Read Zeme Naga ISAIA 22 Bible Online

ISAIA 22 - Zeme Naga bible

ISAIA 22

¹Peningkâm gu mâ-teiliabe ngaube tedeu ge mâ-rangliabe. Ningnui heki’mpûm ’nzakchube ze ’ndaiherêu hang nung se lau,

²ningnui kuâ ’nrung-keleulia ze bamme, kebiengseng bambe namdi, lung’ntaza bambe hekuînâm gau? Ningnui gu ziemmena tewchatkai’ndime je hiazutkie ne tewchatbe mak lei, makchai kechaime ze herei gene chaibe mak lei.

³Ning gu samramme â pakpedumtat kam de lei, bai’mpi teimakbe luî gene penui je â nîm kam de lei. Ningnui kengaume bau kedeu ’mbe paktat ti leusede nîm kam ’nde lei.

⁴Chipauziegene I ne sa ze, “A dagene pie’nreitat te lau, a mikduihip ze hap kai ra pei lau; a gume na ’mpuimi je tew’ngga’ndibe hang I hapbe ge achu tumhereu se lau,” ze kacheu de lei.

⁵Hekua-kehetbeng bamrabe, kat-kat je kutgetie bamrabe zai pedap-kamgaiderabe baudime Rapeu, Tingwang gu tingnaimikpui kat lamui lei, peningkâm gu mâ-teiliabe ngaube kerie kedibe ramme sîmbabe benai kedeiloa ramme dage ka’nrungbe zeu.

⁶Elam ze timriang ramme benai hekunchingchuame dagene hetubung pung de lei, zai Kir zene pe gu hinggei hela teipatlia gai lei.

⁷Ning gu peningkâm heramyibe ze timriang ramme, zai hekunchingchuame ramme ne keriekemui ramme ge sappuiting ’nde lei.

⁸Juda gu dienambe ramme pa ne teitat ’nde lei. Chipau mai ge nang ’Nrêu gu Heki ge hereimerua ramme je nang pie gai de lei.

⁹Zai Dabid gu namdi gu kerie puttibe ramme misongga bambe ningnui ngau de lei, zai ’ngkang ’mbe dekua tewgaibe gene ningnui hedui puasi de lei,

¹⁰zai ningnui ne Jerusalem gu heki ramme riak sei gai de lei, zai namdi kerie getîng ra ningnui ne ningnui ki ramme rakeu gai de lei.

¹¹Dekuaki perie gu hedui letsi gai ra hang ’mbie kena kakge ningnui ne dekuaki hang teleu gai de lei. Kane ningnui ne chize tewgaipeu je pie gai mak lei, makchai tingtie besua’ngka gene chize ’ndamgai’ndipeu je ningnui ne mâ-hang du chak kai mak tai de lei.

¹²Chipau mai ge baudime Rapeu Tingwang ne hap ze heu ra, hepeî gut ze miseigiriapaî ne ba ra kû gai de lei;

¹³zai pie le lau, hesuiyi ze hesuiyi’nta ze, getumsei ramme benai meli ramme tewchat ze, hemei ji teu ze wain sak ze bam lei. “Anui â teu ze sak ze bam kei lei, ’nchuamai dezai anui â chai du daseu,” acheu zeu.

¹⁴Baudime gu Tingwang ne pe runne pe rasam ze a kun ge latlia ze: “Ningnui chai mak tâne ningnui je ai hemui-helut ze lun gai be ra mak lei,” ze baudime gu Tingwang ne kacheu de lei.

¹⁵Baudime Rapeu Tingwang ne aigum ze rang ze, “Chau lau nuai, kilûng ge mâ-ka’ngguapeu dilangpeu, Shebna dage tat ze acheu ze rang gai lau:

¹⁶Aige châu bam ze nang ’ndaitew ra aige bam lau, aige nang ne ning raw hang su ze ’nrei ’mbe heraw su ze nang bamrabe hang tingchu gia ze bampeu zeu?

¹⁷Pie le lau, Tingwang ne ningchu paileptua ’ndu lei, Hei nang ning ranchipeu gau. Pa ne ningchu teitit ’ndu lei,

¹⁸zai ningchu teikezit’nrui-rui lu ze heram peza kedibe bâm ’mbe mâ-pum ’mpumpluibe je gum ze ningchu keliam gai gu lei; chige ze nang chai gai gu lei, zai chige ning gu timriang yi-kadesangbe tuâbamdibe zene ning pau ki je nang tew’ngngamgairabe zeu.

¹⁹Nang mâ-tâtewbe ki gene I ne ningchu chaktuakpat kai bu lei, zai nang bambe bâm gene ningchu tuâkeu gai bu lei.

²⁰Chipau mai dezai Hilkiabe na Eliakimbe, a guâ ka’ngguapeu je I ne ku lu,

²¹I ne ning puâ ze pechu luak kai gu lei zai nang rezieteibe pe ba ge pei gai ’ndu lei; dezai pa ne Jerusalem ge kelungme benai Juda kiduîme peu chang gu lei.

²²Dezai pe keîtoa ge Dabid ki gu chabi I ne ’ngking gai gu lei; pa ne latpat kai gu lei, zai mî ne de kainam ra mak lei; zai pa ne kainam gai gu lei, zai mî ne de latpat ra mak lei.

²³Zai pebâm kabesingbe ge ’ntunggiabe gum ze I ne pechu tew’ntiprip kai gu lei, dezai pa ne pe peu kiduîme hangge pengêudibe heguang-bamrak hang chang gu lei.

²⁴Zai penui ne pe dage pe peu ki gu kerit-ritbe ramme ’nchie gai gu lei, pe haîhikme ramme, heluîbuane ramme, helirua kecheibe ramme, hepiak gene chu ze mâ-bung kedibe riâ chang zeu.

²⁵Chipau mai ge pebâm kabesingbe ge ’ntung gia’ntipkai’ndibe ze betun hang chang ta gai du lei; zai chize kuî gai bei ze kâukeu du lei, zai chige mâ mâ-keritbe bambe ze chigene lutua ’ndu lei ze baudime gu Tingwang, Tingwang ne rang lei,” ze kacheu de lei.