Read Zeme Naga ISAIA 28 Bible Online

ISAIA 28 - Zeme Naga bible

ISAIA 28

¹Ephraim ge kameneume gu kahegiêbe heguangpeichûp hangge pausiabe wangchang gu lei, zai wain ne duî ze bamme gu keheube peningkâm gu bepeî ge bambe mâpâ pengêudibe peluîyibe huikeudibe hangge pausiabe wangchang gu lei!

²Pie le lau, heguang gu hangkat tâtewchibe benai peranchibe kau la lei; mâ-tewka’nsiabe tingkaichibe, desak ruibe gumbe, tingsim kedibe, mâ-mâ teika’ntîbe tingrui zat gumbe ze pa ne kedeirei ge pe lumpumpat ze tuâ gai gu lei.

³Ephraim ge kameneume gu kahegiêbe heguangpeichûp ze chaîkeniak kai gu lei;

⁴zai keheube peningkâm gu bepeî ge bambe mâpâ pengêudibe huikeudibe ze tinglum ting suage ’mbeuchî meipatraibe gum ze chang gu lei: Chize ziemmena hangkat ne ngau lu ze pe ba ge kaigap kai dege teu’ndibe zeu.

⁵Chipau mai ge baudime gu Tingwang ne pengêudibe kraun chang ze bam gu lei, zai pe gume ’nsakpatme hangge heguang gu mâpâ-riagua pa ne chang gu lei;

⁶zai samrambe bâm ge ka’ntaube kau hangge pa ne samram ka’nzeibe lungsui peipat’nsuirabe hang chang gu lei, zai keriekemui ge herei’ngngînguttime ran hangge pa ne chang gu lei.

⁷Aime ze du wain gene ’nzit-ri ze bam, zai wain peranchibe sakbe gene tatkezitliang ze bam lei; tingkupeu benai kemeu’mpeu ze wain peranchibe sakbe gene ’nzit-ri ze bam lei, wain gene penai â mâ-hî chî ta di de lei, wain peranchibe sak’ngkie lu ze tatkezitliang bam lei; mâ-keliâbe ge penai mâ-tewmau ze bam lei, samrambe tâtewgaibe ge mâ-’nsui lu ze kau ra ran-ran gai di lei.

⁸Mâ-kaira ramme ge ’nruîhuakchuak kai bei lei, mâ-kahebâbe-rai tewteragaimakbe bâm mâ de ga di de lei.

⁹“Châu dage pa ne mâ-geteilia gai ra lau, zai châu je mâ-sam rangkeli’nchichiak kai ra lau? Hetung gene chakpat’ndime, tungdui tungtadime dage ra mei?

¹⁰Aigumrabe sie, aigumrabe sie, aigumrabe sie, aigumrabe sie, aipau luî-luî, aipau lui-lui, aige kecheîne, chige kecheîne, chize acheu di daseu,” ze kacheu de lei.

¹¹Mak lei, ziemmena penui mui gechâmme, zai penui sam gechâmme dagene Tingwang ne aime dage sa gu lei,

¹²“Aige saukatemibe lei; keleime je sau ra pei lau; zai aize bamkatemibe kau de lei,” ze pa ne acheu ze sagai’ndime bau dage zeu; acheusedu penui ne seunei ra mak lei.

¹³Chipauziegene Tingwang gu sam â penui hangge, aigumrabe sie, aigumrabe sie, aigumrabe sie, aigumrabe sie, aipau luî-luî, aipau luî-luî, aige kecheîne, chige kecheîne, kacheube hang chang gu lei, chidezai penui tat ti ’ncheihia ze kau’nsia ’ndu, zai ’mpia ge mi gai bei ze tuîtat tu lei.

¹⁴Chidaze ningnui kehichime gau, Tingwang gu sam ’ngking le lau, Jerusalem ge aime baudime peireige ningnui samramme bau zeu!

