Read Zeme Naga ISAIA 45 Bible Online

ISAIA 45 - Zeme Naga bible

ISAIA 45

¹Tingwang ne pe gu hera-taudui ’nnukkailupeu, Sirabe, pa ne pechu heramzatme je tei’nrak ze bam ra, zai heguangme kiakâk-ria ramme hei ra, pe suage keriekemui ramme peize kainam mak ra ’ngkam ramme lat kai ra pa ne pe ba herakgitbampeu je aigum ze rang gai lei:

²“I ne ning suage tat ku lei, zai kangngâgeî ’ngkam ramme tew’nsia desuirui gai gu, zai hegeî ’ngkamchâp ramme dângtapperiu gai gu lei,

³I ne ningchu kemuîbe heurâ ramme, zai mi heurâ baitinggaibe hekâm’nchukkai’ndibe ramme ze pei gai gu lei, chidezai I ze Tingwang, ning ji sing gene ningchu kubepeu, Israelme Rapeu lei be nang chî le ra hangge zeu.

⁴A guâ ka’ngguapeu Jakobbe hang ziegene benai I ne kelânglume Israelme hang ziegene, ningchu I ne ning ji sing gene ku de lei, nang ne achu chî mak ze bam leusedu I ning ji hang kû gai de lei.

⁵I ze Tingwang de lei, zai kêdabe mî de ga lei, achu sâu ze Hera kêdabe ga lei; nang ne achu chî mak ze bam leusedu I ne ningchu ning ran tew’nchi gai de lei,

⁶chidezai tingnaimik pat ’mbene benai tingrun ’mbene ziemmename ne peize achu sâu ze mî de ga lei be chî le ra hangge zeu; I ze Tingwang de lei, zai kêdabe kau â ga de lei.

⁷I ne kebabe tew gai zai kemuîbe ’ndam gai lei, I ne mâ-yibe tew gai zai mi duânggabe ’ndam gai lei, airamme leine tewgaipeu, I ze Tingwang de lei.

⁸“Hei tingkehube gau, kehu ’mbene tingruibiau wang gai lau, zai tinggîm piehang ngaube zene peize kapelingbe ruikeu gai lau; kedei ze peize lat kai lau, dezai tewka’nringbe puakpat ra hangge zeu, zai chize ne peize kapelingbe puakchu ra du tew gai lau; I, Tingwang ne chize ’ndam gai de lei.

⁹“Pechu Tewgaipeu je kahekangbe kau â pe duângga gu lei, hegamli kat zene hegamlitewpeu je hekang dizai â, pa pe duângga gu lei. Depungkâng ne pechu peluî hang ’ndampatkaipeu je, ‘Nang ne ’ndaikau chiam chiam lau’ ze kacheu semei? Makchai, ‘Nang ne tewgaibe mi ba teibe bâm hang ga lei,’ ze kacheu semei?

¹⁰Hêpeu hangkat je, ‘Nang ne ’ndaikau lungkeu ra tew gai lau?’ kacheube kau â, pe duângga gu lei, makchai ’mpuimi hangkat je, ‘’Ndaikau hanggene nang ’nraka’nsua lau?’ kacheube kau â, pe duângga gu lei,” ze acheu zeu.

¹¹Tingwang, Israel gu Ka’nchibe Hangkat, zai pechu Tewgaipeu ne aigum ze rang lei: “Ningnui ne a name rasam ’nneu ra mei, makchai a ba tatew peireige ningnui ne samde tewrua ze bam ra mei?

¹²I ne kedei tew gai lei zai chige I ne ziemmena je ’ndam gai lei; tinggîm piehang ngaube ramme ze a ba ne teiliampat kai lei, zai chige kebambe ramme je I ne samdie gai lei.

¹³I ne kapelingbe gene pechu tew’nrakchu gai bei de lei, zai I ne pe gu ’mpuî ramme leine tew’nzei gai gu lei; pa ne a gu namdi tewchu gai ze a gu kebangme ramme je ’mpat kai gu lei, pemî benai pehî hang chakkaisua mak zeu,” ze Tingwang ne kacheu de lei.

¹⁴Tingwang ne aigum ze rang lei: “Ijip gu heram heurâ benai Ethiopia ne helîkahedetbe tâtewbe, zai Sabeanme, penui kaurayime ramme ne ning dage wang gai bei ze nang ne ning gu chang kam ze bam gu lei, penui ne ningchu sui ze bam gu lei, penui ne kebangteuria penui guang ge ’nteu lu wang ze ning dage keikeu gu lei. Penui ne ningchu kiâm ze, ‘Hera â ning dage runne la lei, zai kêdabe kau â ga de lei, pechu sâu ze hera ga de lei,’ ze acheu gu lei,” ze acheu zeu.

¹⁵Gesangsing ze nang â, ning runne ’mbaibambe Hera de lei, Hei Israel gu Hera, Tewka’nringpeu gau.

¹⁶Penui ’nteumena je tew’ngngam gai ze tewhelêu gai bei de lei, heraluî chiamme ramme penui duângga di ze tat kam de lei.

¹⁷Kane Israel je â betunmakbe tewka’nringbe gene Tingwang ne tew’nring gai bei de lei; ningnui je â betundaimak ze tew’ngngam gai ra mak lei, zai tewhelêu gai ra mak lei.

¹⁸Aize Tingwang ne ranggaibe de lei, tinggîm piehang ngaube ramme tewgaipeu, pa ze â Hera de lei; kedei ze peluî hang ’ndam ze tew gai, zai chize tew’ntipkaipeu zeu; pa ne chize peruahuâng bam ra tew gai mak lei, kane ziemmena bam ra tew gai lei-pa ne sa ze: “I ze Tingwang lei, zai kêdabe kau â ga de lei.

¹⁹Hekim gene, kemuîbe ram gene I â samsa me lei; ‘Peruahuângbe ge achu peu lau,’ ze I ne Jakobbe haîhikme je rang gai mak lei. I Tingwang â samsang sa lei, ’ndaikau ka’nzei mei be ze I ne rang’nchichiak kai lei.

²⁰“Ningnui runne heruawang lu zuawang lau, wang’nna kam gai lau, heramzatme dagene ningnui ringpatme gau! Heching ne tewbe penui gu heraluîtewbe ramme puame, zai mi je tew’nringchilakbe hera kat dage kellum ze bamme ze penui dage mâ-gechîbe ga lei.

²¹Ranglia’nchi gai ze ningnui gu tûdeu ze pei gai lau; penui je peize laddei kam le lau! Tingtie ge châu ne aize ranglia lau? ’Ndâge aize châu ne ranglia’nchi gai lau? Chize I, Tingwang ne mak mei? Zai achu sâu ze hera kêdabe ga de lei, mâ-pelingtewbe Hera zai Tewka’nringpeu zeu; achu sâu ze mî de ga de lei.

²²“A dage helatwang ze ringpat le lau, kedeirei pemik leine gau! I â Hera zai kêdabe kau â ga daseu.

²³A runne ne I samhat kai lei, helatwangdaitarabe samkie kat ze kapelingbe gene a mui gene zuapat ti de lei: ‘A dage haimena kukdungkeu kam gu lei, haimena ne deseu gu lei,’ kacheube zeu.

²⁴“Kapelingbe benai heranchibe â, Tingwang dage runne lei, ze achu acheu gu lei; pechu kika’nsiame leine dage wangchang gai gu lei, dezai pechu tew’ngngam gai gu lei.

²⁵Tingwang gene Israelbe haîhikme leine duî ze pengêudi bam gu lei,” ze kacheu de lei.