Read Zeme Naga ISAIA 27 Bible Online

ISAIA 27 - Zeme Naga bible

ISAIA 27

¹Chipau mai ge Tingwang ne pe gu hiazutkie Kechibe zai tâtewchibe zai peranchibe zene Lebiathan pakchibe henêu, Lebiathan keguai ze bambe henêu je tewsâ gu de lei, zai pa ne sungkling ge bambe dragon je tewchat kai gu lei.

²Chipau mai ge: “Grepchî hiâm kat yi-kadesangbe zene chi je leutew gai de lei!

³I, Tingwang zene ai je kereîpeu lei; I ne aize hedui zuâbam-bambe kau lei. Makchai â mige ne mâ-tewkeleu gai gu dadegeu, I ne chize tingmuî tîngna reîkua de lei;

⁴I mâ de a râtabe ga lei. A laî tewpat kai ra hetu benai hetupat bam be lei makchai ai! I ne penui peireige tew gu lei, I ne penui je rû’ngga kam ’ndu lei.

⁵Kane peize penui a dage ’nseu le lau, a dage peize penui nguadesieyi le lau, a dage peize penui nguadesieyi lau.”

⁶Bechâng dezai Jakobbe hingbang gum ze pema zangpat ku lei, Israel ne pe pâ papat ze pengûmne ramme duareupat ku lei, zai pechî zene kedeirei luî ’nchipuiting gai gu lei.

⁷Pa ne miramme je bêu gum ze penui je pa ne bêu gai mei? Makchai penui je tewchatme je gum ze penui je tewchat kai mei?

⁸’Nsapzun lu ze penui je nang kelipatkaibe gene Nang ning lungwângchang gai de lei; tingbia ’mbia gu tingkai peranchibe pe lumpumbe gene guibe mai ge pa ne penui je lutua kam gai bei de lei.

⁹Chidaze aigezene Jakobbe gu kemaube ze lunkamgaibe hang chang ra de lei, zai aize ne pe gu hemui lutuagaibe rachî hang chang du de lei: Herâtewbe gu tingchu ramme je pa ne tingniamchu riâ gekêuniangpat kai be ze Asherah luî hang tewbe tingchutum mei, makchai mâ-perîmyibe rube-kaira mei ze pa ne tei’nsap kai ta di dezai neu.

¹⁰Namdi bambesingdibe ze pe runne zîng la de lei, chige kelungme ramme je â put kai ze sâuzîng gai ’nde lei, hênam gechangberam gum zeu; chige getumseipoine kadeteu lei, chige pa jeikelakau gai de lei, zai mâ-bangneu ramme tegiteu de lei.

¹¹Pekiâng ramme chai di dege, chiramme ze bet kam di de lei; ’mpuimi ramme ne wang ze chiramme zene hemitew’ntau gai de lei. Aime ze â mâ-yi ra sia ra chimakbe kau ramme de lei; chipauziegene chiramme tewgaipeu ne penui peireige ngau’nggia gai ra mak lei, chiramme teleugaipeu ne penui je ngau’nchâ gai ra mak lei.

¹²Chipau mai ge Euphrates geuki gene Ijip gu ’Nggeuki riâ chang ze Tingwang ne chêu misongga neipat kai gu lei, dezai ningnui ne chiramme pumkat-kat ze kuai’ndui gu lei, Hei Israelme gau.

¹³Zai chipau mai ge hegeîluîkie kedibe ’mmut kai gu lei, chidezai Assiriaram gene gagaidime benai Ijipram gene kelipatkaibeime ne Jerusalem ge kedeiloa ka’nchibe peireige wang ze Tingwang je kellum gu lei.