Read Zeme Naga ISAIA 44 Bible Online

ISAIA 44 - Zeme Naga bible

ISAIA 44

¹“Kane chunage seu le lau, Hei a guâ ka’ngguapeu Jakobbe gau, I ne kelânglube Israel gau!

²Tingwang, ningchu tewgaipeu, nebâm ge ningchu ’ngkau ra tewgaipeu, zai ningchu ’ngngârapeu ne aigum ze rang lei: Hing se lau, Hei a guâ ka’ngguapeu Jakobbe, I ne kelânglupeu Jeshurun gau.

³Hedui kahereibe heram ge I ne hedui ruî gai gu, zai kedeichangbe bâm ge ’nggeuki hedui lua ra tew gai gu daseu; ning haîhikme peireige I ne a gu Herui ruî gai gu lei, zai ning chaname peireige a gu ’nnamgaibe ruî gai gu lei.

⁴Hedui zuilung gene hereubang gum ze penui ’ntuachu gu lei, ’nggeuki heduiluabe taige ’ntauching bang bam gum bam gu lei.

⁵Ai hangkat ne, ‘I ze Tingwang gu lei,’ acheu gu lei, kêdapeu ne Jakob ji ne pe ji hang tei ze bam gu lei, kêdapeu ne pe ba ge, ‘Tingwang gu changbe’ acheu ze raw gai gu lei, zai Israel ji zene pe ji hang kûgailêu ze bam gu lei,” ze acheu zeu.

⁶Tingwang Israel gu Heguang, zai pe gu Ripatpeu, baudime gu Tingwang ne aigum ze rang lei: “I ne raîlangbe benai nâlangbe lei; achu sâu ze Hera kêdabe mî de ga lei.

⁷Châu I gum lau? Peize pa ne aize ze pau gai lau, peize pa ne rangpat’nchi gai lau zai chize a masuage teipat kai lau. Châu ne mâ-mâ wangrabe ’ndâting gene rang gai ’ndi lau? ’Ndaikau wangchang ra larei mei be peize penui ne anui je rang gai lau.

⁸Hing se lau, zai ’ngngim de ’ngngim se lau; ’ndâting gene I ningchu rang gai mak mei, zai rang’nchi gai mak mei? Zai ningnui ze a gu sakki ramme mak mei! Achu sâu ze Hera la mei? Tingchutum kedibe ga de lei; I â mâ du bambe chî me lei,” ze acheu zeu.

⁹Ziemmena heraluî chiampatbe kau ramme leine ze ’ntakû kau ramme de lei, penui ne ka’nchâbe zat ramme ge mâ de pegiê ga lei; penui gu sakki ramme ze ngau de ngau mak zai chî de chî mak lei, penui je tew’ngngam gai be ra hangge zeu.

¹⁰Mige ne heraluî tak hang chiamgaibe makchai mâ-luî hang luagaibe ze mâ-pegiê hang ga mei?

¹¹Pie le lau, pe kangme ramme leine je tew’ngngam gai bu lei, tâtewme ze â ziemmena sâng ziemmena lei; penui ’nteumena je peize wang’ndui gai lau, peize penui je pat ze sap kai lau, penui hing-desang du lei, penui je tew’ngngam kam gai bu lei.

¹²Hegeî ne hechiâm-chiampeu ne chize peluîtak hang chiam lei, zai hemi-mechingkâng peirei gene chize tâtew lei; pa ne tediak ramme ne chize peluîtak hang kaheki lei, zai chize hemi ne rû ze pe baranchibe ba ne kakedeî lei; pa (tak) ’njei di ze pe jiesia di de lei, pa hedui sak mak ze pe ran-ga di de lei.

¹³Heching ne hechiâm-chiampeu ne mâ-ka’ndeube-ria gîngpat kai de lei, chize leisitang ne ’nrit ze mâ-’nchet kai de lei; pe gu tâtewbe kerua ramme zene peluîtak hang ’ndam ze kateleu de lei; pa ne chize ziemmena luîtak ’ndampat kai de lei, hekilung ge kai ra ziemmena luî hang chiam zun gai de lei.

¹⁴Pa ne kedarching bang ramme kuîkau gai de lei; makchai pa ne hom chingbang mei nune ’mpu bang mei be gepapat kai lu ’nrêuzeu ge hingbang ramme ruage ’nzuak kai de lei; pa ne kedarching bang tau gai bei ze tingruibe ne tewringpik kai bei de lei.

