Read Zeme Naga ISAIA 32 Bible Online

ISAIA 32 - Zeme Naga bible

ISAIA 32

¹Pie le lau, Heguang ne peling gene heguang ze samram gu lei, zai heguangsinme ramme ne ka’nzeibe gene samram gu lei.

²Penui hangkat-kat zene tingkaiguibe ge ’mbaigairabe bâm hang gum heratingkai hangge hepatzeu hang gum, gechangbe bâm ge ’nggeuki hang gum, tingchu kiebe kelumbe bâm ge tingchudibe-’nseubâm gum chang gu lei.

³Chidezai kengaume mik leine ne ’mmuîkeu ra mak lei, zai keseume kun leine ne ’ngking gu lei.

⁴Kagechube-lung ze mâ-’nning zun ’nning gu lei, zai kakelaube leiria ze ’nzeitun ze seuyi-desang ze sa gu lei.

⁵Kemiebe kau je ka’nchuibe kau ze kû ta du lei, zai peluîlabe kau je hengêutewbuibe kau ze kû ta du lei.

⁶Kemiebe kau â teguaktuak ze sam sa daseu, zai pe lung ka’nningbe ze mâ-kesiabe hang runne ka’nchuak lei: Kesia-siabe luilungtak heli, Tingwang deu ge mâ-kemak-makbe sapat, (tak) ka’njeibe teu’nggeu gai mak ze sâu gai, zai (hedui) kahereibe herei suâ-suâ ra tew gai zeu.

⁷Heluîlabe kau gu heluîlabe luilungtak ramme â, kesiabe kau lei; helungriaksiabe tak pa tew lei, kegame gesangsing ne mâ-paugaibe luage ’nsangdu kelaksiame je tewkau gai ra hangge zeu.

⁸Kane ka’nchuibe kau â mâ-mâ ka’nchuibe tâ ramme tew lei, zai ’nchuichik ze pa â bam lei.

⁹Zuachu le lau, ningnui ’mpuimi temichai ze bamme gau, a kuâ ze ’ngking le lau; ningnui runne ’ntêulung ze bamme heleume ramme gau, a sam sabe ge ’ngking gai lau.

¹⁰Kum kat sua yibinak kai dezai, ningnui duângga kezinkeluak kai gu de lei, ningnui ’ntêulung ze bamme ’mpuimi ramme gau; grepchî rairabe ting ge ’ntakû gai du lei, rai ra ’nchipat ra mak lei.

¹¹Kedun zu lau, ningnui ’mpuimi temichai ze bamme gau, mi duângga ze bam du lau, ningnui ’ntêulungme gau; raduak nan ze ningnui pumrua bam du lau, zai ningnui kia ge miseigiriapaî neu gai le lau.

¹²Helu yi-kadesangbe ramme hangge ningnui ga zûm ze bam du lau, grepchî ’nchibiak bamrabe hangge zeu,

¹³a gume gu kedei ge hetu ramme benai hetupat ramme puakpat ti de lei; eu lei, hesuiyibe ne pui ze bambe namdi ge hesuiyibe ne puibe kelak ramme hangge ningnui ga zûm du lau.

¹⁴Heguangki ramme ze â put kai ’ndu de lei, ziemmena ne puigit bambe namdi ze putzîng gai ’ndu de lei; peloa benai hekêtkaibe-kaira deze betingbeta hangge hekaune ka’mbaibe bâm hang chang gai du de lei, hênam gu hekunmerângne ramme suiyika’ntabe kauruidung kadeteube bâm hangge zeu;

¹⁵kehu ’mbene anui peireige Herui ruîkeu gai mak tâne, zai hênam gechangberam ze mâ-mêrayibe helu hang chang gai mak tâne, zai mâ-mêrayibe helu ze ’nrêu gum chang gai mak tâne gezeu.

¹⁶Chidezai mâ-gesangtewbe ze hênamchangbe heram ge bam gu lei, zai mâ-pelingtewbe ze mâ-mêrayibe helu ge bam gu lei.

¹⁷Zai mâ-pelingtewgaibe ramme geze yisang-yi bam gu lei, zai pelingtewgaibeibe ramme chângge yize ’nsimrim bam kam gu lei.

¹⁸A gume ne bamtemichai ze bam gu lei, ka’nnangtew mak, zai bamkatemibe bâm ramme gezeu.

¹⁹Zai ’nrêu ze gechimtua kam gai ’ndu lei, zai namdi ze bakêu ze tenaitai gai du lei.

²⁰Hedui taige mâ-helei lingme yi de lei, getumsei benai hekunmerângne pî hebatyi ra tewgaime zeu.