Read Zeme Naga ISAIA 43 Bible Online

ISAIA 43 - Zeme Naga bible

ISAIA 43

¹Kane chunage Tingwang ne aigum ze rang lei, ningchu ’ndamgaipeu zeneu, Hei Jakobbe gau, ningchu tewgaipeu zeneu, Hei Israel gau: “Hing se lau, I ne ningchu ripat kai bei de lei; I ne ningchu ning ji gene kû gai bei de lei, nang ze a gu de lei.

²Nang hedui ge tatkabe luage I ning dage bam gu lei; zai hedui ne ningchu naîchim ra mak lei; nang hemizeu tatkabe luage ningchu rû ra mak lei, zai melei ne ningchu rû’ngga ra mak lei.

³I â Tingwang ning Rapeu, Israel gu Ka’nchibe Hangkat, ning gu Tewka’nringpeu daseu.

⁴Nang â a mikngau ge mâ-pemîhungbe kau chang, zai I ne ningchu ’nning’ndi ze bam, zai I ne ningchu kehungbe ziegene I ne ning hangge ziemmena peiruî gai de lei, zai ning gu keringme hangge hezat ramme je hiak kai ra de lei.

⁵Hing se lau, I ne ning dage la lei; tingbia ’mbia gene I ne ning haîhikme je nguawang gai gu lei, zai tingrun ’mbia ’mbene I ne ningchu nguawang gai gu lei;

⁶I ne tingpeî ’mbia je, ’Mpat kai be zu lau, ze acheu gai gu lei, zai tingpî ’mbia je, Nam ta lau, ze acheu gai gu lei; kedeu ’mbene a name ’mpeumi ramme je nguawang lau, zai kedeimik deulangbe gene a name ’mpuimi ramme je nguawang lau,

⁷’nteumena a ji ne kûbamme, a ngeudirabe hang I ne ’ndamgaime, I ne teleugaime jeu,” ze acheu zeu.

⁸Baudime penui mik bam lu penui mik chittime, penui kun bam lu penui kun pangdime je nguapat kai zu lau!

⁹Heramzatme leine je nguagekumwang gai du lau, zai peize hezatme ramme je wang’ndui gai zu lau. Penui ruage châu ne aize rangba gai dui lau, zai châu ne anui je tingtie gu mâ-mâ ramme teilia gai dui lau? Chiramme ’nning’nzei gai ra hangge penui gu sakki ramme peize penui je teiwang lau, zai peize penui je seu lu, aize â gesang de lei, ze acheu lau.

¹⁰“Ningnui ze a gu sakki ramme de lei,” ze Tingwang ne kacheu de lei, “Zai a guâ ka’ngguabe kau I ne kelânggai’ndipeu zeu, dezai ningnui ne achu chî lu ’nnum’mmi le ra, zai I ze Pa de lei be chî’mmi le ra hangge zeu. Achu sâu ze hera mî de pat me lei, zai achu sâu ze hera mî de bam ra mak lei.

¹¹I, I ze Tingwang de lei, zai achu sâu ze ripatpeu kêdabe ga lei.

¹²I ne rang’nchichiak kai ze tew’nring gai ze, zai pau gai de lei, ningnui dage hera heluîchâmbe ga’ngka ge zeu, zai ningnui ze a gu sakki ramme de lei,” ze Tingwang ne kacheu de lei.

¹³“I â Hera de lei, zai aigene du I ze pa de lei; a ba gene mî de lupatduibe kau ga lei; I tâtewbe châu ne tew’ntau dui lau?”

¹⁴Tingwang, ningnui je Ripatpeu, Israel gu Ka’nchibe Hangkat ne aigum ze rang lei: “Ningnui hang ziegene Babilon ’mbe I lang gai ze kerie ’ngkamcha ramme rakeu gai gu lei, zai Kaldiame kakebiengbe kuâ ze puîhapbe hang chang dai du lei.

¹⁵I ze Tingwang, ningnui gu Ka’nchipeu, Israel je Ka’ndampeu, ningnui gu Heguang de lei,” ze acheu zeu.

¹⁶Tingwang, sungkling lungge ’mpuîki hang tewgaipeu, chi hedui peranchibe ge ziemmena tatbe ’mpuîki bambe tewgaipeu

¹⁷timriang ramme benai hekun ramme, hereikangme bau benai kahereipeu je nguawanggaipeu ne aigum ze rang lei; penui jeikau gai di de lei, penui chudaichi lak lei, kachâpaîrie gum ze penui ’mmitkeu di ze gagaidibe ze:

¹⁸“Besua’ngka gu mâ-mâ ramme chibam ta zu lau, zai tingtie gu mâ-mâ ramme ’nninghekuî bam ta du lau.

¹⁹Pie le lau, I ne mâ-karchibe tew lei; chize chuna pat la lei, ningnui ne chize chî mak mei? I ne hênamchangbe heram ge ’mpuîki kat tew gai gu lei, zai tingkangram ge ’nggeuki ramme tew gai gu lei.

²⁰Mâ-rekaune ramme ne a ngeutew gu lei, zai munserung ramme benai ostrikruî ramme ne a ngeutew gu lei; I ne hênamchangbe heram ge hedui pei bei, zai tingkangram ge ’nggeuki ramme kai bei daseu, kelânglume a gume,

²¹I ne a hangge teleugailume ziemmename je sak ra pei ra hangge zeu dezai penui ne a ngeudibe rangba gai ra hangge zeu.

²²“Acheusede nang ne achu kû gai mak ta di lei, Hei Jakobbe gau; kane nang ne a peireige leikeu di de lei, Hei Israel gau!

²³Nang ne ning gu meli rûkambe-râtewbe hang a dage teiwang gai mak lei, makchai ning gu herâtewbe peipatbe ramme zene du achu a ngeutew gai mak lei. Kela peipat ra ranggaibe zene I ne ning put tewrit kaisuâ me lei, makchai mâ-perîmyibe ka’ntaube zene ningchu tewlei gai sua me lei.

²⁴A hangge nang rangkâng ne mâ-perîmyibe lui gai mak lei, makchai ning gu herâtewbe meiji châ ne achu a suigut tewchang gai mak lei. Kane ning gu kahemuibe ramme zene achu a put tewrit kai bei de lei, nang ne ning gu hemui-helut ramme zene achu tewlei gai bei de lei.

²⁵“I, I ze Pa de lei, a ji hang ziegene ning gu hedieka’ngkabe ramme tew’nggagaipeu zeu, zai I ne ning gu hemui ramme chibam ra mak lei.

²⁶Tattibe ramme ge achu ’nningchang gai lau, anai mâ-deu hepan gai kei lei; ning gu tûdeu kai gai du lau, dezai ningchu tew’nzei gai be ra hangge zeu.

²⁷Ning peu keraipeu ne hemui gai lei, zai ningchu ka’ngguame ne a peireige hedieka’ngkabe tâ tew gai lei.

²⁸Chipauziegene kakellumbe bam gu besuitewme je I ne tewhebâ gai lei, Jakobbe je tew’nsia kam gai ra, zai Israel je sa’nsia gai ra I ne peipat kai lei.