¹⁵Chidadege â chize ziemmena hang hechingdikbe ching hang chang di de lei; chize pa ne gêsa tei lu dik ze hemigûm de lei, pa ne hemi tew’ntau gai lu tingku lang de lei; zai pa ne hera ramme luî du tew gai lu chi je kakellum de lei, pa ne heraluî gialube tew kam gai lu dege, chipau suage keikeu ze kakellum lei.

¹⁶Chize pa’mpi pa ne hemi ge dik kai lei; pa’mpi zene hemei rû ze teu’nggeugit lu de lei; zai chige pa hemigûm ze, “Hai, I lumpat mui de lei, I hemi ngau de lei!” ze kacheu de lei.

¹⁷Zai chige ’nsakpatbe pelane zene pa heraluî chiam de lei, pe gu heraluîtewbe zeu; zai chige pa kâukeu gai lu chi je kakellum de lei; pa ne chi je kellum ze, “Achu lupat kai lau, nang â a rapeu daseu!” ze kacheu de lei.

¹⁸Penui chî mak lei, zai ’nning du ’nninggai’mmi mak lei; penui ngauchi lak ra hangge pa ne penui mik ramme tew’mmuî kam gai bei, zai penui ’nningchi lak ra hangge penui lung ramme tewnam kam gai bei dadegeu.

¹⁹“Aipau ze pa’mpi â I ne dik ’ndi da, zai aize dikbe mechingkâng gene du tingku lang zai hemei lang ze I teu de lei; zai chi ’ndêupatbe zene mâ-katenetbe zat hangge I tew gai ra mei? Chi hechingdum dunggaibe suage I kâukeu gai ra mei?” ze acheu sa gai ra hangge mî du ’nning’mmi gai mak, zai mî du chî’nchui mak zai mî du keyi-kesia ’ndeu gai mak lei.

²⁰Pa â timbun gene teu’nggeu ze bam lei; choagai’ndibe lung zene pechu puîmie gai ’ndi lei, zai pe runne pechu lupatkaichi lak ze, “A ba hezat’mbia ba ge mâ-karasa zat la semei?” ze kacheu de lei.

²¹Airamme chî bam lau, Hei Jakobbe gau, zai Israel gau, ningnai â a guâ ka’ngguame daseu; I ne ningnai je tew gai de lei, ningnai â a guâ ka’ngguame kena de lei; Hei Israel gau, ningchu â I ne ’ngngai dai ra mak te lei.

²²Kemâu je gum ze I ne ning gu hemui-helut ramme tuâ kam ’ndi de lei, zai kemuazûng je gum ze I ne ning gu hemui ramme tuâ kam ’nde lei; a dage helatwang dai zu lau, I ne ningchu ripat kai ’nde lei.

²³Heleutew zu lau, Hei tingkehube gau, Tingwang ne chize tew gai bei daseu; ’nrung zu lau, Hei kedei ge gechukbe bâm ramme gau; heleu tuachu lau, Hei peloa ramme gau, Hei ’nrêu gau zai chige hingbang bambe leine gau! Tingwang ne Jakobbe je ’nripat kai bei de lei, zai Israel ngeutew’ndi gai gu de lei.

²⁴Tingwang, ningchu Ripatpeu, nebâm gene ningchu tew’ngkaugaipeu ne aigum ze rang lei: “I ze, getaleine tewgaipeu, pe runne ne tingkehube liâmpatkaipeu, kedei ze kâmgaipeu, Tingwang de lei, châu a dage la lau?

²⁵Kemeukarasa kau ramme ne mâ-betak gechâmbe tewme je kiâka’ntaupeu, zai heduaîchime je tewmiegaipeu; kaningchingme je kelipatkaikadaipeu, zai penui mâ-gechîbe ramme kemiebe hang tewgaipeu;

²⁶pe guâ ka’ngguame gu sam tew’ntipkaipeu, zai pe gu hepâupaume gu mâ-sie geteiliabe tewpuigaipeu; Jerusalem je, ‘Pe dage ziemmena lung ze bam gu lei,’ acheu ze sagaipeu, zai Juda namdi je, ‘Penui je tewchu gai dai bu lei, zai penui gu siadibe ramme I ne teichu gai gu lei,’ acheu ze sagaipeu;

²⁷heduigechukbe je, ‘Changku gai de zu lau, ning gu ’nggeuki ramme ze I ne tewchang gai ’ndu de lei,’ acheu ze sagaipeu;

²⁸Sirabe je, ‘Pa â a gu melireîpeu lei, zai pa ne, a tâudeu leine tewpui kam gai gu lei,’ kacheupeu; Jerusalem je, ‘Pechu tewchu gai gu lei,’ kacheupeu, zai kellumki je, ‘Ning gu pedimpung ze kai gu de lei,’ ze acheu sagaipeu zeu,” ze acheu zeu.