Read Zeme Naga ISAIA 48 Bible Online

ISAIA 48 - Zeme Naga bible

ISAIA 48

¹Aize seu le lau, Hei Jakob ki gau, ningnui je Israel ji gene kû ze bamme, zai Juda kiria gene patme, zai Israel gu Hera ji kû ze bamme, kane samsang benai peling gene kûmakme bau zeu.

²Penui â penui runne penui je ka’nchibe namdi ji gene kû ze bam lei, zai penui â Israel gu Hera dage ’ngngêu bam lei; baudime gu Tingwang ze pe ji de lei.

³“’Ndâting gene ’ndâting rasam I rang’nchichiak kai bei de lei, chiramme a mui gene zuapat ti de lei, zai chiramme ze chî ra I tew gai bei de lei; dadege I ne luakatne chiramme tew gai bei ze wangchang gai di de lei.

⁴Nang â helung keikeulakbe, zai ning guangbeu â hegeî, zai ning telie â hetageî lei be I chilube ziegene,

⁵chiramme ningchu I rang’ntuagaibe wangchang makge ’ndâting gene chiramme ze I ningchu rang’nchichiak kai bei de lei, chidezai nang ne, ‘A gu heraluîtewbe zene chiramme tew gai de lei, a gu heraluî hekilube benai a gu heraluî lualube zene chiramme je samdie gai bei de lei,’ ze acheu mak ra hangge zeu.

⁶“Nang ne seu lu de lei; chunage aize ngau kam le lau; zai ningnui ne aize rangpat’nchichiak kai mak ra mei? Chuna hî gene mâ-mâ-karchibe tei’mbai’ndibe nang ne chimakbe ze nang seu ra I tew gai lei.

⁷’Ndâ ne mak ze, chuna ne chiramme ’ndam gai ’nde lei; besua’ngka ge â, nang ne chiramme mâdau seu mak bam de lei, chidezai nang ne, ‘Pie le lau, I chiramme chî de lei,’ ze acheu mak ra hangge zeu.

⁸Nang mâdau du seu mak lei, nang mâdau du chî mak lei, ’ndâ gene ning kun lat kai mak bam di de lei. Nang ne ning choâsia ze tâtew gu lei be I chi, zai lungkeube gene ningchu â, ka’nggipeu ze kû gu lei be I chi dadegeu.

⁹“A ji hang ziegene a râta gai kelua mak lei, a ngêu hang ziegene ning hangge chize gesut kai de lei, dezai I ne ningchu lutua gai mak ra hangge zeu.

¹⁰Pie le lau, I ne ningchu tew’nchichiak kai lei, kane gepût peireige tewgumbe ne mak zeu; tewkahereube hemihûnki gene I ne ningchu kedak lu de lei.

¹¹A ji hanggene, a ji hanggene, I aize tew lei, a ji tewhebâ ze bam bam gu dadegeu. A ngeudibe ze I miramme je pei ra mak lei.

¹²“A kuâ seu le lau, Hei Jakobbe gau, zai I ne kûlube Israel gau! I ze Pa de lei, I ne raîlangbe de lei, zai I ne nâlangbe de lei.

¹³A ba ne kedeipung ze kai gai lei, zai a ba hezat’mbia ba ne tinggîm piehang ngaube ramme liâmsungpat kai lei; I ne penui je kû gai bei dege penui pat ze sap kam gai lei.

¹⁴“Ningnui ’nteumena wang’ndui ze seu le lau! Penui ruage châu ne airamme ze rangpat’nchichiak kai bei lau? Tingwang ne pechu hung lei; Babilon peireige pa ne pe gu tâ ze tew gai gu lei, zai pe ba â Kaldiame je ’nggi ra bam gu lei.

¹⁵I, I ne du, pechu ’mpau gai ze kû gai bei de lei, I ne pechu nguawang gai bei de lei, zai pa pe gu ’mpuî ge lung’ntua ze bam gu de lei.

¹⁶A dage zuawang’nna lu ze aize seu le lau: bepîbang keraîbe gene I ne ’ngkim ne sa gai mak lei, mâ-wangchang gai di ze bambe ting gene I â bamkuâ di de lei,” zai chunage Tingwang Hera ne achu benai pe gu Herui je lang gai bei de lei.

¹⁷Tingwang, ningchu Ripatpeu, Israel gu Ka’nchibe Hangkat ne aigum ze rang lei: “I ze Tingwang ning Rapeu lei, nang mâ-mâ pung-ze-gie ze bam ra geteigaipeu, nang tatrabe ’mpuî ge ningchu nguagaipeu zeu.

¹⁸Hei nang ne a gu hingde ramme seu di nung laîzai! Chidezai ning gu ’nnamgaibe desieyibe ze ’nggeuki gum bam bam du de lei, zai ning gu kapelingbe ze sungkling ge heduiteleu ka’ngngaibe ramme gum ze bam gu de lei;

¹⁹ning haîhikme ne hegitmoîne gum bam gu de lei, zai ning chaname ne hegit gum bam gu de lei; penui ji ze a masua gene mâtew-tewsedu lutua ze tew’nsia gai ra mak lei,” ze acheu zeu.

²⁰Babilon gene ningnui tatpat te zu lau, Kaldia gene pat te zu lau, aize ’nrung ze rangba gai lau, aize pau gai lau, aize kedeimik deulangbe ge langpat kai lau; “Tingwang ne pe guâ ka’ngguapeu Jakobbe je ripat kai ’nde lei!” ze sa gai lau.

²¹Tingkangram pa ne nguapelatatbe luage penui (hedui) herei mak lei; pa ne penui hangge tingchukâng gene hedui lua ra tew gai bei de lei; pa ne tingchukâng lak’ngkak kai bei ze chigene hedui pat te lei.

²²“Helungriaksiame hangge desieyibe lungkatemibe ga de lei” be Tingwang ne rang gai lei.