Read Zeme Naga ISAIA 41 Bible Online

ISAIA 41 - Zeme Naga bible

ISAIA 41

¹Rimbe gene a kuâ ’ngking lau, Hei, hedui luaka’ngguabe bâm ramme gau; peize hezatramme ne penui ran tewrechi lau; penui ne peize zuawang’nna lu sam sa lau; samramrabe hang anui zuawang’nna kam gai kei lei.

²Tingbia ’mbene châu ne hangkat je hû’nrakchu gai lau, pe pikiâm leine ge kengambe daubepeu zeu? Pa ne heramzat ramme je pe masua gene put kai bei de lei, chidezai pa ne heguangme ramme je chaîkeniak kai ra hangge zeu; pa ne penui je hiazutkie ne kedeiniamoîne gum ze tewniang gai bei de lei, pe gu bai’mpi ne chêuriepum gum ze tingkai ge kîchu gai bei de lei.

³Pa penui je gua’nchu ze mâ de pechu tewneu gai mak paktat bam lei, ’mpuîki ramme ze pe pî ne mâdau tat kai mak lei.

⁴Châu ne aize tew gai lau, bepîbang keraîbe ting gene rehei ramme je kû gai zeu? I, Tingwang, raîlangbe benai nâlangbe ne lei; I ze Pa lei.

⁵Heduiluaka’ngguabe bâm ramme ne ngau lu ze hing di de lei, kedeirei mik medai zene kedun ze bam lei; penui wanghechut kai de lei.

⁶Mi-mige ’nteumena ne pe kining kau je ka’ngngâ lei, zai pe sikina’mpeu je, “Helungdi ze bam lau!” kacheu de lei.

⁷Heching ne hechiâm-chiampeu zene gechâk langpeu je dam’ngnguplai gai lei, zai tediak ne gekeukatenaipeu zene timtung kakedeîpeu je dam’ngnguplai gai lei, chi mâ-luakaheluabe geze “Tew’mmi de lei,” ze acheu zeu; zai chi tew’ngngai dai me ra hangge penui ne hegeîkeriaktu ramme zene gia’ntip kai lei.

⁸Kane nang, Israel, a guâ ka’ngguapeu, Jakobbe, I ne kelânggaipeu, Abraham chana, a kangpeu gau;

⁹nang kedeirei mik medai gene I ne ngualupeu, zai chi pemik deulangbe ramme gene I ne ningchu “Nang â a guâ ka’ngguapeu de lei, I ne ningchu kelâng gai de lei, zai ningchu tuâpat kai me lei,” ze acheu ze kûlupeu gau;

¹⁰hing se lau, I ne ning dage la lei, helungchei ze bam se lau, I ne ning Rapeu chang ze la lei; I ne ningchu ning ran tew’nchi gai gu lei, I ne ningchu ’ngngâ gu lei, I ne ningchu a hezat’mbia ba keduîbe ba ne diegugit kai gu lei.

¹¹Pie le lau, nang ngausia ra tewme leine je â, tew’ngngam gai bu lei zai tewhelêu gai bu lei; ningchu ka’nggime â ’ngga gai du lei.

¹²Ningchu karengetme je nang peu gu lei, kane nang ne penui je peudau ra mak lei; ningchu kahereime ze mâ de tewchi lak ku lei.

¹³I, Tingwang ning Rapeu ne ning ba hezat’mbia ba teigit la daseu; ningchu, “Hing se lau, I ne ningchu ’ngngâ gu lei,” kacheupeu ze I de lei.

¹⁴Hing se lau, nang tingseibe Jakobbe gau, ningnui Israel gu ziemmename gau! I ne ningchu ’ngngâ gu lei ze Tingwang ne kacheu de lei; ningchu Ripatpeu â Israel gu Ka’nchibe Hangkat ze de lei.

