Read Zeme Naga ISAIA 38 Bible Online

ISAIA 38 - Zeme Naga bible

ISAIA 38

¹Chipau ting ge Hezekiabe ’nrâ gai di de lei, zai chaitena bam di de lei. Dadege Amozbe na kemeu’mpeu Isaiabe pe dage wang de lei, zai pechu, “Aigum ze Tingwang ne rang lei: Ning kilûngkang teleu’ntia gai le du lau; nang â chai gu de lei, nang yipat ra mak lei,” ze kacheu lei.

²Dadege Hezekiabe ’mbie ’mbe pe ju ’nrik kai lu, Tingwang dage kellum gai de lei,

³zai acheu sa ze, “Chî bam lau, chunage Hei Tingwang gau, I ne ningchu kiam lei, lungsang gene benai helung suihuakpat ze I ning suage tat bambe, zai ning mikngau ge keyibe I ne tewgai’ndibe zeu,” ze kacheu de lei. Dadege Hezekiabe happuai bam di de lei.

⁴Chidadege â Tingwang gu sam Isaiabe dage wangkeu ze:

⁵“Tat ze Hezekiabe je, Aigum ze Tingwang, Dabidbe Rapeu, ning Rapeu ne rang lei: I ne ning gu kakellumbe kuâ seu lu de lei, I ne ning mikdui ngau lu de lei; pie le lau, ning ring ting ge tingkum kereu ze mengeu I ne kaisuâ gu lei.

⁶I ne ningchu lupat kai gu lei zai aipau namdi je du Assiria gu heguang ba gene lupat kai gu lei, zai aipau namdi je I ne dangnam gu lei.

⁷“Aize ning hangge Tingwang dagene dak ’nchetrabe lei, chi pa ne hetkai’ndibe Tingwang ne aize tewgairabe zeu:

⁸Pie le lau, Ahazbe gu pehî gu mâ-periâ ka’nchetbe zat peireige tingnaimik je tew’ngngîn-gaibeibe ge kezuikaupatbe ze periâ gu periâ ze set riâ kereu riâ ’ngngînwang dai de ra I ne tew gai gu lei,” ze kacheu lei. Chigum ze tingnaimik je tew’ngngîn gai bei ze pehî gu mâ-periâ ka’nchetbe peireige tingnaimik ze periâ gu periâ ze set kereu riâ ’ngngînwang dai di de lei.

⁹Juda gu heguang Hezekiabe pa ka’nrâbe yipatlube chângge pe gu mâ-rawgaibe:

¹⁰I ne sa ze, a rîting sing ge I tat sing gu lei; achu â Kechaiberam gu keriekemui ramme ge teitat kai bei de lei, a gu tingkum leine hangge zeu, kacheu de lei.

¹¹I ne sa ze, I ne Tingwang je ngau ra mak te lei, keringme ram ge zeu; ziemmena je I ngau dai ra ga de lei, kedeirei ge kebamme ruage zeu.

¹²A bâm â puipat lu a dagene lutua ’nde lei, melireîpeu gu hetiampaîki gum zeu; paîdakbe kau gum ze I ne a keringbe ’nzui gai ’ndi de lei; paîdakbe-ra gene achu â chiaptua ’nde lei; ’nrîmbeting gene tingmuî riâ nang ne achu tew’nzâu gai ’nde lei;

¹³’ngngâ gai ra I ne hechua riâ kûchang de lei; mâkau ne gum ze pa ne a ra ramme tewbet kam gai de lei; ’nrîmbeting gene tingmuî riâ nang ne achu tew’nzâu gai ’nde lei, ze kacheu de lei.

¹⁴’Ngngaine (’nruipoine) gum makchai krenruî gum ze I ’nrakehatgetie bam de lei, depeine gum I desui bam de lei. A mik â ’nrei ’mbe pie’ngngang-ngang leisei la de lei. Hei Tingwang gau, achu â tewgeted kai bei de lei; nang ne a hangge kereîbe-bangpui chang gai lau!

¹⁵Kane I ’ndaikau sadaichi ra lau? Pa ne achu ’mpau gai bei de lei, zai pa sing ne chize tew gai bei de lei. I â jei ta luisui di de lei, a keringbe bamkahereube ziegeneu.

¹⁶Hei Tingwang gau, airamme zene ziemmena ring lei, zai airamme leine ge I ring ze bam lei. Hei achu a ran tew’nchi gai dai ze achu ring bam ra tew gai lau!

¹⁷Ni, chize â, a deu hangge kegiebe de lei, a dage lungkahereube bambe zeu; kane nang ne a pum keringbe je reîgit ’ndi lei, tew’nggarabe hûmkuiki geneu, nang ne a hemui leine ning chai ’mbe tuâ gai ’ndi dadegeu.

¹⁸Kechaiberam ne ningchu pe suiyigaichi lak lei, kechaime ne ningchu toachi lak daseu; mi-mige hûm ge wangkeume â, ning gu lungsang pelingtewbe hangge heguîchi lak lei.

¹⁹Ring ze bambe kau, ring ze bambe kau, pa ne ningchu pe suiyi lei, I nemai bam gum zeu; hêpeume ne pe name je ning gu lungsang kapelingbe chî ra pei lei

²⁰Tingwang ne achu tew’nring gai gu lei, heleu’mmung kerua periapungbe ramme ge anui ne heleutew gai gu lei, Tingwang ki ge anui keringbe ting tâluî gezeu.

²¹Chunage Isaiabe ne sa ze, “Penui je peize grepchî tingku tei le lau, zai chize peize hejâm ge kai lau, dezai pa yi de ra hangge zeu,” kacheu lei.

²²Hezekiabe ne du sa ze, “Tingwang ki ’mbe I tatrabe hangge dak ka’nchetbe peibe ze ’ndaikau se lau?” ze kacheu de lei.