Read Zeme Naga ISAIA 46 Bible Online

ISAIA 46 - Zeme Naga bible

ISAIA 46

¹Bel (Babilon râ) keikeu gai de lei, Nebo (Babilon râ) keikeu gai de lei, penai luî tewbe heraluî ramme ze â, mârekaune ramme benai kaurui ramme peireige la de lei; ai ningnui ne pungbe ramme ze leidibe mârekaune ramme peireige tuâritsit kai ’nde lei.

²Penui (heraluî ramme) zene ’ngkumkeu kam gai de lei, penui ’ndiepatchi lak lei, zai penui du kebangtewbe bâm ’mbe tat ti de lei.

³“A kuâ seu le lau, Hei Jakob ki gau, Israel ki ge chai’nsakpatme leine, ningnui je pua’nna ze lungkeube gene I ne ’nsi ze bamme gau;

⁴ningnui gechîngchangdibe riâ ’nsangdu I ze Pa de lei, zai ningnui hepeî-gepû changdibe riâ ’nsangdu I ne ningnui je tei gu lei. I ne teleu gai lei, zai I ne tinggeu gu lei; I ne pung gu lei zai tew’nring gai gu lei.

⁵“Châu je achu ningnui ne ngau’nzuâ gai zai achu châu je ka’nzuâbe hang tew gai lau, zai achu châu benai je ningnui teikeda gai lau?

⁶Gechâk pe gu chiaka gene sukhuakkaime, zai hedu gene gepût ’nchupatkaime ne gechâkluabe kau je puî lu pa ne heraluî hang chiam de lei; dadege â penui kâukeu ze kakellum de lei!

⁷Chize penui ne penui keîtoa ge teichu gai lu pua de lei, chize penui ne pebâm ge kai bei ze chige sap ti de lei; chize pebâm gene tew’ngngaichi lak lei. Chige hangkat ne kûsiak kai bei sedu chize mi kuâ kak mak lei, makchai kahereube gene pechu tew’nringpat kai mak lei.

⁸“Aize chibam lau zai ’nningdesi gai lau, ning lung ge ’nningdau dai lau, ningnui hedieka’ngkabe tâ tewme gau,

⁹’ndâ rasam ramme chibam lau; I â Hera daseu, zai kêdabe kau â ga de lei; I ze Hera lei, zai I gumbe kau mî de ga lei,

¹⁰bepîbang keraîbe ting gu gene hetûn-gairabe rasam rang’nchi gai ze zai gechîng rehei ting gene mâ-wangchang mak ze bambe rasam rang’nchi gai ze, ‘A gu geteiliabe sam saptingkisi bam gu lei, zai I ne a tâudeu leine tew’nsang gai gu lei,’ ze acheu sa ze

¹¹tingbia ’mbene ’nruine tuîteube kau, heram kedeu ’mbene a gu mâ-geteiliabe teipeu je ku lei. I ne sa gai ’nde lei, chize wangchang ra I ne tew gai gu lei; I hekasûn gai ’nde lei, zai chize I ne tew sing gu lei.

¹²“A kuâ seu le lau, ningnui helung kechime, ningnui je ripat kai ra hangge hungsang-hung ze bamme gau:

¹³A gu ripatbe tâ ze I ne teiwang’nna gai lei, chize deu ta de lei, zai a gu tewka’nringbe ze tezie ra mak lei; I ne Zaion ge tewka’nringbe kai gu lei, a ngeudibe Israel hangge zeu.”