Read Zeme Naga ISAIA 30 Bible Online

ISAIA 30 - Zeme Naga bible

ISAIA 30

¹“’Nggineime hangge pausiabe dau gu lei,” ze Tingwang ne kacheu de lei, “A gu makbe, kêdabe tâ ge tewtattime bau zeu; zai hemui hang riam’mpam gai suâ-suâ ra a gu herui makbe kêdabe puinakat-herua ra tâtew lei;

²Pharaobe ne ka’nggumbe kangge bam ra, zai Ijipme kezui ge ’ndun ra peu ra, a dage mâ-’nneu mak ze Ijip ’mbe tat ti zeu!

³Chidaze Pharaobe ne ka’nggumbe ze ningnui ka’ngngambe chang gu lei, zai Ijipme kezui ge bambe ze ningnui kahelêube chang gu lei.

⁴Pe gu kedime ramme Zoan ge bam, zai pe gu hepâupaume Hanes chang sede,

⁵penui hangge kegiebe peichilakme mâ de ’ngngâ gai mak, makchai mâ de pei gai mak, kane ka’ngngambe benai tewhelêugaibe runne peime bau ziegene penui ’nteumena je tew’ngngam gai de lei,” ze acheu zeu.

⁶Negeb gu mârekaune ramme peireige mâ-rangliabe. Kahereube benai helungkahereube heram, mâkau bepui benai besei, henêu pa’nchai geteube benai henêu kelimbe patbe bâm gezene hekunmerângne ching gene penui lungyibe heurâ ramme benai put-hu ngumtoa gene penui gu gechâk gepût pemîhungbe zat ramme kai lu ziemmena pelâp-pegîe ngaulakme tailam penui pungtat te lei.

⁷Ijip â ’nta-gesang zai perua kau de lei, chipauziegene I ne pechu, “Rahab ’ntausipbampui” ze acheu kû gai de lei.

⁸Zai chunage tatchu lau, aize penui suagene tingchudepei ge raw gai lau, zai chize leisikuak ge raw gai lau, chidezai aize bechâng dezai, betingbeta hangge sakki hang chang ra hangge zeu.

⁹Penui â ’nggineibe kau ramme, karasasabe kau ramme, Tingwang mâ-geteiliabe seugailakme bau lei;

¹⁰mâ kengaume kemeume je, “Mâ ngau se lau,” kacheume bau zai kemeume je, “Mâ-ka’nzeibe anui hangge pau’ntua se lau, kacheume bau, mi lungsui tewka’ntabe zat ramme anui hangge pau gai ze mâ-mâ gesang-makbe ramme anui hangge pau’ntua lau,

¹¹’mpuî sâu nan ze ’mpuî’ntai ’mbe tat kai de lau, Israel gu Ka’nchibe Hangkat kuâ anui je peize seu ta lau,” kacheume bau lei.

¹²Chipauziegene Israel gu Ka’nchibe Hangkat ne sa ze, “Ningnui ne aipau sam ze tuâpat kai ze, zai kategabe tatew ge mâ-mâ kakedet-detbe tatew ge ’nnum’mmi, zai chiramme ge ’nggui ze bam di de lei;

¹³chipauziegene ningnui peireige aipau hemui-helut ze, ’mbiekehube kâutena di ze, pumdup-duppat ze luakatne sia gai ze desuiruigaidibe gum chang gu lei;

¹⁴zai chi siadibe ze â, hegamli kateleupeu gu heli getauhiang gai bei ze pângdibe-pirie ruage hemi-meching tuakbe kuak hangge mei hedui tuakchurabe kuak hangge mei du lu ra gadibe chigumbe riâ chang gai du lei,” ze kacheu de lei.

¹⁵Tingwang Hera, Israel gu Ka’nchibe Hangkat ne acheu ze rang lei, “’Ningnui helatwang dai ze bamgaibe ge ningnui temi ze bam du lei; rim ze bamgaibe ge benai ’nnumtew ze bamgaibe ge ningnui ranchi hang chang gu lei,” ze acheu zeu. Zai ningnui â nei mak lei,

¹⁶maknedu ningnui ne sa ze, “Mak lei! anui â hekun ramme ching ge chua gai lu girîttat tu lei,” ze kacheu de lei, chipauziegene ningnui â girîttat kam du lei; zai ningnui ne sa ze, “Anui â, hekun pakchibe ramme peireige chua gu lei,” ze kacheu de lei, chipauziegene ningnui je guaka’nsame ramme pakbe ze ’nchi-desang gu lei.

¹⁷Mihangkat ne keheigaibeibe gene ziemmena chang kat pak ku lei, hangmengeu ne keheigaibeibe gene ningnui paktat ku lei, hepiepaîlimbe chia kedeiloa peireige bambe gum, peloa peireige mâge â, hingrabe hang chî ra kailiabe zat bambe je gum ze ningnui je sâudiak kam gai ’nde mak tâneu.

