Read Zeme Naga ISAIA 31 Bible Online

ISAIA 31 - Zeme Naga bible

ISAIA 31

¹’Ngngâ gai ra hangge Ijip ’mbe wangkeume benai hekun ramme peireige ’nnumtewme penui duângga gu lei, penui misongga bambe ziegene timriang ramme peireige penui ’nnumtew lu, zai penui ranchi ze bambe ziegene hekunchingchuame peireige ’nnumtew lu, kane Israel gu Ka’nchibe Hangkat dage pie mak, makchai Tingwang dage mâ-’nneumakme bau zeu!

²Zai acheuleusedu pa â ningching, zai pausiabe mi kehingbe teiwang lei, pa â pe sam ramme puakeli mak lei, kane kesiabetewme ki peireige ’nggi ze zuachu gu lei, zai kesiabe ka’nzûbe tâ tewme je ka’ngngâme peireige ’nggi gu lei.

³Ijipme â ziemmena ramme lei, zai Hera mak lei; zai penui gu hekun ramme â hemeikâng ramme lei, zai herui mak lei. Tingwang ne pe ba getuapat kai bei dezai, ka’ngngâpeu ze kauratew gu lei, zai ’ngngâgaibeibe kau ze kau gu lei, zai penai hangna luakatne ga’nsam gai gu lei.

⁴Aigum ze Hera ne rang lei, mâkau mei, mâkaupoine mei ne pa hetak peireige ka’nrabe luage, zai mâkau ziegene melireîme bau je kûgaibeibe luage penui ne penui tûtew ze tew’ngnging gai bei ze hing mak tai gum ze baudime gu Tingwang ne Zaion Loa peireige benai peloa peireige ’nggi ra wangkeu gu lei.

⁵’Nruine ne tingkai ge ’ngngai ta di gîngmang bam gum ze baudime Rapeu Tingwang ne Jerusalem peireige reheihekakuâ bam gu lei; chize pa ne reheiheka ze lupat kai gu lei, pa ne ’nzuak kai ze ’nripat kai gu lei.

⁶Ningnui ne geikum-desanggaibeipeu dage ’nreiwang lau, Hei Israelme gau.

⁷Chipau mai ge â ’nteumena ne pe gu-gu gepût ne tewbe heraluî ramme benai gechâk ne tewbe heraluî ramme, tuâpat kai kam gu lei, hemui-desang ze ningnui ne ningnui hang tewgailube ramme zeu.

⁸“Zai Assiria’mpeu ze hiazutkie gene kau gu lei, ziemmena gu gene mak zeu; ziemmena gu gene mak ze, hiazutkie gene pechu tewkeleu’nrui gu lei; dezai hiazutkie gene pa pak tu lei, zai pe gu hename je tewgetedrabe ge kai gu lei.

⁹Pe gu tingchukâng ze tat tu lei, zai pe gu tâ-muipuame ramme ne herei gu hepiepaî ze sâurarie gai nan ze pakzîng du lei,” ze Zaion ge pe gu hemi bambepeu, zai pe gu hemihûnki Jerusalem ge bambepeu ne kacheu de lei.