Read Zeme Naga ISAIA 23 Bible Online

ISAIA 23 - Zeme Naga bible

ISAIA 23

¹Tira tedeu ge mâ-rangliabe. Lungsittew du lau, Hei Tarshis gu dui-’nneikuak ramme gau, Tira â heki du, zai ’nneikuak saube bâm du sia kam di ze mâ de ga de lei! Sipraram gene chiramme penui je pauliârit kai de lei.

²Rim ze bam gai lau, Hei heduiluaka’nggua ge kelungme Sidon gu helîkahedetme ramme gau; ningnui gu helîkahedetme ne sungkling ka ze,

³teiwang dangsanggaibeime gau; ningnui hangge Nail geukung ge helugatbe chêu gene pelâp teiwangbe ngaume gau; ningnui ze heramzatme hang helîkahedetbe kau de lei.

⁴Hei Sidon gau, sungkling zene sagaibeibe, sungkling gu dieguabe zene: “I ne mâdau de henalungbe geteube ted lie gai mak, zai mâdau de henalung gai mak, I ne mâdau de rehangme je ’nsichu gai mak, zai heleume pumsanggeî pungme je tei’nsichu gai me lei,” ze acheu sagaibeibe ziegene ’ngngam ze bam zu lau.

⁵Aipau sam ze Ijip ge pauchang dezai, Tira rasam peireige penui ne penui lung hereu gu de lei.

⁶Tarshis dage katat dai ze, helungsittew du lau, Hei heduiluaka’nggua ge kelungme gau!

⁷Aipau namdi ze ’ndâ ting gene bamkuâdibe, kedeu ’mbe lung ra pe pî kena ne pechu pungtatbe namdi ze ning lungsuiyika’ntabe namdi de mei?

⁸Heguangpeichûp ramme peipatkaibe namdi, pe gu helîkahedetme ne heguangsinme chang ze bambe, pe gu ziemmena mâ-merua zuame je kedeirei ne hengêutew ze bambe, namdi Tira peireige châu ne aize ’mpungpat kai bei lau?

⁹Chize Tingwang ne ’mpungpat kai de lei, kahegiêbe pegutpattibe ze tewhebâ gai ra, kedeirei ge miramme ne hengêutew ze bamme je tew’ncheirabe hanggeneu.

¹⁰Ning ram ge Nail geuki gum ze lua’nniâmba tatchu lau, Hei Tarshis na ’mpuimi gau; mâ de namrabe bam ta de lei.

¹¹Pa ne sungkling peirei pe ba getuapat kai bei de lei, pa ne heguangram ramme gechuî’ngngai gai bei de lei; pe gu keriengdi ramme tew’nsia gai ra hangge Tingwang ne Kanaanme tedeu ge samde pei gai bei de lei.

¹²Dadege pa ne sa ze: “Nang ning suiyi ze ’nsumchai ta du de lei, Hei kagetedbe liepui, Sidon na ’mpuimi gau; chu le lau, Sipra ’mbe kapat ze chige du nang gesaube ngau ra mak lei,” ze kacheu de lei.

¹³Pie le lau, Kaldiame ram zeu! Aime bau de lei; chize Assiria mak lei. Penui ne Tira je â mârekaune hang chaupat kai lei. Penui ne penui gu herei gu mâ-kaira kehube tewchu gai de lei, penui ne pe gu heguangki ramme tew’nsia gai bei de lei, penui ne pechu tew’nsia kam gai bei de lei.

¹⁴Lungsittew du lau, Hei Tarshis gu dui-’nneikuak ramme gau, ningnui gu keriengdi ramme â, tew’nsia kam gai ’ndi daseu.

¹⁵Chipau mai dezai â, heguang hangkat ting ge gum ze kum riaksena Tira je â chitazîng bam du lei. Tingkum riaksena kam gai dezai Tira hangge pepumzuateupui gu heleu ge bambe gum ze wangchang gu lei:

¹⁶Chige, “’Nrabung tei le lau, namdi tatrua gai lau, Hei miramme ne chîtadipui pe hepumzuateupui gau! Seuyibe kuâ ramme tewdiampat kai lau, heleu misongga tew gai lau, chidezai peize ningchu ’nningdau gai be ra hangge zeu,” acheu ze tewbe zeu.

¹⁷Tingkum riaksena kam gai dezai, Tingwang ne Tira ’ngkiâwang gu lei, chidezai â, chipaupui (Tira) ze pa tâtewbe ge helatwang dai gu lei, chidezai kedeirei ge heguangram ramme leine dage pa hepumzuateube tâ tew gai gu lei.

¹⁸Pe gu helîkahedetbe tâ tewbe benai pe tatew zat ze Tingwang dage peipat’nchi gai gu lei; chize gekua’ndui gai ra mak lei, kane pe gu helîkahedetbe tâtewbe zene Tingwang masuage kelungme hangge hetak misongga bam ra peipat’nsui gu lei.