Read Zeme Naga ISAIA 37 Bible Online

ISAIA 37 - Zeme Naga bible

ISAIA 37

¹Chize Hezekiabe seu dege pe paîni hit ze, zai miseigiriapaî ne pe runne pechu tap kai lu, Tingwang ki lam’mbe tat ti de lei.

²Zai pa ne Amozbe na kemeu’mpeu Isaiabe tailam heguang ki ge besuitewpeu Eliakimbe, zai rawsuipeu Shebnabe, zai tingku tâ tewchîngdime, gechîngme ramme je miseigiriapaî tap kai kam gai lu tat ra lang gai bei de lei.

³Penui ne pechu, “Aigum ze Hezekiabe ne rang lei, ‘Aipau mai â mi duânggabe, ka’ngngiambe zai tewhelêugaibe mai de lei; napoine ramme je lungkeu gai ra chang di de lei, zai penui je lungpat kai ra heran ga lei.

⁴Chize Rabshakebe, pe pau Assiria gu heguangpeu ne pechu keringbe Hera je teihenuitew gai ra langgaibeipeu gu sam ramme ning Rapeu ne seu di lêu gu lei, zai Tingwang ning Rapeu ne sam ramme seutâudibe ze ’ngngiam gai lêu gu de lei; chidaze chai’nsakpatme keringme hangge nang kellum zu lau,’ acheu zeu,” ze kacheu de lei.

⁵Heguang Hezekiabe guâ ka’ngguame bau Isaiabe dage wang dege,

⁶Isaiabe ne penui je, “Ningnui pau je salia be lau, ‘Aigum ze Tingwang ne rang lei: Assiria gu heguang guâ ka’ngguame ne achu sa’nsiagaibe sam ramme ningnui seulube ziegene hing ze bam se lau.

⁷Pie le lau, peize pa ne mâ-’ngkâ seu lu pe kiram ’mbe helatwang dai de ra pe dage I ne herui kai gu lei; zai pe kiram sing gene hiazutkie gene I ne pechu tewkau gai gu lei,’ acheu zeu,” ze acheu bei de lei.

⁸Rabshakebe wang kadai de lei, zai Assiria gu heguang ne Libnabe je ’nggi-laleube ngaudau de lei; pa ne heguang â Lakis sâu nan ze tat te lei be seu lu dadegeu.

⁹Chunage Ethiopia gu heguang Tirhakabe deu ge “Pa ne ningchu ’nggi ra zuapat te de lei,” kacheube rasam heguangpeu ne seu di de lei. Zai chize pa seuchang dege, pa ne hepâupaume je Hezekiabe dage lang gai ze,

¹⁰“Aigum ze ningnui ne Hezekiabe je salia ra lei: ‘Ning Rapeu, nang ’nnumka’mmipeu ne ningchu, Assiria heguang ba ge Jerusalem pei gai be ra mak lei, ze acheu ze het kai ze peize ningchu duai se lau.

¹¹Pie le lau, Assiria heguangme ne heram ramme leine gechim’nsia ze chiramme peireige tâtewbe rasam nang seu de lei. Zai ningchu lupat kai bu semei?

¹²Heramzatme, a peume ne gechim’nsiagaibeime, Gozan, Haran, Rezep, zai Telassar ge bamme Eden gu ziemmena ramme, aime gu hera ramme zene penui je lupat kai bei semei?

¹³Hamath gu heguang, Arpad gu heguang, Sepharbaim gu namdi gu heguang, Hena gu heguang, makchai du Ibba gu heguang ’ndaige la lau?’ acheu zeu,” ze kacheu de lei.

¹⁴Hezekiabe ne hepâupaume ba gene samkela rawgaibe lu lu ze kiâ gai de lei; dadege Hezekiabe Tingwang ki ’mbe hang lu chize Tingwang masuage rapat kai de lei.

¹⁵Dadege Tingwang je kellum ze:

¹⁶“Hei baudime gu Tingwang, Israelme Rapeu, Kerubme peireige heguang ka’ntaupeu, kedeirei heguangram leine gu nang â Hera de lei, ning runne lei; nang ne ting benai kedei tew gai lei.

¹⁷Ning kun ’ndualie gai ze, Hei Tingwang gau, ’ngking gai lau; ning mik rakpat kai ze, Hei Tingwang gau, ngau gai lau; keringbe Rapeu je teihenuitew ra Sennakeribbe ne langgaibe sam ramme leine seu kam gai lau.

¹⁸Gesang de lei, Hei Tingwang gau, Assiria gu heguang ramme ne heramzatme ramme benai penui gu heram ramme ze tew’nsia kam gai bei de lei,

¹⁹zai penui ne hemi ge penui gu hera ramme tuâ gai bei de lei; chiramme ze â hera ramme du mak, kane ziemmename bachiâm, heching benai tingchu dadegeu; chipauziegene chiramme ze tew’nsia ’ndi de lei.

²⁰Chidaze chunage, Hei Tingwang anui Rapeu gau, pe ba gene anui je tew’nringpat kai lau, dezai kedeirei heguangram ramme leine ne ning runne Tingwang de lei be chî le ra hangge zeu,” kacheu de lei.