¹⁵Ningnui ne, “Kechaibe dage anui ne samhatbe tew lu de lei, zai Kechaiberam dage anui ne hesuî-hezuâ lu de lei; lakkakegitbe heria kegitgetie ze wang dezai chize anui dage wangtâu gai ra mak lei; anui â mâ-karasatewbe bâm ge anui ’mbaibâm hang tew gai lu, zai mâ-gesangsingmakbe gene anui â anui ’nseubâm hang tew gai lu daseu,” ze kacheube ziegeneu;

¹⁶chipauziegene Tingwang ne acheu ze rang lei, “Pie le lau, I ne Zaion ge pedimchukâng kai lei, hedazunlube chukâng, pemikchukâng pemîhungbe, pedimpung hangge dausingrabe: ‘Mige pechu ’nnumka’mmibe kau â, ’mmitkeu di ze bam ra mak lei,’ kacheube zeu.

¹⁷Zai mâ-gesangtewbe deze I ne mâ-ka’ndeube heria hang tew gai gu lei, zai mâ-pelingtewbe deze I ne mâ-’ndîng ka’ndeube heria hang tew gai gu lei; zai mâ-karasatewbe kacheube bâm gu ’mbaibâm je desak ne biaktua ’ndu lei, zai ka’nseubeki ze hedui ne luachûm ’ndu lei,” ze acheu zeu.

¹⁸Chidezai ningnui ne kechaibe dage samhatbe tewgaibe ze tew’ngga ’ndu lei, zai Kechaiberam dage ningnui ne hesui-hezuâgaibe sapgim ra mak lei; lakkakegitbe heria ne kegitgetie-wangbe mai ge chize ne ningnui je lakkegitkau gai bu lei.

¹⁹Chize patdau tânege ningnui je tei’ntîtat ze bam gu lei; chize ’nrîmbeting gene tingmuî riâ hang hechua-hechua ge pat ku lei; chi paugaibe sam ze â chîkiâku ta du de lei.

²⁰Chi jeî ze â hangkat ne pe pî ’ntakeutâulak lei, zai bajei du chei ze hangkat du bâ-tâulak lei.

²¹Tingwang ne Perazim Loa’ntûm ge pa chu gum ze chu gai gu de lei, Gibeon ge pa ne pe lumpum gum ze pa pe lumpum gai gu de lei; patatew zat tew gai ra hangge— patatew zat â châmcheîbe zat lei! Pe gu tâ tew gai ra hangge pe gu tâ ze â, chi-meluisuibe zat lei!

²²Chunage chidaze kehi ta zu lau, makchai â ningnui gu kebangria ze keî’mmi ze keî’ntip kai bei ta du lei; baudime gu Tingwang dagene kedeirei luî tew’nggarabe gu âza rasam ze I seu de lei.

²³Ning kun ’ndualie gai lau, zai a kuâ seu gai lau; I samsabe ’ngkinggai’mmi lau.

²⁴Hetâ-ta ra kedeipube kau ne sau mak ze kedei pu bam mei? Pa kedei ze lupat ze pa’nria kebaubang ze bam bam mei?

²⁵Pa ne chi kedei ze kedai’nsamrap kai lu dezai, pa ne hechichêu (heleichêu) hechi ze ’nruk kai mak mei, kummim (gimung) ze sâu gai mak mei, kedei pa’nria kakebaube ge dekuîmeu kai ze pebâm-pakezei pie ze barli kai mak, zai helupuahia ge âwatui kai mak mei?

²⁶Pechu â betak getei’mmizun gai bei de lei; pe Rapeu ne pechu â geteilia de lei.

²⁷Hechi â chêu lakbe hingbuak ne lak mak lei, zai kummim (jira) â timriangpigua ne neipat mak lei; kane hechi â hetui ne lakpat lei, zai kummim â hegeîtui ne lakpat lei.

²⁸Hangkat ne chêu ze niakpup kai mei? Mak lei, betingbeta pa ne chêu ze nei bam me lei; pa ne pe gu hekun ge timriangpigua kai lu chize kereika’ngngaibe luage, pa ne chize niakpup kai mak lei.

²⁹Aize du baudime gu Tingwang dagene wang de lei; pa â mâ-nguageteiliabe tak ge mi ningdaulakbe kau lei, zai kaningchingbe tak ge yi-kadesangbe kau lei.