Read Zeme Naga ISAIA 3 Bible Online

ISAIA 3 - Zeme Naga bible

ISAIA 3

¹Pie le lau, Tingwang, baudime Wangpeu ne Jerusalem benai Judaram gene penui ’nnumtewbe benai penui je teika’nsapbe ramme, tingku benai hedui penui je ’ngngâ ze teika’nsapbe leine;

²peranchibe kau benai hereikangme, samrampeu benai kemeu’mpeu, kemeu gekungbe tâ tewpeu benai gechîngbe tâ tewpeu,

³hereikang hangrengeu ruage pemuiteipeu benai pengêudibe kau ziemmena, geteiliachibe kau benai hemikduaî tewchibe kau, zai ’ngnguiheu chîbe kau ramme, airamme leine teitat kam gu de lei.

⁴’Mpeumi napoine ramme ne penui gu heguangsinme ramme chang ra I ne tew gai gu, zai penui peireige ’ngngiêne ramme ne samrambe tâ tew gu lei.

⁵Zai ziemmena karai ge penui kat-kat je tewhereu gu, hangkat ne pe kangpeu je zai penui kining karai kau kat-kat je tewhereu ze bam gu lei, hename ne gechîngme je ngau’nna gu, zai ’mpangpaibe kau ne hengêutewzeime je ngau’nna gu lei.

⁶Chipau ting dezai ziemmena ne pe sikina’mpeu, pe kiria kau je nîm lu, “Ning gu â mechuapui tiebe la daze nang ne anui gu ka’ngguapeu tâ tew ra de lei, zai ai tew’nsia’ndibe chutrie ramme ze nang samrambe kangge bam ra de lei,” acheu gu lei.

⁷Kane chipau mai dezai chipaupeu ne kak ze, “Tewka’mmipeu I â tew ra changlak lei, a ki ge tak teu ra ga zai mechuatiebe ’nsangdu ga lei; baudime gu ka’ngguapeu hangge achu tew gai se lau,” acheu gu lei.

⁸Jerusalem â mâ-’nrap kai ’ndi, zai Judaram â kâu di daseu; penui samsa benai penui tatew zene Tingwang je ’nggi, zai pa nguabambe ngeudibe ka’nggibe ziegeneu.

⁹Penui ju bambe tak zene penui je sakkitew’ngkui gai de lei, Sodom gum ze penui gu hemui sapakpa gai lei, penui â tei’mbia meluisui lei. Penui duângga-desang gu lei! Kesiabe penui runne penui peireige teiwang gai daseu.

¹⁰Pelingtewbe kau ramme ze penui hang â, yi-desang gu de lei, ze rang gai be lau, penui â penui tatew ramme rachî teu gu daseu.

¹¹Ziemmena kesiabe kau pe duângga gu lei! Pe hangge â kesiabe dau gu de lei, pe ba ne ’ndaikau tâ pa tew gai mei be ze pe peireige tew gai dai gu daseu.

¹²A gu ziemmena deu ge—napoine ramme ne penui je tewsabe chang lei, zai ’mpuimi ramme ne penui peireige samram lei. Hei a gu ziemmena gau, ningnui gu kanguame ne ningnui je nguamie de lei, zai ningnui tatbe ’mpuî ramme ze tewkebuak ’ndi de lei.

¹³Tingwang ne pa’nzei sa ra zuachu di de lei, ziemmena je samram ra pa sapchu lei.

¹⁴Samram ra hangge Tingwang ne pe gume ruage gechîngme benai heguangme chang ze bamme je ngua lu gut la de lei. “Grepchî lu tew’nsiakam’ndibe ze ningnui tâ lei, kelaksiame gu sutlube kerua ramme ningnui ki ge la lei.

¹⁵Kelaksiame ju chaîkeniak ze a gu ziemmename je chaîchimbe ze ’ndaikau rimba gene ningnui tew lau?” ze baudime gu Tingwang Hera ne kacheu de lei.

¹⁶Tingwang ne kacheu de lei: Zaion na’mpuimi ramme kedijaîtew, zai penui guang getuachan gai lu tatrua, zai kahailabe mikpie ne heguarua, zai tatmie-kezairi ze penui pî kuâ kehingbing ze tatbe zeu.

¹⁷Tingwang ne Zaion na’mpuimi ramme peî ramme ge kahekuabe pat ra tew gai gu, zai Tingwang ne penui pum gu ka’ngngambe ’nchui ramme ralia’nchichiak kai bu lei, kacheu de lei.

¹⁸Chipau mai ge â penui pî ge kakerube hekiekapbe ramme, penui peîtam kakbe ramme, zai penui peî kakbe gua ramme;

¹⁹heteu ramme, heta ramme, mi guang ge kakebitbe paî ramme;

²⁰pîchûp ramme, tebeita ramme, mi kia kak ramme, taudui perîmyibe bung ramme, zai mi je tew’nsia lak ra kakbe ramme,

²¹mi bakêrang ge baroine kapbe ramme benai mi neû ge mâ-gua kaibe ramme;

²²pengêudibe mechuatiebe ramme, mechuapui ramme, helamechua ramme, zai mi ba ne teibe chiaka ramme;

²³piepelaritduibe puâ ramme, banutpaî ramme, penui peî’ngkum ramme, zai penui ju tapchimbe paî ramme Tingwang ne luatua kam ’ndu lei.

²⁴Perîmyibe kelei ge tiamnampak bam gu lei, mi kia kak kelei ge heria bam gu lei, zai hetam kebai zun ze bamrabe kelei ge hetam keîgie bam gu lei; zai pengêudibe puâ kelei ge miseigiriapaî ne ’nzui gai gu lei; ngauyibe kelei ge ka’ngngambe ne leî dai gu lei.

²⁵Ningnui gu ’mpeumi ramme je hiazutkie ne tewkau gai gu, zai ningnui gu ’mpeumi peranchime je herei gene tewchat ’ndu lei.

²⁶Zai pe gu keriekemui ramme hap ze desui gu lei; kechimmia’ndibe ziegene pa kedei ge ’ntaukecheipep kai lu bam gu lei.