²¹Chidadege â Amozbe na Isaiabe ne Hezekiabe dage sam lang gai ze, “Tingwang Israelme Rapeu ne aigum ze rang lei: Nang ne Assiria heguang Sennakeribbe deu hangge a dage kellumgaibeibe ziegene,

²²aize pe peireige Tingwang ne sagaibe sam de lei: “ ‘Chipaupui zene ningchu mâ-hang ’nning gai mak, pa ne ningchu teihenuitew lei— Zaion na heleu katimsangpui zeu; chipaupui ning chai ’mbene pe peî kakengûm lei— Jerusalem na heleu’mpui zeu.

²³“ ‘Châu je nang teihenuitew ze saka’nsia lau? Châu je nang kiâ ze ’ngngangrie ze ning mik piekari gai kadai lau? Israel gu Ka’nchibe Hangkat je ka’nggi de lei!

²⁴Ning guâ ka’ngguame je tei’ndam lu nang ne Tingwang je teihenuitew lei, zai nang ne sa ze, A gu timriang misongga ze tei lu kedeiloa ramme tûnroi ’mbe I hang lu de lei, deutaudibe Lebanon loa’ntûm ramme ge zeu; I ne kedarbang hulangbe ramme kuîkau gai de lei, chingkeleu bang yilangbe ramme zeu; chi hulangbe bâm ramme ge I chang de lei, chi ’nrêu chuklangbe chui gezeu.

²⁵I dekuaki ramme kui gai lu hedui sak te lei, zai Ijip gu ’nggeuki ramme leine I ne a pî ne huakchangku gai bei de lei.

²⁶“ ‘Aize I ne besua’ngka gene teleugai’ndibe rasam ze nang ne seu mak mei? I ne ’ndâ ting gene teleu gai ’ndi de lei, chuna wangchang ra I tewgaibe zeu, chidezai nang ne namdi ka’ntipbe ramme ze tew’nsia ze tewhitruai gai ra hangge zeu,

²⁷chige kelungme ramme, penui ran tewkenuihuak kai nan, penui duânggarak kai ze, penui zeusiarak kai di, zai penui helu ge mâ-bang ramme gum chang di, zai hereubuâ gum chang di, heki’mpûm ramme ge hereubang bambe chîngchu makge perarît ne tew’nsia’ndibe gum changdibe zeu.

²⁸“ ‘Nang chube ka’ntaube benai tat ze wangbe, zai a peireige ning châkkakerâkbe tak ze I chî lei.

²⁹Nang ne a peireige ning châkkakerâkbe benai nang gechî-keditewbe rasam I seuchangdibe ziegene I ne a gu mâ-guak ning nêu ge kai gu lei, zai ning mui ge a gu (hekun mui ge kaibe) hegeîdâng kai gu lei, zai nang wangbe ’mpuî ’mbe I ne ningchu tei’ngngîn gai dai gu lei,’ kacheube zeu.

³⁰“Zai aize ning hangge dak ’nchetrabe chang ra lei: henai kûm ge pe runne puakpatbe zat ze ningnui teu ra lei, zai pakenabe kum ge chigene puakpat kadaibe ze teu ra lei; chipau châng pakechumbe kum ge helei ling ze perachî ze gatteu lau, zai grepchî merie tew lau, zai chiramme gu perachî raiteu lau.

³¹Zai Juda ki gu ziemmena chai’nsakpatme ring ze bamme ze pema hi’nchukgut ze perachî ’nchichu gu lei;

³²chai’nsakpatme Jerusalem gene zuapat ku, zai Zaion Loa gene ringpatme bau zuapat ku lei. Baudime gu Tingwang lungsuika’ntabe gene chize tew’nsang gai gu lei.

³³“Chipauziegene Assiria heguang tedeu ge aigum ze Tingwang ne kacheu lei: Aipau namdi ’mbe pa wang ra mak lei, makchai chige hetupie kap kai ra mak lei, makchai chipau namdi suage hinggei tei lu wang ra mak lei, makchai chize ’nggi ra ’mbaibâm hûmkuiki rua gai ra mak lei.

³⁴Pa wangbe ’mpuî luî-luî pa helattat ku lei, zai aipau namdi ’mbe pa wang ra mak lei, ze Tingwang ne kacheu de lei.

³⁵I ne aipau namdi je â, a ji hang ziegene benai a guâ ka’ngguapeu Dabidbe hang ziegene dangnam gai gu lei,” ze kacheu de lei.

³⁶Zai Tingwang gu angel zuapat ti de lei, zai Assiria gu tejeîki ge ziemmena chang haî-kat-ze riakdesat ze mengeume je gî ’ndi de lei; zai ziemmename hechuasûn chu dege, pie le lau, aime ramme ze kechaipum ’nnia laleu de lei.

³⁷Chidadege â Assiria gu heguang Sennakeribbe ’mbiatat ti de lei, zai tat lu Ninebi ge lung di de lei.

³⁸Dadege pe rapeu Nisrok ki ge pa kellum ze bamdibe luagene pe na hangna Adrammelekbe benai Sharezerbe ne pechu hiazutkie ne bichat ’ndi de lei, zai Araratram ’mbe pak kai di de lei. Zai pe bâm ge Esar-haddonbe ne kaheguang de lei.