Read Zeme Naga ISAIA 40 Bible Online

ISAIA 40 - Zeme Naga bible

ISAIA 40

¹Temichai ze bam lau, temichai ze bam lau, a gume gau, ze Tingwang ne kacheu de lei.

²Yine ze Jerusalem je ’mpau gai lau, zai pechu pau gai ze ’nrung’nchi lau, pe gu hereika’nggibe ting ze â tud kai de lei, pe gu hemui-helut ze â lun gai ’nde lei, pe gu hemui ramme leine ziegene Tingwang ba gene dêt na pa ngau lu de lei.

³Hekua ’nrungpat ze: “Hênamchangbe heram ge Tingwang gu ’mpuîki teleu’mmi gai kuâ lau, tingkangram ge puidi anui Rapeu hang teleu’nzei gai lau.

⁴Pekâm-pechuak leine ze teichu’ngngu gai bu lei, zai kedeiloa benai peloa leine ze teikeu’nna gai bu lei; kedei katehutbe bâm ze ’nsam du lei, zai katingrungbe bâm ramme ze tenaitai gai du lei.

⁵Zai Tingwang ngeudibe ze rapatlia gai gu lei, zai ziemmena hemeipum leine ne chize ngau kam gu lei, Tingwang mui gene sa gai ’ndi daseu,” ze kacheu de lei.

⁶Hekuapatbe zene rang ze, “’Nrung ze rang gai du lau!” kacheu de lei. Dadege I ne, “I ne ’ndaikau rang gai ra lau?” kacheu de lei. Ziemmena hemeipum leine â hereubuâ de lei, zai penui dage mâ-yibe bambe leine ze peningkâm ge hêrapâ gum lei.

⁷Hereubuâ kîkeruî gai di, hêrapâ heguî gai di de lei, chiramme peireige Tingwang chui ’mmut kai bei degeu; ziemmena â hereubuâ run de lei.

⁸Hereubuâ kîkeruî gai di, hêrapâ hui gai di de lei; kane Hera gu sam â betingbeta sapbam gu lei.

⁹Nang kedeiloa kehube ge chu du lau, Hei Zaion gau, hesuiyibe sam rangba gai du lei; ning rankechi ’nrung gai du lei, Hei Jerusalem gau, hesuiyibe sam rangba gai du lau, ’nrung gai du lau, hing se lau; Juda gu namdi ramme je, “Pie le lau, ningnui Rapeu!” acheu ze sa gai lau.

¹⁰Pie le lau, reziechibe gene Tingwang Hera zuawang lei, zai pe hangge pe ba ne samram gai lei; pie le lau, pe gu getoabehi ze pe ba ge la lei, zai peipuigairabe ze pe suage la lei.

¹¹Melireîpeu hangkat gum ze pa ne pe gu melidung je guî gu lei, pa ne melipoine ramme je pe ba ne kebauwang gai gu lei, pa ne penui je pe ga gene tuipua gu lei, zai bepoine kanguabe kau ramme je ’nduî ze nguatat ku lei.

¹²Châu ne sungkling pe bakuî gene ’ndeu lu lau, ai châu ne tingkehube pe bakêrang ne ’ndeu lu lau, chua ne kedeiniamoîne ’ndeu ra kaigut kam lu lau, zai châu ne kedeiloa ramme hedukuak gene ’nchu lu lau, zai châu ne peloa ramme hedukuak kena gene ’nchu lu lau?

¹³Châu ne Tingwang gu Herui hangge getei ze gechiauliâ lu lau, makchai pechu nguakageteipeu gum ze geteilia lu lau?

¹⁴Tingwang pe hangge yi ra châu je pa ka’mpau lau, zai châu ne pechu mâ-peling ka’nzeibe ’mpuî getei gai lau, zai mâ-siechibe ’mpuî ngualia gai lau?

