Read Zeme Naga ISAIA 4 Bible Online

ISAIA 4 - Zeme Naga bible

ISAIA 4

¹Zai chipau ting dezai â ’mpuimi hangsena ne ’mpeumi hangkat je tuî lu, “Anui gu hetak ne teu ze anui paîni ne kai dui lei, ning ji ne anui ji hangge kû gai bei zai kam de lei; anui ka’ngngambe ngaurabe tei’mbai gai lau,” ze acheu gu lei.

²Chipau mai dezai â Tingwang gu pekiâng ze peluiyi zai pengêudi ze bam gu de lei, zai kedei rachî yibe zene Israelme ’nsakpatme hangge hegiêrabe benai pengêudibe chang gu lei.

³Zai Zaion ge ’nsakkaidiakbe kau, zai Jerusalem ge bamkuâ ze bambe kau je â ka’nchibe kau ze kû gu de lei, Jerusalem ge ring’nsakpatme ruage heji rawgaibe kau leine zeu.

⁴Tingwang ne samrambe herui benai kerube (getaube) hemi gene Zaion na’mpuimi ramme kahebâbe benai Jerusalem gu hejairai gutkaidibe penui ruagene huika’nchibe mai dezai ai.

⁵Chidezai â Zaion deiloa peireige pelane zai chige wangka’nduime leine peireige tîngna ge kemâu, zai tingmuî ge hemika benai hemimelei ne tauba ze bam ra Tingwang ne tew gai gu lei; pengêudibe leine peireige dangnamrabe benai ’nseurabe bam gu daseu.

⁶Chize ne ’nrîmbeting ge kelumbe gene ’nseugairabe kezui chang gu, zai tingkaichibe benai tingruibe ge ’ndun gai ze ’nseugairabe hang chang gu lei.