Read Zeme Naga ISAIA 29 Bible Online

ISAIA 29 - Zeme Naga bible

ISAIA 29

¹Ariel, Ariel, ning hangge mi duângga-desang lei, Dabidbe ne bamgaibe bâm zeu! Patingkum hangge patingkum kaisuâ gai be lau; peize kahengîbe ze hengî lu hengî wang dai, hengî lu hengî wang dai ze bam lau.

²Acheuleusedu I ne Ariel je tewhereu gai gu lei, zai chige mi duânggabe-huaî huaibe benai kehapbe bam gu lei, zai pa ze a hangge Ariel gum chang gu lei.

³I ne ningchu ’nggi ze bamguâ ’ndu lei, zai ningchu heki kehube ramme ne tewguâ gai gu lei, zai ningchu herei chumwang ra tew gai gu lei.

⁴Kedeisîng chukbe gene nang samsa gu lei, kedei ge kedeiniamoîne gene ning sam ramme pat ku lei; ning kuâ ze kedei gene kechaime herui kuâ gum pat ku lei, zai nang samsabe ze kedeiniamoîne gene ’nsiamtelum ze bam gu lei.

⁵Ning teureime baudime ze keramoîne kecheîne kau riâ hang chang gai du lei, zai katîmphime baudime ze chêuriepum liampatbe gum chang gai du lei. Nakkaizaine, luakatne,

⁶ning dage tingcheibe benai kedei-kaketeibe hekuâgechibe, natri benai heratingkai, zai mâ-rûka’nggabe hemimelei gene baudime gu Tingwang ne tâtew-wang gu lei.

⁷Zai heramzatme baudime Ariel je ka’nggime, pa benai pe gu keriengdi ramme je ka’nggime leine benai pechu tewhereugaime ze mi mang gumbe, tingmuî ge mâ-keliâbe ngaube gum chang gai du lei.

⁸Mihangkat (tak) ka’njei kau ne pa takteube pe mang’mmi ze pa ’nrakchu dege ’nggeu mak laleube gum, makchai (hedui) kaherei kau ne pa hedui sakbe pe mang gene ’mmi lu pa ’nrakchu dege pe jiesia, zai pa kahereibe meu gai mak laleube gum ze heramzatme baudime ’nteumena Zaion Loa je ka’nggime leine chigum bam gu lei.

⁹Ningnui runne ningnui peî ge mâ-ka’nningbe tew’nsia gai lu mâ-hî du chîta di bam du lau, ningnui runne ningnui mik tewchit lu hemikchit ze bam du lau! Meneu lau, kane wain ge mak zeu; tatdaulak kezitliang bam du lau, kane hezau peranchibe ne mak zeu!

¹⁰Tingwang ne ning peireige jeichibe tak ruîpat kai bei de lei, zai pa ne ningnui mik ramme kebachim gai bei de lei, chize kemeume ramme zeu, zai pa ne ningnui peî ramme ruichim gai bei de lei, chize mâ-kengaume kemeume ramme zeu.

¹¹Ai pelane gu mâ-keliâbe kengaube ze leisikuak gu sam ramme mâ-kaunamgai’ndibe gum ze ningnui hangge chang du lei. Chize kiâchiduibe kau hangkat je, “Aize kiâ lau,” ze ziemmename ne pei gai dege pa ne, “I kiâchi lak lei, chize mâ-kaunamgai’ndibe ziegeneu,” kacheu de lei.

¹²Zai kiâchilakrabe kau hangkat je, “Aize kiâ lau,” ze penui ne pei gai dege, pa ne, “I kiâchi lak lei,” kacheu de lei.

¹³Dadege Tingwang ne sa ze, “Aime bau ze penui lung a dagene deu ze bambe luage penui mui ne wang’nna ze penui mui ne achu hengêutew lei, zai penui ne achu kehingbe (kakellumbe) ze ziemmename ne diegaibeibe ziegene de lei;

¹⁴chipauziegene, pie le lau, aime bau dage mâ-ningdaulakbe tâ ramme I ne tew gai dai gu lei, ’nningdaulakbe benai hesuiyibe mi ningdaulakbe zat zeu; zai penui gu ziemmena kaningchingme gu kaningching be ga gai gu lei, zai mâ-keyi-kesia chime gu mâ-keyi-kesia ’nningchibe ze â, tei’mbai ’ndu lei,” ze kacheu de lei.

¹⁵Penui gu mâ-gechîbe bangpui Tingwang dagene ’mbai’nchuktime hangge pausia gu lei, penui tatew kemuîbe ge bamme, “Châu anui je ngaukâ la lau? Châu anui je chikâ la lau?” kacheume bau zeu.

¹⁶Ningnui mâ-mâ ramme tewkakedet lei! Hegamli kateleupeu je depungkâng hang ’nning gai ra mei; chiampatkaibeibe zat zene gechiampeu je, “Pa ne achu chiam gai me lei,” acheu ra hangge zeu; makchai ’ndampatkaibeibe zene pa ka’ndampeu je, “Pa â mâ-gechîbe mâ de ga lei,” ze acheu ra hangge zeu?

¹⁷Lebanon ze mâ-mêrayibe kedeibâm chang gai de ra, zai mâ-mêrayibe kedei ze hênamchukbe hang chak kai ’nde ra pehî kecheîne runne la di de mak semei?

¹⁸Chipau mai ge gepangme leisikuak gu sam ramme seu gu lei, zai penui hangge muîhambe benai kemuîbe gene mikchitme mik gene ngau gu lei.

¹⁹Kecheiluilungpungme ne helungsuiyibe karchibe Tingwang gene dau gu lei, zai ziemmename ruage kelaksiame Israel gu Ka’nchibe Hangkat gene ’nsumchai ze bam gu lei.

²⁰Katîmphime ga gai du lei, zai kehichime je ngau ta du lei, zai mâ-kesiabe tew ra piechime leine je tew’ngga ’ndu lei,

²¹sam ne miramme je kesiatewchibe kau, keriekemui ge kiâchibe kau je tewkau-ra-tewbe kau, zai ka’nzeibe kau ze getei’nsiachibe kau zeu.

²²Chipauziegene Abrahambe je ripatkaipeu, Tingwang ne Jakob ki tedeu ge acheu ze rang lei: “Jakobbe je tew’ngngam gai ta du de lei, pe ma tew’nsia gai ta du de lei.

²³Pe dage I ne tewgaime pe name je pa ngau dezai, penui ne a ji tew’nchi gai gu daseu. Jakobbe gu Ka’nchibe Hangkat je penui ne tew’nchi gai gu lei, zai Israelme Rapeu suage sap ra herutsut ze sap ku lei.

²⁴Zai helung ge mâ-’nningmaume mâ-chîwang gu lei, zai mâ-kichime mâ-geteiliabe kuâ lu gu lei,” ze acheu zeu.