¹⁵Pie le lau, I ne ningnui je chêulakbe hingbuak hang tew gai gu lei, karchibe, peliarekingbe, zai pegeu bambe zeu; nang ne kedeiloa ramme nei ze chiramme lakniang gai gu lei, zai nang ne peloa ramme ze chêuriepum gum bam ra tew gai gu lei;

¹⁶nang ne chiramme tingkaikelap kai bei ze tingkai ne chiramme guitua gu lei, zai tingkaichibe ne chiramme je guirarip ’ndu lei. Zai Tingwang ge nang ning suî’nta ze bam gu lei, Israel gu Ka’nchibe Hangkat ge nang ning ngeudi ze bam gu lei.

¹⁷Lungchulakme benai kegame hedui peu de lei, zai hedui ga lei, zai herei ze penui lei chang gai di de lei, I Tingwang ne penui kuâ kak kai gu lei, zai I Israelme Rapeu ne penui je put kai ra mak lei.

¹⁸Kedeiloa ramme ge ’nggeuki ramme I ne lat kai gu lei, zai peningkâm ramme zuilung ge depin ramme lat kai gu lei; I ne hênamchangbe ze hezaisungbe bâm hang tew gai gu lei, zai kedei changbe bâm ze hedui depin ramme hang tew gai gu lei.

¹⁹Hênamchangberam ge I ne kedarbang, akasia ching bang, Murtel chingbang, zai olib chingbang kai gu lei; tingkangram ge I ne sipress chingbang, plan chingbang zai chingkeleu bang ze kai gu lei;

²⁰chidezai ziemmename ne Tingwang ba ne aize tew gai lei be, Israel gu Ka’nchibe Hangkat ne aize ’ndam gai lei be ngau lu chî lu ze peize ’nning ze chî kam le ra hangge zeu.

²¹Ningnui tûdeu ze pei gai lau, ze Tingwang ne kacheu de lei; ningnui ’nzei dambe sam ramme teiwang lau, ze Jakobbe gu Heguang ne rang gai lei.

²²Chiramme (heraluîtewbe ramme) ze peize teiwang gai lau, dezai ’ndaikau wangchang ra mei anui je rang gai lau. Tingtie gu mâ-mâ ramme anui je rang gai lau, ’ndaikau ramme mei be zeu, chidezai penui dage ’ndaikau chang la mei be anui chilerabe ze anui ne chiramme ’nning gai ’mmi ra hangge zeu; makchai mâ-mâ wangrabe ramme anui je rang’nchichiak kai lau.

²³Bechâng dezai mâge â, wangchangrabe anui je rang gai lau, chidezai ningnui â, hera ramme de lei be anui chî le ra hangge zeu; mâ-yibe tew gai lau, makchai tewhereu gai lau, dezai anui helung cheikeu ze hing de ra hangge zeu.

²⁴Pie le lau, ningnui â ’nta de lei, zai ningnui gu tâ ramme â ’ntakû kau de lei; ningnui je kakelângbe kau â mi katenetbe kau de lei.

²⁵I ne hangkat je tingpeî ’mbia ’mbene nguachu gai de lei, zai pa zuawang de lei, tingnaimikchube geneu, zai pa ne a ji ge kû gu lei; hegamli langpeu ne timdeu huakkagetie gum ze pa ne samramme peireige huakgetie gu lei.

²⁶Bepîbang keraîbe ting gene châu ne aize rangba gai lau, dezai anui chî ra, zai besua’ngka gene “Pa â gesang de lei” be ze anui sa le ra hangge zeu? Chize mî du rangbagaibe kau ga lei, paugaibe kau ga lei, ning sam ramme geseube kau ga lei.

²⁷I ne Zaion je salia gai rai de lei, zai I ne Jerusalem dage misuiyibe sam saruapeu pei gai lei.

²⁸Kane chige I pie gai dege mî du ga lei; aime (hera ramme) ruage mâ-nguageteirabe kau ga lei, I ne mâ-neu gai dezai kakrabe kau zeu.

²⁹Pie le lau, chiramme leine mâ-karasa kau lei; penui tatew ramme ze ’ntakû kau lei; penui gu heramiê hekilube ramme ze â, peruânggabe ge tat kai lei.