Read Zeme Naga ISAIA 39 Bible Online

ISAIA 39 - Zeme Naga bible

ISAIA 39

¹Chipau ting ge Baladanbe ne Babilon heguang Merodak-baladanbe, ne Hezekiabe ’nrâ bambe ze yipatdaidibe rasam seu lu dege pe tailam samkela leisikuak benai kela ze teitat ra hepâupaume je lang gai de lei.

²Dadege Hezekiabe penui je pe suiyi ze kahedau de lei; dadege pa ne penui je pe gu keruaki ngualia de lei, pe gu keruaki ge bambe zat leine, gepût, gechâk, perîmyibe reheumoîne, taudui pemîhungbe, pe gu herei kerua bambe leine zeu. Hezekiabe ne penui je teiliamaktaibe zat pe ki ge mâ de ga di de lei, teilia kam bei de lei.

³Dadege kemeu’mpeu Isaiabe Heguang Hezekiabe tailam wang lu, pechu, “Aime bau ne ’ndaikau sa gai lau? Zai ’ndai’nggene penui ning dage wang lau?” ze kacheu de lei. Hezekiabe ne sa ze, “Penui a dage heram kedeu ’mbene wang lei, Babilon geneu,” kacheu de lei.

⁴Pa ne sa ze, “’Ndaikau penui ning ki ge ngau lau?” kacheu de lei. Hezekiabe ne kak ze, “Penui ne a ki ge kebambe zat leine ngau kam de lei; a gu keruaki ge I ne penui je teiliagaimaktaibe mâ de ga de lei,” kacheu de lei.

⁵Chidadege Isaiabe ne Hezekiabe je, “Baudime gu Tingwang gu sam ze seu le lau:

⁶Pie le lau, beting wang mui de lei, ning ki ge bambe leine, zai nemai riâ ning paume ne hekâmchangbe leine Babilon ’mbe teitatkai’nderabe ting zeu; mâ de ’nsakdiak kai ra mak lei, ze Tingwang ne kacheu de lei.

⁷Zai ning name hanggesame ning dagene piakeume je nguatat ’ndu lei; zai penui ze Babilon gu heguang ki ge kahetiâme chang ze bam gu lei,” kacheu de lei.

⁸Chidadege Hezekiabe ne Isaiabe je, “Tingwang gu sam nang ne sagaibe ze yi-desang lei,” ze kacheu de lei. “A ting ge desieyibe lungkatemibe benai hereuka’nnanggabe dau gu de lei,” ze pa ne ’nninggailube ziegeneu.