Read Zeme Naga ISAIA 25 Bible Online

ISAIA 25 - Zeme Naga bible

ISAIA 25

¹Hei Tingwang gau, nang â a Rapeu de lei; I ne ningchu toa’ndi gu lei, I ne ning ji toa gu lei; nang ne mi ningdaulakbe tâ ramme ’ndâ gene ’nningpatkai’ndibe gesangsing gene tew gai bei de lei.

²Nang ne namdi ze kua’mpum bam ra tew gai bei de lei, namdi ka’ntipbe tew’nsia gai bei de lei; hesang heluîchimakme gu heguangki, namdi ze â ga de lei, chize mâtew-tewsedu tewchu dai ra mak lei.

³Chipauziegene hezat ramme peranchime ne ningchu hengêutew gu lei; katîmphibe heramzatme gu namdi ramme ne ningchu hing ze bam gu lei.

⁴Nang ne kelaksiame hang keriengdi kedibe, kegabe kau pa pe duânggabe ge keriengdi kedibe, zai tingkaichibe ge ka’nseube bâm benai kelumbe ge diesungbe bâm hang chang bei de lei,

⁵gechangbe bâm ge kelumbe bambe gum zeu. Nang ne hesangheluîchimakme gu kakebiengbe kuâ ramme zin’ngga gai lei; tingnaichiêchibe je kemâu ne sung gum, katîmphime gu heleu ze tew’nsaumang gai bei de lei.

⁶Aipau kedeiloa peireige baudime gu Tingwang ne mâ-mâ teuyibe zat ramme teu be, wain lîng ne sakbe, pa’ngkingyibe hemei benai wain yibe ne luube-teseu hang kateleube ze hezat gechâm-châmme hangge teleu gai gu lei.

⁷Zai hezat gechâm-châmme peireige kechaipaî ramme tuâgaibe benai heramzatme ramme peireige lîmnambe paî tapkaibe ze aipau kedeiloa peirei gene pa ne tew’nsia gai gu lei.

⁸Pa ne kechaibe je betingbeta hang ’nzua ’ndu lei, dezai heju leine ge hemikdui bambe ze Hera ne nuitua gai gu lei, zai pe gume ne ka’nrube sam ze kedeirei gene pa ne lutua ’ndu lei; Tingwang ne sa gai ’ndi daseu.

⁹Chipau mai ge acheu ze sa gu lei, “Pie le lau, aize anui Rapeu de lei; pa ne anui je tew’nring gai ra anui ne pechu kuâ bam de lei. Aize Tingwang de lei; anui ne pechu kuâ bam de lei; pe gu tewka’nringbe ge anui suiyi ze mi suiyi’nta ze bam kei lei,” ze acheu zeu.

¹⁰Aipau deiloa peireige Tingwang ba bam bam gu lei, zai Moab je â pa bambe bâm ge kutgetie gai gu lei, hebâ kuiki ge megau ramme kutchimgaibe gum zeu.

¹¹Hezai-zakpeu zene hezai-zak ra pe ba kena ’ngkappat kai gum ze aipau zuilung ge pa ne pe ba kena ’ngkappat kai gu lei; kane pa kahegiêbe benai pe ba ne mâ-mâ tâ ramme tewchibe luakatne chi kena ze Tingwang ne tei’nnakeu gai gu lei.

¹²Zai pe gu kerie ramme tewbesinggai’ndibe ze pa ne tei’nnakeu gai gu lei, zai kedei ge ’ngngaîkeu tuâniang gai gu lei.