Read Zeme Naga ISAIA 33 Bible Online

ISAIA 33 - Zeme Naga bible

ISAIA 33

¹Nang tewka’nsiapeu, ning duângga gu lei, ningchu â tew’nsiagaimakbeipeu zeu; kechoa-keduaibe tâ mî ne ning peireige tewgaimakpeu nang zeu! Nang mâ-tew’nsiasau gai dezai, ningchu tew’nsia gai ’ndu lei; zai nang ning choâsiabe ne tâtewsau gai dezai, kechoa-keduaibe tak ne ning peireige tew gai gu de lei.

²Hei Tingwang anui je ’nggia gai lau; anui ningchu kuâ de lei. Hechua ’nsangne ge anui baran hang chang gai lau, kahereube hî ge anui gu tewka’nringbe bangpui chang gai lau.

³Hekua kechibe gene hezat ramme pak lei, nang zuachugaibeibe zene heramzatme ramme pakrariptat kam di lei;

⁴mâ-tewka’nsiabe kau tinggûmbe ’nduiwanggaibe gum ze hereichâ teiwang’ndui gai de lei; tîngkau ramme ka’nsakbe gum ze chige ziemmena ne ka’nsak te lei.

⁵Tingwang je suang’ndi gai de lei, pa ne kehube ge bam dadegeu; pa ne Zaion ge gesang benai peling ze kaipuiting gai gu lei;

⁶zai pa ne ningnui hangge ningnui gu pehî ramme teika’nggimbe bangpui chang lei, tewka’nringbe, kaningchingbe, zai mâ-gechîbe ne puibe zeu; Tingwang je hingchibe ze peheurâ de lei.

⁷Pie le lau, gekume ramme hela ge ka’nrung lei; desieyibe, lungkatemibe sam paume happuai bam lei.

⁸’Mpuî’mmaî ramme ’nreizîng gai de da, ziemmena tat’ngguak ta de lei, samhatkaibe ramme tew’nsia gai bei de lei, sakkitewme ramme je tewkengam gai bei de lei.

⁹Heram ne desui ze ’ngguaipeniak kai de lei; Lebanon â ’ngngam ze heguikeu gai de lei; Sharon â tingkangram gum la de lei; zai Bashan benai Karmel ne penai neu ramme gechuîtua de lei.

¹⁰“Chunage I zuachu gu de lei,” ze Tingwang ne kacheu de lei, “Chunage I a runne achu teichu gai gu lei; chunage achu tei’ngnguchu gai gu lei.

¹¹Ningnui ne ningnui lung ge chêuriepum pung gai lu, ningnui lung gene megaumui lupat lei; ningnui chuilube ze â ningnui je rû’nggarabe hemi de lei.

¹²Zai ziemmena hezat ramme je ’nneichu gene ’nnei rû-pat kai bei gum, hetu ramme chutkeu lu hemi ge rû gai gum ze rû gai ’ndu lei,” ze acheu zeu.

¹³Seu le lau, ningnui kedeu ’mbe bamdime gau, I ne tâtewgaibe rasam zeu; Zai ningnui kenahia ge bamme gau, I tâtewchibe chî le lau.

¹⁴Kahemuime ramme Zaion ge bamme â hing kam de lei; tâ-kesiabe tewme hingkedun-desang ze: “Châu anui ruage mâ-kerube hemi ge bam dui lau? Châu anui ruage betun mak ze hemigetaube ge bam dui lau?” ze kacheu de lei.

¹⁵Mige peling gene tat ze pelingtid ze sabe kau, kedungteube gene mâ-pegiê ngaube je ngaugailakbe kau, henim peibe lumakrabe hanggene pe ba kezainambe kau, kegîbe rasam sabe seube gene ’ngkingtadibe kau, zai mâ-kesiabe piebe gene pe mik ’mmuîgaibe kau,

¹⁶pa ze kehube ge lung gu lei; pe gu ’nseubâm ze â tingchu ne biebingbe kau lei; pechu â pe gu hetak tela bam gu lei, pe gu hedui gakeu ra mak lei.

¹⁷Heguang je ngauyika’nsangbe ning mik ne ngau gu lei; pieteni-tattibe heram penui ngau gu lei.

¹⁸Tewkakeheipeu helî ze nang ne ning lung ge ’nningdaulak ’nningzeu-zeu bam gu leu: “Mâ-riampeu ’ndaige la lau, ’mpuâhâ ka’nchupeu ’ndaige la lau? Heki kehube ramme riampeu ’ndaige la lau?” ze acheu ze ’nning zeu.

¹⁹Duîzuttewbe kau ziemmena ramme je nang ngau ta du de lei, penui samsa katenumme chi nang ne ’nningwangchilakme, penui sam sakelaurakme, nang ne seuchi lakme zeu.

²⁰Zaion je pie lau, anui gu diegaikua’ndibe kahengîbe bâm ramme gu pebangpui chi namdi jeu! Ning mik ne Jerusalem je ngau gu lei, ’ntimrim ze lungbe bâm, hetiampaîki, pe gu heriachakbe ’ntung du, zai keîbe ria ramme du chaktaplakbe, gechuî’ngngailakbeki zeu.

²¹Kane chige Tingwang ne pengêudibe gene pezadibe anui hangge ’nggeuki kedibe ramme benai peza kedibe bâm, ’nneikuak ge ’nneikuak gu hetui ramme tei ze tatchilakbe, zai ’nneikuak kedibe peranchibe ne du kalakbe bâm hang chang ze bam gu lei.

²²Tingwang â anui gu samrampeu, zai Tingwang â anui gu kaheguangpeu, Tingwang â anui gu heguang daseu; pa ne anui je tew’nring gai gu lei.

²³Ning gu mâ-gingbe ria ramme gîng-kadesuak lei; bechia sumchube ge kebit’ntipchi lak lei, makchai du ’nneikuak ze chaîpatchi lak lei. Chidaze sutlube kerua benai hereichâ ze misongga ze timzi gai bu de lei; bepîsiame ’nsangnedu sutlube kerua ramme pung gu de lei.

²⁴Zaion ge kelungpeu ne, “I ka’nrâ lei,” ze acheu ra mak lei; ziemmena chige bamme ne penui gu hemui-helut ze ’ngngaî kam gai ’ndu lei.