Read Zeme Naga ISAIA 42 Bible Online

ISAIA 42 - Zeme Naga bible

ISAIA 42

¹Pie le lau, I ne ’nggumbampeu, I ne kelânglupeu, a lungsuika’ntapeu, a guâ ka’ngguapeu zeu; I ne pe peireige a Herui kai bei de lei, pa ne heramzatme dage peling-gesangtewbe teiwang gai gu lei.

²Pa ’nrung ra mak zai pe kuâ du pat kai ra mak lei, makchai keloa’ndi ge pe kuâ seu ra pe runne pe kuâ tewpat kai ra mak lei;

³hekupum kat puptibe ze pa ne tew’nsia gai ra mak lei, zai kachâlei taumuîrui bambe pa ne tew’mmit kai ra mak lei; pa ne samrambe kapelingbe pe suiyi ze teiwang gai gu lei.

⁴Pa â pe ran-gakeu ra mak lei, makchai pechu tew’nsia kam gai ra mak lei, kedeirei ge tâ peling-gesang pa tewbe tew kam gai mak tânege zeu; zai hedui luaka’ngguabe bâm ramme zene pe gu hingde hangge kuâ ze bam lei.

⁵Hera, Tingwang, tingkehube tew gai ze liâmkengâpatkaipeu, kedei kâmpatkaipeu, zai kedei benai chigene patbe kâmpatkaipeu, chige kebamme dage pe chuilu peigaipeu, zai chige tatruame dage keringbe lung peigaipeu zene acheu ze sa ze:

⁶“I ze Tingwang lei, I ne ningchu kapelingbe gene kû gai lei, I ne a ba gene ningchu tei lu reî bei de lei; I ne ziemmename je samhatkaibe kat pei gai bei de lei, kebabe ze heramzatme dage pei gai bei de lei,

⁷hemikchime mik ramme lat kai ra, kebangki ge bamme je kemuîbeki gene nguapat kai ze kebang chang ze kemuîbe ge ’ntau ze bamme je nguapat kai ra hangge zeu.

⁸I ze Tingwang de lei, chize a ji de lei; a ngeudibe ze â mî je du I pei mak lei, zai a ngeudibe getoabe ze du heraluî hekilube ramme dage pei gai mak lei.

⁹Pie le lau, besua’ngka ge mâ-mâ ramme ze wangchang kam de lei, zai chunage I mâ-karchibe rangba gai kadai lei; chiramme zuachu mak ’ngkage chiramme ze I ningnui je rang gai de lei,” ze kacheu de lei.

¹⁰Tingwang je heleu karchibe leu kat tew gai lau, kedei mik deulangbe gene pe ji dibe je heleutew gai lau! Sungkling benai chige bambe zat leine, heduiluaka’ngguabe bâm ramme benai chige kelungme ramme ne peize toa’ndi ze bam lau.

¹¹Tingkangram benai namdi bambe ramme zene peize penui kuâ’nrungchu’ngngu gai lau, kedar ne kelungbe keloa ramme ne peize penui kuâ’nrungchu’ngngu gai lau; Sela ge bamme ne peize hesuiyi ze leutew lau, kedeiloa ramme ’ntûm gene peize penui ’nrung lau.

¹²Peize penui ne Tingwang je hengêukedibe pei lau, zai heduiluaka’ngguabe bâm ramme ge peize pechu getoabe pei lau.

¹³Tingwang ne ziemmena peranchipeu gum ze zuapat, hereika’nggipeu gum ze pe lumpumpat lei; pa ’nrungpat kai lei, pa ’ngkiaksiak kai lei, pe reime peireige pa’nret tewlia gai lei.

¹⁴Betinggetie I ne a kuâneu mak bam de lei, I bamsip bam ze a runne achu gesut ze bam lei; chuna â I ’mpuimi hangkat ne henalung ra ’nraka’nsua gum ze I ’nrungpat ku de lei, I a chui-lukehie gu lei.

¹⁵I ne kedeiloa ramme benai peloa ramme tew’nsia gai gu lei, zai penui gu mâ-neu keringbe leine tewlai gai gu lei; I ne ’nggeuki ramme ze heduiluaka’ngguabe bâm ramme chang ra tew gai gu lei, zai hezai (hedui) sungbe ramme tewchang gai gu lei.

¹⁶Zai I ne mikchitme je nguatat kai gu lei, penui chimakbe ’mpuî ge zeu, penui ne chimakbe ’mpuîki ’mbe I ne penui je nguatat kai gu lei. I ne penui suage kemuîbe bambe ze kebabe chang ra tew gai gu lei. Pebâm siabe ramme ze pebâm yibe bâm chang ra tew gai gu lei. Airamme ze I ne tewrabe tâ ramme de lei, zai I ne penui je put kai ra mak lei.

¹⁷Penui je tei’nreiwang gai dai bu lei, zai penui je tew’ngngamtuang gai bu lei, heraluî hekilube ramme ge ’nnumtewme, langlualube heraluî ramme je, “Ningnui ze anui gu hera ramme de lei,” ze kacheume bau jeu.

¹⁸’Ngking le lau, ningnui kunpangme gau; zai pie gai lau, ningnui mikchitme gau, ningnui ngauchi le ra hangge zeu!

¹⁹Châu pe mikchit lau a guâ ka’ngguapeu runne zangno, makchai châu pe kunpang lau I ne langgaipeu a guâ ka’ngguapeu runne zangno? I ne diepat’nchigaipeu gum ze châu pe mikchit lau, makchai Tingwang guâ ka’ngguapeu gum ze châu pe mikchit lau?

²⁰Pa ne mâ-mâ misongga ngau la lei, kane chiramme ze pie ze ’nchet mak lei; pe kun kena lat la lei, kane pa ne seu mak lei.

²¹Tingwang pe gu kapelingbe hang ziegene pe suiyi lei, pe gu hingde ngeutew’ndi gai ra hangge zeu.

²²Kane aime ze penui dagene sut ze teitatkam’ndime bau de lei, penui â mâ-kuiki ge mi gai di ze kebangki ramme ge ’mbaigaidime bau de lei; penui â mî ne de meupat kai ra ga ze miramme hetak hang chang gai di de lei, penui je mî ne de, “Penui je lang gai dai be lau!” acheu gai ra ga ze hereichâ hang chang gai di de lei.

²³Ningnui ruage châu ne aige pe kun ’ndualie gai ze, beting wang dezai châu ne wang ze ’ngking gai ra lau?

²⁴Châu ne sut-teupeu dage Jakobbe je peipat kai lau, zai châu ne Israel je kedungteume dage peipat kai lau? Pe dagene anui hemuigai’ndipeu, Tingwang ne mak mei, penui ne pe gu ’mpuî ge tat mak ze pe gu hingde kuâ pheumakbe ziegeneu?

²⁵Chigum ze pa ne pe lumpumted benai hereigechibe ze pe peireige ruîkeu gai bei de lei; pechu hemi ne kaiguâ gai bei de lei, kane pa ne chize ’nningchi mak tai lei; chize ne pechu rû ’ndi de lei, kane mâ-hang du ’nning gai mak tai lei.