Read Zeme Naga ISAIA 36 Bible Online

ISAIA 36 - Zeme Naga bible

ISAIA 36

¹Heguang Hezekia kaheguangbe tingkum kereu ze medai kum ge, Assiria heguang Sennakeribbe ne Juda gu namdi peranchibe ramme peireige ’nggi ze chiramme lu ’ndi de lei.

²Zai Assiria heguang ne Lakis gene Rabshakebe je Jerusalem ge heguang Hezekiabe dage lang gai de lei, hereikangme baudime je lang’mpam gai zeu. Zai paîdakbe tâ tewbe bâm ’mbe tatbe puidi ge ’nrei ’mbe bambe (hedui) ’ngkiêzai sungbe gene hedui’mpui ’nritkêube ge pa sap kai de lei.

³Zai chige hangchum pe tailam pat te lei, Hilkiabe na Eliakimbe, heguang kilûng ge besuitewpeu, zai Shebnabe, rawsuipeu, zai Asapbe na Joabe, rawteipeu, aime hangchum zeu.

⁴Dadege Rabshakebe ne penui je, “Hezekiabe je acheu be lau, ‘Aigum ze heguang dilangpeu Assiria gu heguang ne rang lei: Ning hangge aize ’ndaikau gene ning lungdirabe bâm la lau?

⁵Sam runne ne herei hangge tâtewchibe hang changlube kau mei? Nang ne achu ’nggibambe ze châu je nang ’nnumtew lau?

⁶Pie le lau, hekupum puptibe hetui, chige mige ne ’ngngêu gai bei dezai, pe ba duak-beitarabe hang gum ze Ijip peireige nang ne ’nnumtew de lei. Ijip gu heguang Pharaobe â mi-mige ne pechu ’ngngêugaime leine hangge chigum bam de lei.

⁷Kane nang ne achu, “Anui Rapeu Tingwang peireige anui ’nnumtew lei,” acheu dizai â chize Juda benai Jerusalem je, “Ningnai aipau herâtewbe-kaira suage kellum ra lei,” kacheupeu, pe gu pebâm hube ramme benai herâtewbe-kaira ramme Hezekiabe ne lutua’ndipeu, pa ze de mak semei?

⁸Chidaze chuna a pau Assiria gu heguang dage ’mpau le lau: I ne ningchu hekun ramme chang na pei gu lei, nang ne chiramme peireige ning lambia gene hekunchingchuame je kaichi duî zai ai.

⁹Timriang benai hekun ramme hangge Ijip peireige nang ne ’nnumtew ze bam ze ’ndaigum ze a pau guâ ka’ngguame ruage cheilangbe hangkat je nang ne duichi ra lau?

¹⁰Chipau peireige du, Tingwang je I ne ngua mak ze aipau ram ze tew’nsia ra I hang kau semei? Tingwang ne achu, Aipau ram ’mbe hang lu chize tew’nsia ne lau kacheu de lei, acheu zeu,’ ze salia be lau,” ze kacheu de lei.

¹¹Chidadege Eliakimbe, Shebnabe, zai Joabe ne Rabshakebe je, “Kellum de lei, anui ne Aramaik lad chî la daze ning guâ ka’ngguame je chipau lad ne ’mpau lau; ’Mbie ge ziemmena ramme bamme geseube gene Judaram lad ne anui je ’mpau gai se lau,” ze kacheu de lei.

¹²Kane Rabshakebe ne, “Ningnui gum ze penui runne penui bâ teu ze penui jûng sak ze penui pausît hang changdime, aige kerie peireige ka’ntaume dage mak ze ning pau benai ning dage runne aipau sam ramme sa gai ra a pau ne achu lang gai semei?” ze kacheu de lei.

¹³Chidadege â Rabshakebe sap lu Juda lad ne kû’nchi ze kû gai ze: “Heguang dilangpeu, Assiria heguang sam ramme seu le lau!

¹⁴Heguang ne aigum ze rang lei: ‘Hezekiabe ne peize ningnui je duai se lau, pa ne ningnui je lupatchi lak kû daseu.

¹⁵Hezekiabe ne ningnui je, “Tingwang ne anui je lupat kai sing gu lei; aipau namdi ze Assiria gu heguang ba ge pei gai ’nde ra mak lei,” ze acheu ze peize ningnui je duai se lau.

¹⁶Hezekiabe kuâ ’ngking se lau; Assiria gu heguang ne acheu ze rang gai de lei: Nang ne a dage desieyibetew lu ze a dage wang lau; chidezai ningnui ’nteumena ne mi gu-gu grepchî raiteu gu lei, zai ningnui ’nteumena ne mi gu-gu ’mbeuchî, zai ningnui ’nteumena ne mi gu-gu dekuaki gene hedui tuaksak ku lei;

¹⁷chêu benai wain kiebe heram, tingku benai grepchî merie kiebe heram ningnui ram gumbe heram ’mbe I ne ningnui je nguatat kai mak tâne gezeu.

¹⁸’Ntîngchi le lau, makchai â, Hezekiabe ne ningnui je, “Tingwang ne anui je lupat kai gu lei,” acheu ze nguamie gai gu lei. Heramzatme gu hera mige ne Assiria gu heguang ba gene pe gu heram ze lupat kai bei semei?

¹⁹Hamath benai Arpad gu hera ramme ’ndaige la lau? Sepharbaim gu hera ramme ’ndaige la lau? Penui ne a ba gene Samaria lupat kai bei semei?

²⁰Tingwang ne Jerusalem a ba gene lupat kai ra hangge ai heram ramme gu hera ramme ruage châu ne a ba gene penui gu heram ramme lupat kai bei lau?’ acheu zeu,” ze kacheu de lei.

²¹Kane penui kuâneu mak lei, zai pechu samkie katte kak mak lei, “Pe chu kak se lau,” kacheube ze heguang gu samde di daseu.

²²Chidadege â heguang ki ge besuitewpeu Hilkiabe na Eliakimbe, zai rawsuipeu Shebnabe, zai Asapbe na Joabe, rawteipeu, aime ze Hezekiabe dage penui paî ramme hit ze wang ze, pechu Rabshakebe sam ramme pauliâ gai de lei.