¹⁸Chipauziegene Tingwang ningnui je ’nggia gai ra kuâ bam lei; chipauziegene ningnui je ka’nggiabe teilia gai ra Tingwang pe runne pechu suang’ndi gai ze bam de lei. Tingwang â mâ-peling gesangtewbe Hera de lei; pechu kuâ bamme yi de lei.

¹⁹Eu lei, Hei Jerusalem ge kelungme Zaion ge bamme gau; ningnui hap ze bam ta du de lei. Ningnui kehapbe kuâ ge ningnui je pa ne ngau’nggia gai sing gu lei; chize pa ne seu dezai, pa ne ningnui kuâ kak kai gu de lei.

²⁰Zai Tingwang ne ningnui je pausia-kahereube tingku pei gai ze lungkahereube hedui pei bei ze bam leusedu ningnui je Geteiliapeu ne ’mbiarua ta du de lei, kane ningnui mik ne ningnui je Geteiliapeu je ngau gu de lei.

²¹Dezai ningnui heku-hezat kiam’nrikkaibe luage ningnui chai ’mbene, “Aize ’mpuîki de lei, chige tat lau,” ze kacheube kuâ ningnui seu gu lei.

²²Chidezai â ningnui gu heraluî hang gialube ramme gepût ne kûmlube benai heraluî hang hekilube ramme gechâk ne kûmlube deze ningnui ne tewhebâ gai gu lei. Mâ-kahebâbe zat ramme je gum ze ningnui ne chiramme tuâkezitrarip kai gu lei; ningnui ne chiramme je, “Tatchu lau!” ze acheu gu lei.

²³Zai ningnui kedei ge mâ-helei linggaibe ge tingruibe pa ne pei gai gu lei, zai chêu, kedei gene mâ-mâ misongga yi-desang ze ’nchipatrabe gezeu. Chipau mai ge ning gu kaurui ramme ze hereubuâyibe heramloa kedibe ramme ge deteu ze bam gu lei;

²⁴zai helu kedei ge teitâtewbe getumsei ramme benai hekunmerângne ramme ze mâ-tuakbe hetiâkuak benai peruangtewbe hetîa ne kî-gechung ’nchichiaklube hereubuâ gekumbe hetak ze setteu ze bam gu lei.

²⁵Zai herei kegîbe ting ge heki kehube ramme kâukeu dezai kedeiloa benai peloahube ramme ge heduiluabe ’nggeuki ramme pat tu lei.

²⁶Chipau peireige du hekêu ’mbi ze tingnaimik ’mbi gum chang du lei, zai tingnaimik ’mbi ze hezie senane gu babe ’mbi yibe teiheruagaibe riâ ba ze bam du lei, Tingwang ne pa ne lakbeibe gene pe gume kahejambe dumbe benai geteube jâm kateleube mai dezai neu.

²⁷Pie le lau, Tingwang ji kedeu ’mbene wang lei, pe lumpum ne hemi gum tau ze, zai hemika seudei ze chube geneu; pe mui ge pe lungsiabe ne puigit ze bam, zai pe lei ze â rûka’nggabe hemi gum bam de lei;

²⁸pe chuilube ze â, ’nggeuki heduidi ze mi guang riâ kereibang bambe gum lei; mâ-tewka’nsiabe hezangrak zene heramzatme je zang ra, zai nguamietatme mui ge hegeîdâng hekun mui ge kaibe zat kaibe ze hezatramme mui ge ’ngkam gai ra hangge zeu.

²⁹Tingmuîzeu ge ka’nchibe hengi kahengîbe luage ningnui ne leu kat tew gai gu lei; zai Israel gu Tingchukâng ’mbe tat ra Tingwang gu kedeiloa ’mbe hangkat metiam kuâ gene nguatatbe luage ningnui lungsui’nta gu lei.

³⁰Tingwang ne, kemâu ruigit patbe benai tingkaichibe zai desak keube ramme ’mpam ze pe lumpum-kadesangbe benai rûka’nggabe hemimelei bambe gene pe gu heguang ngeudibe ’ncheu peize seu ra, zai pe ba lakkeube peize ngau ra tew gai gu lei.

³¹Tingwang kuâ geze Assiriame ne hing-desang gai gu lei, pa ne pe tui hegeîtui ne lak kai dezai neu.

³²Zai Tingwang ne penui peireige gesâbe tui lakkaibe leine ze ’nsum benai ’nrabung kuâ ramme hang chang gai du lei; herei ge heba kezapka’nruibe ba ne pa ne penui dage ’nggi gu lei.

³³Rûrabe bâm hangge â ’ndâge teleu gai lu de lei; eu lei, heguang hangge kedâ gai lu de lei, heching’ngkua di-ze-hube, hemi benai heching keliêhi gai ’nde lei; Tingwang chuilu â Salpharchu taugie bambe gum lei. Chize hemitau lei.