Read Zeme Naga ISAIA 47 Bible Online

ISAIA 47 - Zeme Naga bible

ISAIA 47

¹Wangkeu ze kedeinia zeu ge ’ntau lau, Hei Babilon gu heleu- katimsangpui gau; heguang-bamrak ga ze kedei ge ’ntau lau, Hei Kaldiame na heleu’mpui gau! Ningchu ka’nchiapbe benai ’nnuarabe acheu ze kû ta du daseu.

²Mâniakbe chukâng tei lu dekuî niak zu lau, ning ju ’ngkumnambepaî lupat ne lau, ning puâ yibe ramme gâupat ne lau, ning pî kena paî kehuachu lu ’nggeuki ramme katatchu lau.

³Ning pum pumlâng ngau ra gâupat kai bu lei, zai ning gu mi ka’ngngambe ngau du lei. I ne hekûm lu gu lei, zai mî je de ’nsak kai ra mak lei.

⁴Anui je Ripatpeu— baudime gu Tingwang ze pe ji de lei, pa â Israel gu Ka’nchibe Hangkat te lei.

⁵Ning kuâneu mak ze ’ntau bam lau, zai kemuîbe bâm ’mbe tatchu lau, Hei Kaldiame na heleu’mpui gau; ningchu â heguangram ramme gu heguangpui acheu ze kû ta du daseu.

⁶A gume peireige I a râta di de lei, a gume je I a gu tew ta di de lei; I ne penui je ning ba ge pei gai bei de lei, nang ne penui je ka’nggiabe teilia gai mak bei lei; gechîngme peireige nang ne ning gu guangkâm dapritsit kai bei de lei.

⁷Nang ne sa ze, “I ne betingbeta heguangpui chang bam gu lei,” kacheu de lei, chipauziegene airamme ning lung ge kai mak ze bam lei, makchai chiramme tudkairabe tak ze du nang chibam mak lei.

⁸Chunage chidaze aize seu le lau, nang lungkaheruâbe kau, helungditau ze ’ntaubampui, ning lung gene, “I ze de lei, achu sâu ze miramme kêdabe kau ga de lei; kemîpui gum ze I ’ntau ra mak lei, makchai napoine ramme gadibe ze chî ra mak lei,” kacheupui gau:

⁹Aibe kena ze luakatne, mai kat gene ning dage wangchang gai gu lei; ning name hang nang ngautaderabe benai kemîpui hang changgaiderabe ze, ning gu misongga heduaîtewbe ramme benai lungkahekabe tâ ramme tew ze bam sedu, pehîtit ge ning peireige wangchang gai gu lei.

¹⁰Nang â ning lungriaksiabe tak geze ning lung ditau ze, “Mî du achu ngau me lei,” ze kacheu de lei; ning gu kaningchingbe benai ning machi bambe zene ningchu puîmietat ti de lei, zai ning lung gene nang ne a chêu sa ze, “I ze de lei, zai achu sâu ze mî de ga de lei,” ze kacheu de lei.

¹¹Kane mâ-kesiabe ning peireige wang gu lei, chize nang ne ’ndaizeu nang ’nchingtew sedu ’mbiachi lak lei; mi duânggabe pausiabe ning peireige keu gai gu lei, chi kesiabe ze nang ne tewtemai’nggachi lak lei; zai luakatne mâ-tewka’nsiabe, nang ne mâ de chichuimakbe ze ning peireige wang gu lei.

¹²Ning gu lungkahekabe tak ramme benai ning gu misongga heduaîtewbe tak ramme ge sap’ntip le lau, ning riting gene nang tew-desanggailube zeu; nang ’nggim lelêu gu lei, nang miramme je tew’ngngingchi lelêu gu lei.

¹³Ning hangge mâ-geteiliabe misongga bam di ze nang leikeu di de lei; penui ne peize pat ze sap kai lu ningchu tew’nring gai be lau, tinggîm ge piehang ngaube ’nzipânggaime, hegi ramme ge hezêupie ze bamme ning peireige mâ-wangchangrabe hangge hekêu keuhâ gene mâ rangpat ze bamme zeu.

¹⁴Pie le lau, penui â megaumui riâ de lei, hemi ne penui je rûka’ngga lei; hemi getaube ranchi gene penui runne penui je lupatchi lak lei. Aize â hangkat ne hemigûmrabe hemi-meching mak lei, pe suage ’ntau gai ra hemi ga lei!

¹⁵Aigum wangchangbe ze â, ning hangge nang ne ’mmêtrua ze bamme bau ze de lei, ning riting gene penui ne ningchu gechiauliâ’nrui ze bamme zeu; penui ne penui ’nchui-chui ge keleurua ze bam lei; ningchu tew’nringgairabe kau mî de ga lei.