Read Zeme Naga ISAIA 35 Bible Online

ISAIA 35 - Zeme Naga bible

ISAIA 35

¹Hênamchangberam benai heram tingkangram ne penai suiyi’nta gu lei, tingkangram ne pe suiyi’nta ze bepâ papat ku lei; Krokas pâ gum ze

²misongga chize papat ku lei, zai pe suiyi’nta ze leutew gu lei. Lebanon ngeudibe chige pei gai bu lei, Karmel benai Sharon gu ngauyibe pengêudibe zeu. Chiramme zene Tingwang ngeudibe ngau gu lei, Tingwang dage ngauyibe pengêudibe zeu.

³Heran-gabe ba ramme ran tew’nchi gai lau, zai kakelipbe kukra ramme tew’ntaumang gai lau.

⁴Kehingbe lung ne pui ze bamme je salia lau, “Heranchi ze bam lau, hing se lau! Pie le lau, ningnui Rapeu hekûmruî ra ze wang gu lei, Hera ne tâtewpui gai ra bambe geneu. Pa ne wang ze ningnui je tew’nring gai gu lei,” ze acheu zeu.

⁵Chidezai gechitbe mik lat kai bu de lei, zai gepangbe kun ze tewpela gai bu de lei;

⁶chidezai ziemmena pe pî kateluabe kau ne heti gum pakkeding gu lei, zai sam sachimakbe leiria ne hesuiyi ze heleutew gu de lei. Hênamchangberam gene hedui ramme puakpat ku lei, zai hênamchangberam ge ’nggeuki ramme lua gu lei;

⁷deseî hemi getaube ze (hedui) ’ngkiêzai chang gai gu lei, zai kedei chang’ngkakrak bambe ze hedui ’nrimchu gu lei; munserung ramme ne penui bâmtew ze bambe bâm ze kateduibe bâm, ’ndeu chang gai gu lei, hereubuâ ze hekubang ramme benai heruabang ramme chang gai gu lei.

⁸Chige ’mpuî kedibe bam gu lei, zai chi je Ka’nchibe ’Mpui ze kû gu lei; kahebâbe kau ne chige tatpela ra mak lei, zai kemiebe kau ne chige mierua ra mak lei.

⁹Chige mâkau bam ra mak lei, zai mârekaune tewsiabe mâ de chige hang ra mak lei; chiramme chige ngau ra mak lei; kane ripatkaibeime ne chige tatrua gu lei.

¹⁰Zai chi Tingwang gume, pemî ne ’nripatkaibeime helatwang dai gu lei, zai heleutew ze Zaion ’mbe tatzuawang gu lei; betunmakbe suigut ze penui peireige bam gu lei; hesuiyibe benai helungsuiyibe ze penui je dau gu lei, zai helungsuisiabe benai kehuaibe ’mbiatat tu de lei.