Read Zeme Naga ISAIA 24 Bible Online

ISAIA 24 - Zeme Naga bible

ISAIA 24

¹Pie le lau, Tingwang ne kedeirei je tew’nsia gai lu putzîng gai gu lei, zai kedeirei ju ze tewterettet kai lu chige kelungme je kumrariptua kam ’ndu lei.

²Penui châm sua ta di ze ’nzuâ kam bam du lei; baudime ne tingkupeu gum; bepau ne kebang gum; bepai ne tâka’ngguapui gum; kezuapeu ne keluipeu gum; kahepukpeu ne hepukkaipeu gum; hepâu hang peigaipeu ne hepâupungpeu gum ze bambe zeu.

³Kedeirei ze tew’nsia kam gai lu kebambe ramme ze ruitat tu lei; Tingwang ne aipau sam ze sa gai ’ndi daseu.

⁴Kedeirei ne heu ze hap kai lu kîkeruî bam di, kedeirei ze hegui gai di ze kîkeruî bam di de lei; tingkehube zene kedeirei benai kî’nsam gai di de lei.

⁵Kedeirei ge kelungme zene kedeirei je tewhebâ gai de lei; penui ne hingde ’ngka, hingde rawdiakkaibe ramme tew’nsia, betundaimakbe samhatkaibe tewka’nsiabe ziegeneu.

⁶Chipauziegene mâ-desetkaibe zene kedeirei je ruiteu de lei, zai chige kelungme ramme penui runne penui mâu-miê ziegene kahereube lie de lei; chipauziegene kedeirei ge kelungme je rûka’nsia de lei, zai ziemmena gechâmne runne ’nsak kai de lei.

⁷Wain kadesui lei, grepchîria heguikeu lei, helungka’ntabe lung leine zene penui chuiluhi-hi gai lei.

⁸’Nsum-’ntoî ’ntuka’ntabe ’ncheu sauzîng gai de lei, misuiyibe keduîbe kuâ ramme pat ta de lei, ’nrabung gu misuiyibe sauzîng gai de lei.

⁹Leutew ze wain sakbe gakeu de lei; wain peranchibe sakyibe sakme hangge karî gai de lei.

¹⁰Mâ de gadibe namdi ze â tew’nsia gai ’nde lei, heki ramme leine ’nsangdu peize mî de gutchi lak ra kainam gai ’nde lei.

¹¹Puidi ramme ge wain gadibe ziegene ’nrungriau bam lei; hesuiyibe zat leine hangge hegî ting chang gai di de lei; kedeirei suiyika’ntabe ze tat kam di de lei.

¹²Namdi ge tew’nsiagaibeibe runne ’nsak kai de lei, keriekemui ramme lak’nsia kam ’ndi de lei.

¹³Aigum ze kedeirei zuilung ge benai heramzatme ruage wangchang gu lei, olibchî rai ze kelakrit’ndibe chângge gum, grepchî rai’ndibe chângge gepiewangkadaibe luage gum zeu.

¹⁴Penui ne penui kuâ ramme ’nrungchu gai de lei, penui suiyi ze heleutew gai lei; Tingwang pengêudi ze bambe hangge tingrun ’mbene penui ka’ngkiak lei.

¹⁵Chipauziegene tingbia ’mbia bamme ne Tingwang dage pengêudibe pei gai lei; sungkling duiluaka’ngguabe dei ge bamme ne Israelme Rapeu Tingwang ji ge pengêudibe pei gai lei.

¹⁶Kedeirei tingmik ’mbene getoabe leu kuâ ramme anui seu lei. Kapelingpeu Hangkat dage pengêudibe leu tewgaibe kuâ zeu. Kane I ne sa ze, “I liekua lak te lei, I liekua lak te lei. A duângga de lei! Mi choâsiame ne mi choâsiabe tak tew lei, mi choâsiame ne mi choâsiabe tak tew lei,” ze kacheu de lei.

¹⁷Mi kehingbe, Hûm, zai ’mpia ze â ning peireige la de lei, Hei kedeirei ge kelungpeu gau!

¹⁸Mi-mige mi kehingbe kuâ gene pakbe kau â, mâ-kuiki ge keu gai gu lei; zai mi-mige mâ-kuiki gene ’nzakchube kau â, ’mpia ge mi gai gu lei. Tinggîm leubaki ramme lat kai kam ’ndi daseu, zai kedei gu pedimpung ramme gechuî’ngngai gu lei.

¹⁹Kedeirei je â tew’nsia ’nde lei, kedeirei je â dâupedak ’nde lei, kedeirei je â gechuî’nrui gai bei de lei.

²⁰Kedeirei â kameneupeu gum tatkeliangsiang la de lei, ketadau ki gum kenuklia la de lei; pa hedieka’ngkabe zene pechu tewritsit kai bei de lei, zai chize kâukeu di de lei, zai chize chu dai ra mak te lei.

²¹Chipau mai ge Tingwang ne tinggîm sipai baudime je tinggîm ge tewsâ gu lei, zai kedeirei ge heguangme ramme je kedeirei ge tewsâ gu lei.

²²Penui mâ-kuiki ge kebangki ge bambe kau ramme gum ze wang’ndui gu lei; penui je kebangki ge bangnam gai ’ndu lei, zai bechâng dezai penui je tewsâ gu lei.

²³Chidezai hekêu ze keleu gai du lei, zai tingnaimik ze ’ngngam gai du lei; baudime gu Tingwang ne Zaion Loa ge benai Jerusalem ge heguang chang ze samram gu daseu, zai pe gu gechîngme masuage pe gu pengêudibe teilia gu lei.