Read Zeme Naga ISAIA 34 Bible Online

ISAIA 34 - Zeme Naga bible

ISAIA 34

¹Zuawang’nna lau, Hei heramzatme ramme gau, Seu ra, zai, ’ngking ra hangge zeu, Hei hezatramme gau! Kedeirei ne peize ’ngking lau, zai pelung ge bampuigitbe ramme leine neu; kedeirei, zai chigene zuapatbe zat leine neu.

²Tingwang ne heramzatme peireige pe lumpum-desang la de lei, zai pe gu hereikangme baudime peireige pe râta-desang la de lei, pa ne penui peireige pausiabe wang ra tew gai ’nde lei, pa ne penui je gîchatrabe hangge pei gai ’nde lei.

³Penui pum gîchatkaibe ramme hela tuâpat kai bu lei, penui gu kechaipum rîm ze nampat bam gu lei; kedeiloa ramme ge penui jai lua ze bam gu lei.

⁴Piehang ngaube tinggîm ge bambe zat ramme riam’ngga gu lei, zai tingkehube ze leisizui gum ze ’nzui gu lei. Grepchî ria gene peneu ramme ka’ngngaî gum, ’mbeuchîbang gene peneu ramme ka’ngngaî gum ze, tingkehube ge ka’nnaibe leine ’ngngaîkeu kam du lei.

⁵A gu hiazutkie â, tingkehube ge kedâzun gai lu kualak la de lei; pie le lau, Edom peireige samramrabe hang chize wangkeu de lei, I ne pausiabe wang ra tewgai’ndime peireige zeu.

⁶Tingwang dage hiazutkie kat la lei; hejai ne tewhuakchuak kai lu, mâ-châ rai ramme chige tewtau gai lu, meli ramme benai kemei ramme jai kai lu, meli’nsei ramme gu pa’ngkei ramme gu pechâ gene tewtaugai’ndibe zeu. Bozra ge Tingwang gu herâtewbe la dadegeu, Edom ge mâ-tewchatbe kedibe bambe zeu.

⁷Hênam tumsei ramme, getumseipoine ramme chige getumsei seidi ramme ka’mpambe ze chiramme ge keu gai gu lei. Penui gu heram ze hejai ne duichimbiak kai bu lei, zai penui gu kedei ze mâ-châ ne kedeiyibe hang tew gai bu lei.

⁸Tingwang dage hekûmlurabe tingnaimikpui kat la lei, Zaion hangge tewpuigaidairabe tingkum zeu.

⁹Edom gu ’nggeuki ramme ze ’nchamtikbe (Alkatra) hang chang gai du lei, zai pe gu kedeinia ze hemi tauyibe Salpharchu chang gai du lei; zai pe gu heram ze ’nchamtikbe (hemi) taube chang gai gu lei.

¹⁰Kemuî-keba chize ’mmit ra mak lei; betingbeta pe gu hemika ze hiachu bam gu lei. Rehei gene rehei chize sia kam di ze bam gu lei; betingbeta chige mî de tat’ngguak ra mak lei.

¹¹Kane hepatlie benai tingngua ne chize ’nram gu lei, hebie benai ’nggek ne chige lung gu lei. ’Nningkateguakbe gu mâ-ka’ndeube ria ze pa ne Edom peireige gîngrâka gai gu lei, zai ’ndîng mâ-ka’ndeube ria ze chige ziemmena besuitewme peireige gîng’nchie gai gu lei.

¹²Penui ne chi deze, Chige Heguangram ga lei ze kû gu lei, zai pe gu heguangsinme ramme leine mî de bam dai ra mak lei.

¹³Hetu ramme pe gu keriengdi peranchibe ramme ge puakpat ku lei, ’mbubang benai heturia ramme pe gu hekêtkaibeki ramme ge puakpat ku lei. Chige munserung ramme ne penui bâmtew gu, zai ostrikruî ramme bâm hang chang gu lei.

¹⁴Zai mârekaune ramme ne henei ramme je dekihedau gu lei, kemei’nsei luî pungbe herasiabe ne pe kang kau je kû ze ’nra gu lei; eu lei, zai chige tingmuî gu gechipai ’nnai ze bam gu lei, zai pa bamgairabe bâm hangge pierua gu lei.

¹⁵Chige hebie ne pebûm ’mbûm gai lu gûm’ngkak kai gu zai pe gu kezui ge kebau’ndui gai gu lei; eu lei, kelie ramme je kebau’nduiwang gai gu lei, pepam-pam tew zeu.

¹⁶Tingwang gu leisikuak gene peu lu ze kiâ gai lau: Airamme katte tew’ngga ra mak lei; katte pe pam hang ’ngga ra mak lei. Tingwang mui gene die gai de lei, zai pe gu Herui zene penui je kebauwang gai bei de lei.

¹⁷Pa ne chiramme hedachak ze penui hangge pe ba ne mâ-ka’ndeube heria tei ze hedam kampat kai bei de lei; penui ne chize betingbeta teilung ze bam gu lei, rehei gene rehei chige penui ne lung gu lei.