¹⁵Pie le lau, heramzatme ramme â, heli gene heduichipum zâukeube gum lei, chiramme je hedukuak ge kedeiniamoîne bambe riâ ze sei lu lei; pie le lau, kedeiniamoîne riâ ze pa ne heduiluaka’nggua bâm ramme je teichu lei.

¹⁶Lebanon ze hemi hetak hangge cham gu lei, zai pe gu hekaubena ramme ze kerube-râtewbe hangge cham lei.

¹⁷Heramzat ramme leine ze pe suage mâ de gabe ’ndeî lei, penui je â pa ne mâ de sei gai ra gabe riâ lei.

¹⁸Acheuzai Tingwang je ningnui châu je ’nning’nzua gai ra lau, makchai pechu teikeda ra ka’nzuâbe ’ndaikau lau?

¹⁹Heraluîtewbe ze hêu! Tâtewpeu ne chize peluî hang langluapat kai lei, zai luapeu ne chize gechâk ne luachim gai lei, zai chipau hangge gepût teuria tewpat kai lei.

²⁰Kelaksia ra tewgaibeipeu ne herâtewbe peipatrabe hangge riam’nsialakbe heching kagepa lei; hechiâm chiamchibe kau je pa peu de lei, ’ngngaimakrabe mâ-luîtewbe teichu gai ra hangge zeu.

²¹Ningnui chî mak mei? Ningnui seu mak mei? Bepîbang gene aize ningnui je â rang gai mak bei mei? Kedei ’ndamchugaibe gene nang â chî mak ze bam mei?

²²Kedeirei gua luî peireige ka’ntaupeu ze pa de lei, zai chige lungme ramme ze â, tîngkau ramme gum de lei; kehube ze paî gum liâmpatkaipeu, zai hetiamki ziemmena bam ra liâmpat kai gum ze chiramme liâmpatkaipeu;

²³heguangsinme ramme je matâu hang ga ra tewgaipeu, zai kedeirei ge samramme je matâu hang ga ra tewgaipeu zeu.

²⁴Penui je â tau sâng tau gai lei, ling sâng ling gai lei, penui gu pebang ze kedei ge pema ret sâng retbe runne lei, pa ne penui peireige ’mmut kai bei dege chiramme kîkeruî gai di lei, zai tingkaichibe ne chiramme je chêuriepum je gum ze guitat ti de lei.

²⁵Chidaze châu je ningnui achu teikeda gai ra lau, I pa gum bamrabe hangge zeu? ze Ka’nchibe Hangkat ne kacheu de lei.

²⁶Ningnui mik kehu ’mbe rakchu ze pie gai ni lau: Châu ne airamme tew gai lau? Penui dungdi bam ra kat-katne ze nguapatkaipeu ne chiramme je penui ji ji ne ku lei; pa tâtewchibe kedibe gene, zai pa â pe gu reziechi dadege katte ga mak lei.

²⁷’Ndaitew ze nang rang lau, Hei Jakobbe gau, zai ’ndaitew ze nang sa lau, Hei Israel gau, “A ’mpuî â Tingwang dagene tei’mbai ’nde lei, zai a gu I ka’nzeibe ze a Rapeu ne mâ-hang chak kai mak bei de lei,” ze acheu zeu.

²⁸Nang chî mak mei? Nang seu mak mei? Tingwang â betunmakbe Rapeu de lei; kedeirei mik medai tewgaipeu zeu. Pa â pe ran-gakeu mak zai leikeu me lei, pe gu mâ-gechîbe tak â ’nningchanglakbe kau lei.

²⁹Peran-gabe kau je pa ne gechibe pei gai lei, zai pa ne peran-gabe kau je peran tewpung gai lei.

³⁰Hename peranchime heran-ga gai di ze leikeu gu lei, zai hename leikehuisiak kai gu lei;

³¹kane Tingwang je kuâbamme ne penui ran tewrechi gu lei, keliengdi ramme gum ze penui kan ne kehu ’mbe liamchu gu lei, penui pak ku zai leikeu ra mak lei, penui tatrua gu zai penui ran-gakeu ra mak lei.