Read Zeme Naga ISAIA 26 Bible Online

ISAIA 26 - Zeme Naga bible

ISAIA 26

¹Chipau mai dezai aipau leu ze Judaram ge tew gu lei: “Anui gu namdi peranchibe kat la lei; ’mbie ramme benai kerietau ramme gum ze pa ne tewka’nringbe teichu gai bei de lei.

²Keriekemui ramme lat kai lau, chidezai pelingtewbe heramzatme lungsangteime gut le ra hangge zeu.

³Mige ningchu ’nnumtewbe ziegene ning peireige pe lung bambe kau je nang ne reîzun reî bei lei.

⁴Betingbeta Tingwang dage ’nnumtew bam lau, Tingwang Hera â betunmakbe tingchutum chang daseu.

⁵Namdi rehuhiebe, kehube bâm ge kelungbe kau ramme je pa ne teikeu’nna gai bei de lei. Pa ne kedei ge teikeu’nna gai bei de lei, teikeu’nna gai bei de lei, chize tuâkeu ze tuâniang gai bei de lei.

⁶Chize mi pî ne, kelaksiame pî ne, kegame ne ka gai ze chaîkagesip te lei,” ze acheu tew zeu.

⁷Mâ-pelingtewme gu ’mpuî â pebâm bekâmyibe kau lei; mâ-pelingtewme gu ’mpuîki ze nang ne teleu’ndiau gai lei.

⁸Nang samrambe ’mpuî ge, Hei Tingwang gau, ningchu anui ne kua lei; ning ji ’ngngaîdailakbe ze â, anui keringbe zene ka’nchâbe lei.

⁹Tingmuîzeu ge a keringbe zene ningchu ’nning ze heguî-desang bam lei, a lungsui zene ningchu lungsangsing ne peu de lei. Ning gu samrambe ramme kedeirei ge bam dege kedeirei ge lungme ne mâ-peling ze chi daseu.

¹⁰Helungriaksiame je ngauka’nggiabe teilia gai bei dege pa ze mâ-peling gesang peu mak lei; mâ-pelingtewbe heram ge helungriaksiabe tak ne pa tâtew lei, zai Tingwang ngeudibe deze peu mak lei.

¹¹Hei Tingwang gau, ning ba â teigetuachu gai bei de lei, kane penui ngau mak lei. Ning gume hangge ning rai-lielakbe ze peize penui je ngau le lau, zai peize ’ngngam ze bam lau. Ning teureime hangge hemi bambe zene peize penui je rû’ngga ne lau.

¹²Hei Tingwang gau, nang ne anui hangge desieyibe lungkatemibe tew’ntip kai gu lei, nang ne anui tâ ramme leine anui hang tew gai bei de lei.

¹³Hei Tingwang anui Rapeu gau, ning runne mak ze hera kêdabe ramme ne du anui peireige heguang gai de lei, kane nang ji runne anui ne chi lei.

¹⁴Penui â kechaibe kau lei, penui â ring ra mak lei; chi betun-gaibe riâ nang ne penui dage wang ze tew’nsia gai bei de lei, zai penui dage mâ-chiteibe nang ne lutua kam gai bei de lei.

¹⁵Kane nang ne heramzatme je tewpung gai bei de lei, Hei Tingwang gau, nang ne heramzatme je tewpung gai bei de lei; ningchu â hengêutew’ndi gai bei de lei; nang ne heram gu heramrai leine tewkengâ’ndi gai bei de lei.

¹⁶Hei Tingwang gau, mi duânggabe ge penui ne ningchu peu de lei, nang ne penui je kedeibe peibe luage penui kellum ze ruîpat kai de lei.

¹⁷’Mpuimi pegunpungbe kau, pa henalungrabe ting chang di ’nra’nsua ze ’nniarua ze ka’nrung gum ze, anui â, Hei Tingwang gau, ning ziegene chigumbe riâ ge bam de lei;

¹⁸anui ’mpung di de lei, anui ’nraka’nsua de lei, anui ne mâ de lungkeu mak lei. Anui ram hangge anui ne mâ de duîwang gai me lei; anui ne mâ de tewpui gai me lei.

¹⁹Ning gume chaidime ring gu lei, penui pum ramme zuachu gu lei. Hei kedeiniamoîne ge bamme gau, ’nrakchu lu hesuiyi ze leutew lau! Ning gu kezikdui â kebabe gu kezikdui de lei, zai kezui kauwangberam ge chize nang ne tewkeu gai gu lei.

²⁰Wang lau, a gume gau, ning kisîam ramme ge gut chu lau, ning chaige ’ngkam ramme kainam gai ne lau; pe lumpumbe tuatat te mak tâne kecheîne ’mbaikua lau.

²¹Pie le lau, Tingwang â pe bâm gene pat mui de lei, kedeireime penui hemui kesiabe tâtewbe hangge penui je tewsâ ra hangge zeu, zai kedeirei ge hejai tewpatkaibe kedeirei ne teilia gai gu lei, zai kedeirei ge gîchatkaibeibe ramme teikebai ta du de lei.