei! Zai anui, ’ndaigum ze anui ’mbiapat le ra lau?’ ze acheu gu lei,” ze kacheu de lei.